Sree Sankaracharya University Admission 2025: സംസ്കൃത സർവകലാശാലയിൽ നാല് വർഷ ബിരുദ പ്രവേശനം; അപേക്ഷകൾ ക്ഷണിച്ചു
Sree Sankaracharya University 4 Year Degree Admission 2025: സർവകലാശാലയുടെ കാലടി മുഖ്യ ക്യാമ്പസിലും വിവിധ പ്രാദേശിക ക്യാമ്പസുകളിലേക്കുമാണ് പ്രവേശനം. യോഗ്യതയുള്ളതും താത്പര്യമുള്ളവരുമായ വിദ്യാർത്ഥികൾക്ക് ജൂൺ 8ന് മുമ്പായി സർവകലാശാലയുടെ ഔദ്യോഗിക വെബ്സൈറ്റ് വഴി ഓൺലൈനായി അപേക്ഷ സമർപ്പിക്കാം.
ശ്രീശങ്കരാചാര്യ സംസ്കൃത സർവകലാശാല
കാലടി: ശ്രീശങ്കരാചാര്യ സംസ്കൃത സർവകലാശാല 2025-26 അധ്യയന വർഷത്തേക്കുള്ള നാല് വർഷ ബിരുദ പ്രോഗ്രാമുകളിലേയ്ക്ക് അപേക്ഷ ക്ഷണിച്ചു. സർവകലാശാലയുടെ കാലടി മുഖ്യ ക്യാമ്പസിലും വിവിധ പ്രാദേശിക ക്യാമ്പസുകളിലേക്കുമാണ് പ്രവേശനം. യോഗ്യതയുള്ളതും താത്പര്യമുള്ളവരുമായ വിദ്യാർത്ഥികൾക്ക് സർവകലാശാലയുടെ ഔദ്യോഗിക വെബ്സൈറ്റ് വഴി ഓൺലൈനായി അപേക്ഷിക്കാം. അപേക്ഷ സമർപ്പിക്കാനുള്ള അവസാന തീയതി ജൂൺ 8 ആണ്.
സംസ്കൃതം – സാഹിത്യം, സംസ്കൃതം – വേദാന്തം, സംസ്കൃതം – വ്യാകരണം, സംസ്കൃതം -ന്യായം, സംസ്കൃതം – ജനറൽ, സംഗീതം, ഭരതനാട്യം, മോഹിനിയാട്ടം, ഇംഗ്ലീഷ്, മലയാളം, ഹിന്ദി, ഹിസ്റ്ററി, ഉറുദു, ഫിലോസഫി, സോഷ്യൽ വർക്ക് (ബി. എസ്. ഡബ്ല്യു.) എന്നിവയാണ് ശ്രീശങ്കരാചാര്യ സർവകലാശാലയിൽ ലഭ്യമായ നാല് വർഷ ബിരുദ പ്രോഗ്രാമുകൾ. ഇതിനു പുറമെ മൈനർ ബിരുദ പ്രോഗ്രാമായി അറബിക്കും തിരഞ്ഞെടുക്കാവുന്നതാണ്.
നാല് വർഷ ബിരുദ സമ്പ്രദായം നിലവിൽ വന്നതോടെ വിദ്യാർത്ഥികൾക്ക് മൂന്ന് വിധത്തിൽ ബിരുദ പ്രോഗ്രാം പൂർത്തിയാക്കാൻ കഴിയും. നിശ്ചിത ക്രെഡിറ്റോടെ മൂന്ന് വർഷം പ്രോഗ്രാം പൂർത്തിയാക്കാൻ ആഗ്രഹിക്കുന്നവർക്ക്, എക്സിറ്റ് ഓപ്ഷൻ ഉപയോഗപ്പെടുത്തി കോഴ്സ് പൂർത്തിയാക്കി മൂന്ന് വർഷ ബിരുദം നേടാവുന്നതാണ്. അതുപോലെ നാല് വർഷം പഠനം പൂർത്തിയാക്കുന്നവർക്ക് നാല് വർഷ ഓണേഴ്സ് ബിരുദം ലഭിക്കും. ഇതിനുപുറമെ, നിശ്ചിത ക്രെഡിറ്റോടെ നാലാം വർഷം ഗവേഷണ പ്രോജക്ട് പൂർത്തിയാക്കുന്നവർക്ക് ഓണേഴ്സ് വിത്ത് റിസർച്ച് ബിരുദം ലഭിക്കുന്നതാണ്.
സംസ്കൃത സർവകലാശാലയുടെ കാലടി മുഖ്യ ക്യാമ്പസിലേക്കും തിരുവനന്തപുരം, പന്മന, കൊയിലാണ്ടി, തിരൂർ, പയ്യന്നൂർ, ഏറ്റുമാനൂർ എന്നീ പ്രാദേശിക ക്യാമ്പുസ്സുകളിലേക്കും നാല് വർഷ ബിരുദ പ്രോഗ്രാമുകൾക്കായി വിദ്യാർത്ഥികൾക്ക് അപേക്ഷിക്കാവുന്നതാണ്. സംസ്കൃത വിഷയങ്ങളിൽ ബിരുദ പഠനത്തിന് പ്രവേശനം നേടുന്നവർക്ക് പ്രതിമാസം 500 രൂപ വീതം സർവകലാശാല സ്കോളർഷിപ്പായി നൽകുന്നതാണ്. ഭരതനാട്യം, മോഹിനിയാട്ടം, സംഗീതം എന്നിവ മുഖ്യവിഷയമായ ബിരുദ പ്രോഗ്രാമുകൾക്ക് അഭിരുചി നിർണ്ണയ പരീക്ഷയുടെ അടിസ്ഥാനത്തിലായിരിക്കും പ്രവേശനം.
ALSO READ: നീറ്റ് പിജി: രണ്ട് ഷിഫ്റ്റിലുള്ള പരീക്ഷ വിവാദത്തിൽ, ഹർജി സുപ്രീം കോടതിയിൽ
നാല് വർഷ ബിരുദ പ്രോഗ്രാമുകളിലേക്ക് അപേക്ഷിക്കാനുള്ള ഉയർന്ന പ്രായപരിധി ജനറൽ/എസ്.ഇ.ബി.സി വിദ്യാർത്ഥികൾക്ക് 23 വയസും (2025 ജനുവരി 1ന്) എസ്.സി / എസ്.ടി വിദ്യാർത്ഥികൾക്ക് 25 വയസുമാണ്. പ്ലസ് ടു/വൊക്കേഷണൽ ഹയർ സെക്കൻഡറി/ തത്തുല്യം യോഗ്യതയുളളവർക്ക് ബിരുദ പ്രോഗ്രാമുകളിലേക്ക് അപേക്ഷിക്കാവുന്നതാണ്. ലാറ്ററൽ എൻട്രി അനുവദനീയമാണ്. ഒരു വിദ്യാർത്ഥിക്ക് ഒന്നിലധികം പ്രോഗ്രാമുകളിലേക്ക് അപേക്ഷിക്കാം.
ഇതിനുമുൻപ് ഒരു ബിരുദ പ്രോഗ്രാം വിജയകരമായി പൂർത്തിയാക്കിയിട്ടുളളവർക്കും സർവകലാശാല നിശ്ചയിച്ചിട്ടുള്ള മാനദണ്ഡങ്ങൾ പ്രകാരം നാല് വർഷ ബിരുദ പ്രോഗ്രാമുകളിലേക്ക് അപേക്ഷിക്കാവുന്നതാണ്. ജനറൽ / എസ്.ഇ.ബി.സി വിദ്യാർത്ഥികൾക്ക് ഓരോ പ്രോഗ്രാമിനും 50 രൂപ വീതമാണ് അപേക്ഷ ഫീസ്. എസ്.സി / എസ്.ടി വിദ്യാർത്ഥികൾക്ക് ഓരോ പ്രോഗ്രാമിനും 25 രൂപയാണ്. കൂടുതൽ വിവരങ്ങൾക്ക് www.ssus.ac.in സന്ദർശിക്കുക.
