8th Pay Commission: സർക്കാർ ജീവനക്കാർക്ക് ലോട്ടറിയോ? വീടിന് 75 ലക്ഷം രൂപ വരെ, പലിശ വെറും 5 ശതമാനം

പ്രതീകാത്മക ചിത്രം

എട്ടാം ശമ്പള കമ്മീഷൻ നടപ്പിലാക്കാനുള്ള നടപടികൾ പുരോഗമിക്കവെ, കേന്ദ്ര സർക്കാർ ജീവനക്കാർക്ക് വലിയ ആശ്വാസം നൽകുന്ന വാർത്തകളാണ് പുറത്തുവരുന്നത്. പുതിയ ശമ്പളകമ്മീഷന് ഉടൻ ഉണ്ടാകുമെന്നാണ് വിവരം. വിവിധ ആവശ്യങ്ങൾ ഉയർത്തി ജീവനക്കാരുടെ സംഘടനകൾ രം​ഗത്തെത്തിയിരുന്നു. ഇപ്പോഴിതാ, വീട് നിർമ്മാണത്തിനായുള്ള മുൻകൂർ തുക കൂട്ടണമെന്ന ആവശ്യവും ശക്തമാവുകയാണ്. ഫെഡറേഷൻ ഓഫ് നാഷണൽ പോസ്റ്റൽ ഓർഗനൈസേഷൻസ് ഉൾപ്പെടെയുള്ള സംഘടനകൾ കമ്മീഷന് സമർപ്പിച്ച കത്തിലാണ് ഈ ആവശ്യങ്ങൾ ഉന്നയിച്ചിരിക്കുന്നത്.

വീട് നിർമ്മാണത്തിനായുള്ള മുൻകൂർ തുക (House Building Advance – HBA) വർദ്ധിപ്പിക്കണമെന്നും പലിശ നിരക്ക് കുറയ്ക്കണമെന്നുമാണ് ജീവനക്കാരുടെ ആവശ്യം. നിലവിൽ അഡ്വാൻസ് തുക 25 ലക്ഷം രൂപയാണ്. ഏഴാം ശമ്പള കമ്മീഷൻ നിശ്ചയിച്ച ഈ തുക ഇന്നത്തെ കാലത്ത് ഒരു വീട് നിർമ്മിക്കുന്നതിനോ വാങ്ങുന്നതിനോ പര്യാപ്തമല്ലെന്നാണ് ജീവനക്കാരുടെ പക്ഷം.  ഇത് അംഗീകരിച്ചാൽ, ജീവനക്കാർക്ക് HBA പരിധികളിൽ ഗണ്യമായ വർദ്ധനവ് പ്രതീക്ഷിക്കാവുന്നതാണ്.

പ്രധാന നിർദേശങ്ങൾ എന്തെല്ലാം?

മുൻകൂർ തുക 75 ലക്ഷം: ഹൗസ് ബിൽഡിംഗ് അഡ്വാൻസ് പരിധി 75 ലക്ഷം രൂപയായി ഉയർത്തണമെന്നാണ് സംഘടനകളുടെ പ്രധാന ആവശ്യം. നിലവിൽ ഇത് 25 ലക്ഷം രൂപയാണ്. ഭൂമിയുടെ വിലയും നിർമ്മാണച്ചെലവും ഗണ്യമായി വർദ്ധിച്ചത് ചൂണ്ടിക്കാട്ടിയാണ് അഡ്വാൻസ് കൂട്ടണമെന്ന് ആവശ്യപ്പെടുന്നത്.

ALSO READ: മെഡിക്കൽ അലവൻസ് കൂടും, ജീവനക്കാരുടെ ആവശ്യം ഇങ്ങനെ…

പലിശ നിരക്ക്: ഭവന വായ്പയുടെ പലിശ നിരക്ക് 5 ശതമാനമായി നിജപ്പെടുത്തണമെന്നാണ് മറ്റൊരു പ്രധാന ആവശ്യം.

ശമ്പളത്തിന്റെ 60 മടങ്ങ്: ഒരാളുടെ മാസ ശമ്പളത്തിന്റെ 60 മടങ്ങ് വരെ വായ്പയായി അനുവദിക്കണമെന്നും, എന്നാൽ ഇത് പരമാവധി 75 ലക്ഷം രൂപയിൽ കൂടാൻ പാടില്ലെന്നും നിർദ്ദേശത്തിലുണ്ട്.

സർവീസ് കാലാവധി: നിലവിൽ അഞ്ച് വർഷം സർവീസ് പൂർത്തിയാക്കിയവർക്കാണ് ഈ ആനുകൂല്യം ലഭിക്കുന്നത്. ഇത് രണ്ട് വർഷമായി കുറയ്ക്കണമെന്നും ആവശ്യമുണ്ട്. കൂടാതെ, അഡ്വാൻസ് തുക അനുവദിക്കുന്നതിനുള്ള നടപടിക്രമങ്ങൾ കൂടുതൽ ലളിതമാക്കണമെന്നും നിർദേശമുണ്ട്.