Director Shamzu Zayba: പണം തട്ടിപ്പ്! അഭിലാഷം സിനിമയുടെ സംവിധായകൻ അറസ്റ്റിൽ

Shamsu Zayaba

കൊച്ചി: സാമ്പത്തിക തട്ടിപ്പ് കേസിൽ യുവ സംവിധായകൻ അറസ്റ്റിൽ. അഭിലാഷം സിനിമയുടെ സംവിധായകനായ ഷംസുദ്ദീൻ( ഷംസു സൈബ) ആണ് അറസ്റ്റിൽ ആയത്. നിർമ്മാതാവായ ആൻ സരി​ഗ ആന്റണി നൽകിയ പരാതിയിലാണ് നടപടി. ഇന്നലെ രാത്രിയാണ് തൃപ്പൂണിത്തുറ പോലീസ് ഷംസുദ്ദീനെ അറസ്റ്റ് ചെയ്തത്. കരാറിനേക്കാൾ കൂടുതൽ തുക സിനിമ ചിത്രീകരണത്തിന് വേണ്ടി കൈവശപ്പെടുത്തിയെന്നാണ് നിർമ്മാണം നൽകിയ പരാതി. കൂടാതെ സിനിമ ചിത്രീകരണത്തിനിടയിൽ വിശ്വാസവഞ്ചന കാണിച്ചതായും പരാതിയിൽ പറയുന്നു. ഷംസുവിനെ കൂടാതെ അഭിലാഷം സിനിമയിൽ പ്രവർത്തിച്ച അഞ്ചുപേർക്കെതിരെയും പരാതിയിൽ ആരോപണങ്ങൾ ഉണ്ട്.

നിലവിൽ സംവിധായകൻ അല്ലാതെ മറ്റുള്ളവർക്കെതിരെ നടപടികൾ സ്വീകരിച്ചിട്ടില്ല. അതേസമയം നിർമാതാവായ ആൻ സരി​ഗ തന്നോട് പക തീർക്കുകയാണെന്നാണ് സംവിധായകന്റെ പ്രതികരണം. ചിത്രീകരണത്തിനുള്ള ചെലവ് മാത്രമേ വാങ്ങിയിട്ടുള്ളൂ എന്നും ഷംസു പോലീസിനോട് പറഞ്ഞിരിക്കുന്നത്. ഷൂട്ടിങ്ങിന് സമയത്ത് നിർമ്മാതാവുമായി വാക്കു തർക്കം ഉണ്ടായിരുന്നു എന്നും ഇതിന്റെ പകതീർക്കുവാണ് ഇപ്പോൾ എന്നും ഷംസു.

അതേസമയം സിനിമയുടെ ഷൂട്ടിങ്ങിനിടയിൽ നിർമാതാവും സാങ്കേതിക പ്രവർത്തകരും തമ്മിൽ പ്രതിഫലം സംബന്ധിച്ച് തർക്കങ്ങൾ നടന്നതായും വിവരങ്ങൾ എത്തുന്നുണ്ട്. പ്രതിഫലം ലഭിക്കാത്തതിന്റെ പേരിൽ സിനിമാറ്റോഗ്രാഫർ പരാതി നൽകിയിരുന്നു. റിലീസിനു ശേഷം പ്രതിഫലം നൽകാമെന്ന് നിർമ്മാതാവിന്റെ ഉറപ്പിൽ പിന്നീട് അത് ഒത്തു തീർപ്പാക്കുകയായിരുന്നു.

മണിയറയിലെ അശോകൻ എന്ന സിനിമയ്ക്ക് ശേഷം ഷംസു സൈബ സംവിധാനം ചെയ്ത ചിത്രമായിരുന്നു അഭിലാഷം. 2025 റിലീസ് ചെയ്ത ചിത്രത്തിൽ സൈജു കുറുപ്പ് അർജുൻ അശോകൻ തൻവീർ എന്നിവരാണ് കേന്ദ്ര കഥാപാത്രങ്ങളിൽ എത്തിയത്. തിയേറ്ററുകളിൽ എത്തിയ ചിത്രം മികച്ച നിരൂപകശ്രദ്ധ നേടിയെങ്കിലും സാമ്പത്തികമായി വലിയ വിജയം നേടാൻ സാധിച്ചിരുന്നില്ല. എന്നാൽ ഓ ടി ടി യിൽ വലിയ പ്രേക്ഷക സ്വീകാര്യതയാണ് ലഭിച്ചത്.