Ramadan 2026: ദുബായിലെ എല്ലാ പാർക്കുകളിലും റമദാൻ സ്പെഷ്യൽ സൗജന്യ മെഡിക്കൽ പരിശോധന, നടപടികളും ലക്ഷ്യവും ഇങ്ങനെ

Free medical checkup

ദുബായ്: റമദാൻ മാസത്തോടനുബന്ധിച്ച് ദുബായിലെ പ്രധാന പൊതുസ്ഥലങ്ങളിൽ സൗജന്യ ആരോഗ്യ പരിശോധനയുമായി അധികൃതർ. ദുബായ് ഇസ്ലാമിക് അഫയേഴ്‌സ് ആൻഡ് ചാരിറ്റബിൾ ആക്റ്റിവിറ്റീസ് ഡിപ്പാർട്ട്‌മെന്റ് (IACAD) സംഘടിപ്പിക്കുന്ന സ്റ്റെപ്പ് ഓഫ് ലൈഫ് എന്ന ക്യാമ്പയിന്റെ ഭാഗമായാണ് ഈ പദ്ധതി. രോഗങ്ങൾ നേരത്തെ കണ്ടെത്താനും പ്രതിരോധ പരിചരണം പ്രോത്സാഹിപ്പിക്കാനുമാണ് ഈ സംരംഭം ലക്ഷ്യമിടുന്നത്.

പ്രൈം മെഡിക്കൽ കെയർ, നൂർ ദുബായ് ഫൗണ്ടേഷൻ എന്നിവയുടെ സഹകരണത്തോടെ ഫെബ്രുവരി 26, മാർച്ച് 5, മാർച്ച് 12 തീയതികളിൽ ഉച്ചയ്ക്ക് 4 മണി മുതൽ മഗ്രിബ് ബാങ്ക് വരെയാണ് പരിശോധനകൾ നടക്കുക. ഖുറാനിക് പാർക്ക്, കൈറ്റ് ബീച്ച്, നാദ് അൽ ഷെബ പാർക്ക് എന്നിവിടങ്ങളിലാണ് നടക്കുന്നത്. തിരക്കിനനുസരിച്ച് പരിശോധന സമയം നീട്ടുന്നതും പരിഗണിക്കും.

ലഭ്യമാകുന്ന സേവനങ്ങൾ

മൊബൈൽ മെഡിക്കൽ യൂണിറ്റുകൾ വഴി താഴെ പറയുന്ന പരിശോധനകൾ പൂർണ്ണമായും സൗജന്യമായി ലഭ്യമാകും.

• നേത്ര പരിശോധന
• രക്തസമ്മർദ്ദ പരിശോധന
• രക്തത്തിലെ പഞ്ചസാരയുടെ അളവ് പരിശോധിക്കൽ

ജീവിതശൈലീ രോഗങ്ങൾ നേരത്തെ കണ്ടെത്താനും ആരോഗ്യകരമായ ജീവിതരീതി പിന്തുടരാൻ താമസക്കാരെ പ്രോത്സാഹിപ്പിക്കാനുമാണ് ഇതിലൂടെ ലക്ഷ്യമിടുന്നത്. കുടുംബങ്ങൾ ഇഫ്താറിന് മുന്നോടിയായി പാർക്കുകളിലും മറ്റും ഒത്തുചേരുന്ന സമയം പ്രയോജനപ്പെടുത്തി ആരോഗ്യസേവനങ്ങൾ ജനങ്ങളിലേക്ക് നേരിട്ട് എത്തിക്കാനാണ് ഈ പദ്ധതിയെന്ന് ഐഎസിഎഡി ചാരിറ്റബിൾ വർക്ക് സെക്ടർ എക്സിക്യൂട്ടീവ് ഡയറക്ടർ മുഹമ്മദ് മുസ്ബാ ദാഹി പറഞ്ഞു. കുടുംബങ്ങൾക്കിടയിൽ ആരോഗ്യ അവബോധം സൃഷ്ടിക്കുന്നത് വഴി കരുത്തുറ്റ ഒരു സമൂഹത്തെ കെട്ടിപ്പടുക്കാൻ സാധിക്കുമെന്നും അദ്ദേഹം കൂട്ടിച്ചേർത്തു.