വേനല്ച്ചൂടിനെ അകറ്റാന് വെള്ളരി കഴിക്കൂ
ഫൈബര്, പൊട്ടാസ്യം, മഗ്നീഷ്യം, മറ്റ് ആന്റി ഓക്സിഡന്റുകള് എന്നിവ അടങ്ങിയ വെള്ളരിക്ക രക്തസമ്മര്ദ്ദം കുറയ്ക്കാനും സഹായിക്കും. കൂടാതെ ഇവ ഹൃദയാരോഗ്യം സംരക്ഷിക്കാനും ഗുണം ചെയ്യും
നിരവധി ആരോഗ്യ ഗുണങ്ങളുളള ഒരു പച്ചക്കറിയാണ് വെള്ളരിക്ക. വെള്ളരിക്കയില് 95 ശതമാനവും വെള്ളമാണ്. അതിനാല് ശരീരത്തില് ജലാംശം നിലനിര്ത്താന് ഇവ സഹായിക്കും. വേനല്ക്കാലത്തെ നിര്ജ്ജലീകരണത്തെ തടയാന് വെള്ളരിക്ക കഴിക്കുന്നത് നല്ലതാണ്.
ആന്റി ഓക്സിഡന്റുകളുടെ കലവറയാണ് വെള്ളരിക്ക. ഫൈബര്, വിറ്റാമിന് കെ, വിറ്റാമിന് സി, മഗ്നീഷ്യം, കാത്സ്യം, ഇരുമ്പ്, ഫോസ്ഫറസ്, സിങ്ക് തുടങ്ങി ധാരാളം പോഷകങ്ങള് വെള്ളരിക്കയില് അടങ്ങിയിട്ടുണ്ട്. വിറ്റാമിനുകള് ധാരാളം അടങ്ങിയ ഇവ പതിവാക്കുന്നത് രോഗ പ്രതിരോധശേഷി കൂട്ടാനും സഹായിക്കും.
ഫൈബറിന്റെ നല്ല ഉറവിടമാണ് വെള്ളരിക്ക. ദഹനസംബന്ധമായ പ്രശ്നങ്ങള്, നെഞ്ചെരിച്ചില്, അസിഡിറ്റി, അള്സര്, മലബന്ധം എന്നിവ ഒഴിവാക്കാന് വെള്ളരിക്ക ഡയറ്റില് ഉള്പ്പെടുത്താം. കുടലിന്റെ ആരോഗ്യത്തിനും ഇവ ഗുണം ചെയ്യും.
പ്രമേഹരോഗികള്ക്കും കഴിക്കാവുന്ന ഒരു പച്ചക്കറിയാണ് വെള്ളരിക്ക. ഫൈബര് അടങ്ങിയ ഇവ രക്തത്തിലെ പഞ്ചസാരയുടെ അളവിനെ നിയന്ത്രിക്കാന് സഹായിക്കുന്നു. ഫൈബര്, പൊട്ടാസ്യം, മഗ്നീഷ്യം, മറ്റ് ആന്റി ഓക്സിഡന്റുകള് എന്നിവ അടങ്ങിയ വെള്ളരിക്ക രക്തസമ്മര്ദ്ദം കുറയ്ക്കാനും സഹായിക്കും. കൂടാതെ ഇവ ഹൃദയാരോഗ്യം സംരക്ഷിക്കാനും ഗുണം ചെയ്യും.
വിറ്റാമിന് കെ അടങ്ങിയ വെള്ളരിക്ക കഴിക്കുന്നത് എല്ലുകളുടെ ആരോഗ്യത്തിനും നല്ലതാണ്. വണ്ണം കുറയ്ക്കാന് ആഗ്രഹിക്കുന്നവര്ക്ക് ഡയറ്റില് ഉള്പ്പെടുത്താവുന്ന ഒന്നാണ് വെള്ളരിക്ക.
കലോറി വളരെ കുറഞ്ഞ, ഫൈബര് ധാരാളം അടങ്ങിയ വെള്ളരിക്ക വിശപ്പിനെ നിയന്ത്രിക്കാന് സഹായിക്കും. അതുവഴി വണ്ണം കുറയ്ക്കാനും കഴിയും. വിറ്റാമിന് സിയും മറ്റ് ആന്റി ഓക്സിഡന്റുകളും അടങ്ങിയ വെള്ളരിക്ക ഡയറ്റില് ഉള്പ്പെടുത്തുന്നത് ചര്മ്മത്തിന്റെ ആരോഗ്യത്തിനും നല്ലതാണ്.
