Kerala Cricket League: കെഎസിഎല്ലിൽ ഒത്തുകളി? സന്ദേശത്തിൽ അന്വേഷണം കേരളത്തിന് പുറത്തേക്ക്

Credits: Kerala Cricket League T20 Facebook Page

തിരുവനന്തപുരം: പ്രഥമ കേരള ക്രിക്കറ്റ് ലീ​ഗിൽ ഒത്തുകളിക്കാൻ താരങ്ങൾക്ക് കോഴ വാ​ഗ്ദ​ഗാനം ചെയ്തതായി റിപ്പോർട്ട്. കൊല്ലം സെയ്ലേഴ്സ് ടീമം​ഗം അമൽ രമേശ്, കാലിക്കറ്റ് ​ഗ്ലോബ്സ്റ്റാർസ് അം​ഗം അഖിൽ സ്കറിയ എന്നിവർക്കാണ് കോഴ വാ​ഗ്​ദാനം ചെയ്തത്. ഇരുവരും ഫെെനലിൽ നേർക്കുനേർ വന്ന ടീമുകളുടെ താരങ്ങളാണ്. ​ഒത്തുകളിയിൽ പൊലീസ് അന്വേഷണം കേരളത്തിന് പുറത്തേക്ക് വ്യാപിപ്പിക്കുന്നു. താരങ്ങളിൽ ഒരാളുടെ ഫോണിലേക്ക് എത്തിയ സന്ദേശം ഛത്തീസ്​ഗഢിൽ നിന്നാണെന്ന് തെളിഞ്ഞതോടെയാണ് അന്വേഷണം മറ്റുസംസ്ഥാനങ്ങളിലേക്കും വ്യാപിപ്പിക്കുന്നത്. വഞ്ചന, കേരള ​ഗെയിമിം​ഗ് ആന്റ് ഐടി ചട്ടങ്ങൾ പ്രകാരമാണ് കന്റോൺമെന്റ് പൊലീസും ഫോർട്ട് പൊലീസും കേസെടുത്തിരിക്കുന്നത്.

ഇൻസ്റ്റ​ഗ്രാമിലൂടെയും വാട്സ്ആപ്പിലൂടെയുമാണ് താരങ്ങൾക്ക് വാതുവെപ്പുക്കാർ സന്ദേശമയച്ചത്. വെെഡ്, നോബോൾ പന്തുകളെറിഞ്ഞാൽ ഒരോ പന്തിനും ഒരു ലക്ഷം രൂപയാണ് വാ​ഗ്ദാനം ചെയ്തത്. സ്പോൺസർഷിപ്പ് എന്ന പേരിലാണ് വാതുവയ്പ്പുകാർ അഖിലിനെ സമീപിച്ചത്. പിന്നീട് കോഴ വാ​ഗ്ദാനം ചെയ്യുകയും തങ്ങളുടെ നിർദ്ദേശ പ്രകാരം ഒരു ഓവർ എറിഞ്ഞാൽ 5 ലക്ഷം രൂപ നൽകാമെന്നും വാ​ഗ്ദാനം ചെയ്തു. ഈ സന്ദേശം എവിടെ നിന്നാണ് വന്നതെന്ന് സെെബർ സെൽ പരിശോധിക്കുകയാണ്.

കോഴവാ​ഗ്ദാനം ചെയ്തെന്ന കാര്യം താരങ്ങൾ താരങ്ങൾ ടീം അധികൃതരെ അറിയിച്ചതോടെ ബിസിസിഐ അഴിമതി വിരുദ്ധ വിഭാ​ഗവുമായി ബന്ധപ്പെടുകയായിരുന്നു. ബിസിസിഐയാണ് പൊലീസിന് പരാതി നൽകിയിരിക്കുന്നത്. സന്ദേശമയച്ചവരുടെ വിവരങ്ങൾ തേടി ഫേസ്ബുക്കിനെയും ഇൻസ്റ്റ​ഗ്രാമിനെയും പൊലീസ് ബന്ധപ്പെട്ടിട്ടുണ്ട്.

കൊല്ലം സെയ്‌ലേഴ്‌സിയായിരുന്നു പ്രഥമ ലീ​ഗിന്റെ ചാമ്പ്യന്മാർ. ഫൈനലിൽ കാലിക്കറ്റ് ഗ്ലോബ്‌സ്റ്റാര്‍സിനെ ആറു വിക്കറ്റിന് പരാജയപ്പെടുത്തിയാണ് കൊല്ലം പ്രഥമ ലീ​ഗ് കിരീടം സ്വന്തമാക്കിയത്. നായകൻ സച്ചിൻ ബേബിയുടെ സെഞ്ച്വറിയാണ് കൊല്ലത്തെ കിരീടത്തിലേക്ക് നയിച്ചത്. ടൂർണമെന്റിൽ 528 റ‌ൺസ് നേടിയ സച്ചിനാണ് ലീ​ഗിലെ റൺവേട്ടക്കാരിൽ ഒന്നാമൻ.