Dream11: ഡ്രീം ഇലവൻ്റെ പുറത്താവൽ; ഏഷ്യാ കപ്പിൽ ഇന്ത്യ സ്പോൺസർമാരില്ലാതെ കളിക്കുമോ?
India Jersey Sponsorship In Asia Cup: ഏഷ്യാ കപ്പിൽ ഇന്ത്യ സ്പോൺസർമാരില്ലാതെ കളിക്കേണ്ടിവരുമോ? കളിക്കേണ്ടിവന്നേക്കാം എന്നാണ് റിപ്പോർട്ടുകൾ.
ഇന്ത്യയുടെ ജഴ്സി സ്പോൺസർമാരായ ഡ്രീം ഇലവൻ അടക്കം നിരോധിക്കപ്പെട്ടതോടെ വരുന്ന ഏഷ്യാ കപ്പിൽ ഇന്ത്യ സ്പോൺസർമാരില്ലാതെ കളിക്കുമോ എന്ന ആശങ്ക ഉയരുന്നുണ്ട്. രണ്ടാഴ്ചയ്ക്ക് ശേഷമാണ് ഏഷ്യാ കപ്പ് ആരംഭിക്കുക. അതുകൊണ്ട് തന്നെ തീരുമാനമെടുക്കാൻ അധിക സമയമില്ല. (Image Courtesy- Social Media)
സാധാരണ രീതിയിൽ ഒരു ജഴ്സി സ്പോൺസറുടെ കാലാവധി അവസാനിച്ചാൽ ബിസിസിഐ അടുത്ത സ്പോൺസർമാരെ തേടും. ഇതിനായി ലേലം ക്ഷണിക്കും. ഉയർന്ന തുക സമർപ്പിക്കുന്നയാൾക്ക് സ്പോൺസർഷിപ്പ് കാലാവധി നൽകും. എന്നാൽ, കുറഞ്ഞ സമയം പ്രതിസന്ധിയായി തുടരുകയാണ്.
ഏഷ്യാ കപ്പിന് മുൻപ് സ്പോൺസർമാരെ കണ്ടെത്താൻ കഴിഞ്ഞില്ലെങ്കിൽ ജഴ്സി സ്പോൺസർമാർ ഇല്ലാതെയാവും ടീം ഇന്ത്യ കളത്തിലിറങ്ങുക. വിവിധ റിപ്പോർട്ടുകൾ പ്രകാരം ഡ്രീം ഇലവൻ്റെ പേര് പ്രിൻ്റ് ചെയ്ത ജഴ്സികൾ ഇതിനകം തയ്യാറാക്കിക്കഴിഞ്ഞിട്ടുണ്ട്. എന്നാൽ, ഇത് ഉപയോഗിക്കില്ല.
2023ലാണ് ഡ്രീം ഇലവനും ബിസിസിഐയും തമ്മിലുള്ള കരാർ ആരംഭിച്ചത്. ബൈജൂസിൻ്റെ കാലാവധി അവസാനിച്ചതോടെയാണ് ഡ്രീം ഇലവൻ ഈ സ്ഥാനത്തെത്തിയത്. 2026 വരെയായിരുന്നു കരാർ കാലാവധി. ഈ കാലയളവിൽ 358 കോടി രൂപയാണ് ഡ്രീം ഇലവൻ ബിസിസിഐയ്ക്ക് നൽകേണ്ടിയിരുന്നത്.
ഓൺലൈൻ ഗെയ്മിങ് ആപ്ലിക്കേഷനുകൾക്ക് നിരോധനമേർപ്പെടുത്തുന്ന ബില്ല് പാസാക്കിയതാണ് ഡ്രീം ഇലവൻ അടക്കമുള്ള ഫാൻ്റസി ഗെയിമിങ് ആപ്പുകൾക്ക് തിരിച്ചടിയായത്.പണം വച്ചുള്ള ഓൺലൈൻ ഗെയ്മിങ് ആപ്ലിക്കേഷനുകളെ നിരോധിക്കുന്നതാണ് ഈ ബിൽ.
