EPFO SWP: വിരമിക്കുമ്പോൾ പി.എഫ് തുക ഒന്നിച്ച് പിൻവലിക്കേണ്ട; മാസവരുമാനവും പലിശയും ഉറപ്പാക്കുന്ന പുതിയ പദ്ധതിയുമായി ഇ.പി.എഫ്.ഒ
EPFO Systematic Withdrawal Plan Proposal Explained: പദ്ധതിക്ക് അംഗീകാരം ലഭിച്ചാൽ, പി.എഫ് അക്കൗണ്ടിൽ അഞ്ച് ലക്ഷം രൂപയിലധികം നിക്ഷേപമുള്ള 55 വയസ്സിന് മുകളിലുള്ള ഏകദേശം 6.32 ലക്ഷം അംഗങ്ങൾക്ക് ഇതിൻ്റെ പ്രയോജനം ലഭിക്കുമെന്നാണ് ഇ.പി.എഫ്.ഒ കണക്കാക്കുന്നത്. പണം ഘട്ടംഘട്ടമായി പിൻവലിക്കുമ്പോൾ, പിൻവലിക്കാതെ അക്കൗണ്ടിൽ ബാക്കിയുള്ള തുക ഇ.പി.എഫ് ഫണ്ടിൽ തന്നെ തുടരുകയും അതിന് പതിവുപോലെ പലിശ ലഭിക്കുകയും ചെയ്യും

പ്രതീകാത്മക ചിത്രം
ന്യൂഡൽഹി: വിരമിക്കുന്ന സമയത്ത് പി.എഫ് തുക പൂർണ്ണമായും ഒന്നിച്ച് പിൻവലിക്കുന്നതിന് പകരം, ഘട്ടംഘട്ടമായി പിൻവലിക്കാൻ സൗകര്യമൊരുക്കുന്ന സുപ്രധാന നീക്കവുമായി എംപ്ലോയീസ് പ്രൊവിഡൻ്റ് ഫണ്ട് ഓർഗനൈസേഷൻ. പി.എഫിൽ പുതിയ സിസ്റ്റമാറ്റിക് വിഡ്രോവൽ പ്ലാൻ അവതരിപ്പിക്കാനാണ് പദ്ധതി. ഈ പുതിയ നിർദ്ദേശം വ്യാഴാഴ്ച നടക്കുന്ന ഇ.പി.എഫ്.ഒ സെൻട്രൽ ബോർഡ് ഓഫ് ട്രസ്റ്റീസ് യോഗത്തിൽ ചർച്ച ചെയ്യും. വിരമിക്കുന്ന ജീവനക്കാർക്ക് തങ്ങളുടെ പി.എഫ് തുക ഇ.പി.എഫ് അക്കൗണ്ടിൽ തന്നെ നിലനിർത്താനും, തുടർന്നും പലിശ നേടാനും, അതേസമയം സ്ഥിരവരുമാനം ഉറപ്പാക്കാനും സാധിക്കുന്ന തരത്തിലാണ് പദ്ധതി വിഭാവനം ചെയ്യുന്നത്
നിലവിലെ ചട്ടപ്രകാരം, ഒരു ഇ.പി.എഫ്.ഒ അംഗത്തിന് വിരമിക്കുമ്പോൾ അക്കൗണ്ടിലുള്ള തുക പൂർണമായും ഒന്നിച്ച് പിൻവലിക്കാനാകും. ഇതിന് പുറമെ കുറഞ്ഞത് പത്ത് വർഷമെങ്കിലും സർവീസുള്ളവർക്ക് എംപ്ലോയീസ് പെൻഷൻ സ്കീം പ്രകാരം പ്രതിമാസ പെൻഷനും ലഭിക്കും. എന്നാൽ പുതിയ എസ്.ഡബ്ല്യു.പി പദ്ധതി നടപ്പിലാകുന്നതോടെ പണം പിൻവലിക്കാൻ ജീവനക്കാർക്ക് മൂന്ന് വ്യത്യസ്ത മാർഗ്ഗങ്ങളാണ് ഇ.പി.എഫ്.ഒ വാഗ്ദാനം ചെയ്യുന്നത്. തുക ഘട്ടംഘട്ടമായി പിൻവലിക്കാം, അല്ലെങ്കിൽ ഒരു നിശ്ചിത തുക ഒന്നിച്ച് പിൻവലിച്ച ശേഷം ബാക്കിയുള്ള തുക എസ്.ഡബ്ല്യു.പി വഴി എടുക്കാം, പലിശ മാത്രം പിൻവലിക്കുന്ന രീതിയും ലഭ്യമായിരിക്കും.
പദ്ധതിക്ക് അംഗീകാരം ലഭിച്ചാൽ, പി.എഫ് അക്കൗണ്ടിൽ അഞ്ച് ലക്ഷം രൂപയിലധികം നിക്ഷേപമുള്ള 55 വയസ്സിന് മുകളിലുള്ള ഏകദേശം 6.32 ലക്ഷം അംഗങ്ങൾക്ക് ഇതിൻ്റെ പ്രയോജനം ലഭിക്കുമെന്നാണ് ഇ.പി.എഫ്.ഒ കണക്കാക്കുന്നത്. പണം ഘട്ടംഘട്ടമായി പിൻവലിക്കുമ്പോൾ, പിൻവലിക്കാതെ അക്കൗണ്ടിൽ ബാക്കിയുള്ള തുക ഇ.പി.എഫ് ഫണ്ടിൽ തന്നെ തുടരുകയും അതിന് പതിവുപോലെ പലിശ ലഭിക്കുകയും ചെയ്യും. മാത്രമല്ല, പദ്ധതിയിൽ ചേർന്ന ശേഷം ഏത് ഘട്ടത്തിൽ വേണമെങ്കിലും എസ്.ഡബ്ല്യു.പി അവസാനിപ്പിച്ച് ബാക്കിയുള്ള മുഴുവൻ തുകയും പിൻവലിക്കാൻ വിരമിച്ചയാൾക്ക് പൂർണ്ണ സ്വാതന്ത്ര്യമുണ്ടായിരിക്കും.
എസ്.ഡബ്ല്യു.പി കാലാവധിക്കിടെ അംഗം മരണപ്പെടുകയാണെങ്കിൽ, ബാക്കിയുള്ള തുകയ്ക്ക് അതേ വ്യവസ്ഥകളിൽ തന്നെ പങ്കാളിക്കോ നോമിനിക്കോ പദ്ധതി തുടരാനുള്ള അവകാശം നൽകുന്ന വ്യവസ്ഥകളും ഇ.പി.എഫ്.ഒ ഉൾപ്പെടുത്താൻ ആലോചിക്കുന്നുണ്ട്. ഇ.പി.എഫ്.ഒയുടെ നേരിട്ടുള്ള സ്റ്റാറ്റ്യൂട്ടറി ഫണ്ടിലെ അംഗങ്ങൾക്ക് മാത്രമായിരിക്കും ഈ പദ്ധതി ലഭ്യമാവുക.
English Summary
EPFO proposes a Systematic Withdrawal Plan allowing retirees phased payouts while earning EPF interest on remaining funds, potentially benefiting 6.32 lakh members.