Cameron Green: വിട്ടുമാറാത്ത വൃക്കരോഗം; 12 വയസിന് അപ്പുറം ജീവിച്ചിരിക്കില്ലെന്ന് ഡോക്ടര്മാര്; കാമറൂണ് ഗ്രീന് പൊരുതിയതെങ്ങനെ?
Cameron Green Health Issue: തനിക്ക് വിട്ടുമാറാത്ത വൃക്ക രോഗമുണ്ടെന്ന് കാമറൂണ് ഗ്രീന് നേരത്തെ വെളിപ്പെടുത്തിയിരുന്നു. 12 വയസിനപ്പുറം ജീവിച്ചിരിപ്പിക്കില്ലെന്നായിരുന്നു ഗ്രീനിന്റെ മാതാപിതാക്കളോട് ഡോക്ടര്മാര് പറഞ്ഞിരുന്നത്. ഈ രോഗത്തിന് പരിഹാരമില്ലെന്നും ഡോക്ടര്മാര് വിധിയെഴുതി. എന്നാല് ജീവിതത്തോട് പടപൊരുതി കാമറൂണ് ഗ്രീന് മുന്നോട്ടുപോയി.
Cameron Green
ഈ ഐപിഎല് സീസണില് ഏറ്റവും കൂടുതല് തുക ലഭിച്ച താരമാണ് കൊല്ക്കത്ത നൈറ്റ് റൈഡേഴ്സിന്റെ ഓസീസ് ഓള്റൗണ്ടര് കാമറൂണ് ഗ്രീന്. ഏറ്റവും കൂടുതല് ട്രോളുകള് ലഭിച്ചതും ഗ്രീനിനായിരിക്കാം. 25.2 കോടി രൂപയ്ക്കാണ് കൊല്ക്കത്ത ഗ്രീനിനെ സ്വന്തമാക്കിയത്. ഏറെ പ്രതീക്ഷയോടെ കൊല്ക്കത്ത സ്വന്തമാക്കിയ താരം ഐപിഎല് 2026-ലെ തുടക്കത്തിലെ മത്സരങ്ങളില് നിരാശപ്പെടുത്തി.
ഒടുവില് ഗുജറാത്ത് ടൈറ്റന്സിനെതിരെ ഇന്ന് നടന്ന മത്സരത്തില് ഗ്രീന് ഫോമിലേക്ക് എത്തിയിരിക്കുകയാണ്. ഗുജറാത്തിനെതിരെ 55 പന്തില് 79 റണ്സാണ് ഗ്രീന് നേടിയത്. ആരോഗ്യപ്രശ്നങ്ങളോട് പടപൊരുതിയാണ് ലോകമറിയുന്ന ക്രിക്കറ്റ് താരമായി 26-കാരനായ ഗ്രീന് മാറിയത്.
തനിക്ക് വിട്ടുമാറാത്ത വൃക്ക രോഗമുണ്ടെന്ന് 2023 ഡിസംബറില് ഗ്രീന് വെളിപ്പെടുത്തിയിരുന്നു. 12 വയസിനപ്പുറം ജീവിച്ചിരിപ്പിക്കില്ലെന്നായിരുന്നു ഗ്രീനിന്റെ മാതാപിതാക്കളോട് ഡോക്ടര്മാര് പറഞ്ഞിരുന്നത്. ഈ രോഗത്തിന് പരിഹാരമില്ലെന്നും ഡോക്ടര്മാര് വിധിയെഴുതി. എന്നാല് ജീവിതത്തോട് പടപൊരുതി ഗ്രീന് മുന്നോട്ടുപോയി.
Also Read: Hardik Pandya: ‘ഹാര്ദ്ദിക് നായകസ്ഥാനം ഒഴിയണം; ക്യാപ്റ്റന്സി രോഹിത് ശര്മയ്ക്ക് കൈമാറണം’
കൃത്യമായ ചികിത്സയിലൂടെയും, ഭക്ഷണക്രമത്തിലൂടെയുമാണ് ഗ്രീന് രോഗത്തോട് പടപൊരുതിയത്. ആരോഗ്യത്തെ എങ്ങനെ കൈകാര്യം ചെയ്യുന്നുവെന്ന് ഒരിക്കല് ബിബിസിയോട് ഗ്രീന് വെളിപ്പെടുത്തിയിരുന്നു. വീട്ടിലായിരിക്കുമ്പോൾ കൃത്യമായ ഡയറ്റ് പിന്തുടരാൻ എളുപ്പമാണെന്നും, അല്ലാത്തപ്പോള് അനുയോജ്യമായ ഭക്ഷണം കിട്ടാന് ബുദ്ധിമുട്ടാണെന്നും ഗ്രീന് വ്യക്തമാക്കിയിരുന്നു.
എന്നാല് താന് നേരിടുന്നത് വലിയ പ്രശ്നങ്ങളായി ഗ്രീന് വിചാരിക്കുന്നില്ല. നമുക്കറിയാത്ത വ്യത്യസ്ത പ്രശ്നങ്ങളിലൂടെയാണ് ധാരാളം ആളുകള് കടന്നുപോകുന്നതെന്ന് അദ്ദേഹം പറഞ്ഞു. തന്റെ പ്രശ്നങ്ങള് ജീവിതത്തെ അത്ര ബാധിക്കുന്നില്ല. അടിസ്ഥാനപരമായി താന് നല്ല തീരുമാനങ്ങളാണ് എടുക്കുന്നത്. വൃക്കകള് സ്വയം സുഖപ്പെടില്ല. പക്ഷേ, രോഗത്തിന്റെ തീവ്രത കുറയ്ക്കാനാകും. താന് മികച്ച രീതിയില് തുടരുന്നിടത്തോളം കാലം തനിക്ക് കുഴപ്പങ്ങളൊന്നുമുണ്ടാകില്ലെന്നും ഗ്രീന് വ്യക്തമാക്കിയിരുന്നു.
