Coconut oil Price: വെളിച്ചെണ്ണ വില താഴ്ന്നുതന്നെ, പണി തന്നത് മറ്റൊന്ന്; കാരണം തമിഴ്നാടും!
Market Rates in Kerala: കുറഞ്ഞ വിലയ്ക്ക് ഇറക്കുമതി ചെയ്യുന്ന എണ്ണകളുടെ സ്വാധീനം വെളിച്ചെണ്ണ വില കുറയ്ക്കാൻ സമ്മർദ്ദം ചെലുത്തുന്നുണ്ട്. ആഗോളതലത്തിൽ വെളിച്ചെണ്ണയുടെ വ്യാവസായിക ആവശ്യകത വർദ്ധിക്കുന്നത് വില ഉയരാൻ കാരണമായേക്കാം.
പുതുവത്സരത്തിൽ പ്രതീക്ഷ നൽകി വെളിച്ചെണ്ണ വില. കഴിഞ്ഞ കുറച്ച് ദിവസങ്ങളിലായി വെളിച്ചെണ്ണ, തേങ്ങ വില കുറയുന്നത് മലയാളികൾക്ക് സമാധാനം നൽകുന്നുണ്ട്. ഓണക്കാലത്ത് അഞ്ഞൂറ് കടന്ന വില നിലവിൽ ഒരു ലിറ്ററിന് മൂന്നൂറിന് അടുത്ത് എത്തി നിൽക്കുകയാണ്. ഈ വർഷം മൂന്നൂറിലും താഴുമെന്നാണ് പ്രവചനങ്ങൾ.
വലിയ തോതിലുള്ള തേങ്ങ വിളവെടുപ്പാണ് ഇതിന് പിന്നിലെ പ്രധാന കാരണമെന്ന് വ്യാപാരികൾ പറയുന്നു. തമിഴ്നാട്, കർണാടക സംസ്ഥാനങ്ങളിൽ നിന്നുള്ള കൊപ്ര വരവ് വർദ്ധിക്കുന്നതും വിലയിടിവിന് കാരണമാകുന്നുണ്ട്. നിലവിൽ ഒരു ലിറ്റർ ഏകദേശം 350 - 385 രൂപ നിരക്കിലാണ് വിപണിയിൽ ലഭ്യമാകുന്നത്.
വെളിച്ചെണ്ണ വില കുറഞ്ഞെങ്കിൽ മലയാളികളുടെ പ്രിയപ്പെട്ട മറ്റൊരു ഭക്ഷണത്തിന് വില കുതിക്കുകയാണ്. 170 രൂപയുടെ കോഴിയിറച്ചി 265 ലെത്തിയിരിക്കുകയാണ്. തമിഴ്നാട്ടിൽ നിന്നുള്ള കോഴിയുടെയും, മുട്ടയുടെ വരവ് കുറഞ്ഞതാണ് വില കൂടാൻ കാരണമായത്.
അതേസമയം, നാളികേരസീസൺ പതിവിലും നേരത്തെ ആരംഭിക്കാൻ സാധിക്കുമെന്നാണ് ചെറുകിട കർഷകർ പറയുന്നത്. വെളിച്ചെണ്ണ വിലയോടൊപ്പം തേങ്ങ വിലയിലും വലിയ മാറ്റം സംഭവിക്കുന്നുണ്ട്. നിലവിൽ 80 രൂപയ്ക്കു മുകളിൽ വരെയെത്തിയ തേങ്ങയുടെ ചില്ലറ വില ഏകദേശം 53 - 60 രൂപയായിട്ടുണ്ട്.
കുറഞ്ഞ വിലയ്ക്ക് ഇറക്കുമതി ചെയ്യുന്ന എണ്ണകളുടെ സ്വാധീനം വെളിച്ചെണ്ണ വില കുറയ്ക്കാൻ സമ്മർദ്ദം ചെലുത്തുന്നുണ്ട്. എന്നാൽ ആഗോളതലത്തിൽ വെളിച്ചെണ്ണയുടെ വ്യാവസായിക ആവശ്യകത വർദ്ധിക്കുന്നത് വില വീണ്ടും ഉയരാൻ കാരണമായേക്കാം. (Image Credit: Getty Image)
