Vijay-Sangeetha Divorce : ‘വിജയ് വീട്ടിൽ താമസിക്കാൻ അനുവദിക്കുന്നില്ല’; നടനെതിരെ വീണ്ടും ഹർജി സമർപ്പിച്ച് സംഗീത
Actor Vijay-Sangeetha Divorce Updates : വിവാഹമോചനം ആവശ്യപ്പെട്ട് വിജയിയുടെ ഭാര്യ അടുത്തിടെയാണ് കോടതിയിൽ ഹർജി സമർപ്പിച്ചത്. അതെ തുടർന്നാണ് നടൻ ഭാര്യയെ വീട്ടിൽ തുടരാൻ അനുവദിക്കാത്തതെന്ന് സംഗീത തൻ്റെ ഹർജിയിൽ പറയുന്നു
ടിവികെ അധ്യക്ഷനും നടനുമായ വിജയിക്കെതിരെ സമർപ്പിച്ച വിവാഹമോചന ഹർജിക്ക് പിന്നാലെ പുതിയ ഹർജി സമർപ്പിച്ച് ഭാര്യ സംഗീത. വിജയ് തന്നെ വീട്ടിൽ താമസിക്കാൻ അനുവദിക്കുന്നില്ലെന്നും കോടികൾ സമ്പാദ്യമുള്ള താരം തനിക്കും തൻ്റെ മക്കൾക്കും ന്യായമായത് നൽകണമെന്നാവശ്യപ്പെട്ടുമാണ് നടൻ്റെ ഭാര്യ പുതിയ ഹർജി സമർപ്പിച്ചിരിക്കുന്നത്. ചെന്നൈ നീലാങ്കരയിലെ വീട്ടിലായിരുന്നു വിജയിയും സംഗീത ഒരുമിച്ച താമസിച്ചിരുന്നത്. ഇവിടെ കേസ് പൂർത്തിയാകുന്നത് വരെ തുടരാൻ തന്നെ അനുവദിക്കണമെന്നാണ് സംഗീതയുടെ ആവശ്യം.
യുകെ പൗരത്വമുള്ളതിനാൽ തനിക്ക് ചെന്നൈയിൽ സ്വന്തം പേരിൽ വീടില്ല. നാട്ടിലേക്ക് വരുമ്പോൾ നീലാങ്കരയിലുള്ള വീട്ടിലാണ് താൻ താമസിക്കുന്നത്. അതുകൊണ്ട് വിവാഹമോചനക്കേസ് പൂർത്തിയാകും വരെ അവിടെ തന്നെ തുടരാൻ അനുവദിക്കണമെന്നാവശ്യപ്പെട്ടാണ് സംഗീത ഹർജി സമർപ്പിച്ചിരിക്കുന്നത്. ഇതോടൊപ്പം തന്നെ തനിക്കും മക്കൾക്കും ന്യായമായ ജീവനാംശ ലഭിക്കുണമെന്ന നടൻ്റെ ഭാര്യ ഹർജിയിൽ ആവശ്യപ്പെടുന്നു.
വിവാഹമോചനത്തിനായി കോടതിയെ സമീപിച്ചതുകൊണ്ടാണ് തനിക്ക് നീലങ്കരയിൽ വീട്ടിൽ താമസിക്കാൻ നടൻ വിലക്കേർപ്പെടുത്തിയതെന്നും സംഗീതയുടെ ഹർജിയിൽ പറയുന്നു. കോടതിക്ക് പുറത്ത് വിവാഹമോചനത്തിൻ്റെ നടപടിക്രമങ്ങൾ പൂർത്തിയാക്കാനായിരുന്നു നടൻ ആവശ്യപ്പെട്ടത്, എന്നാൽ കോടതിയെ സമീപിച്ചതോടെ വീട് വിടാൻ നടൻ ആവശ്യപ്പെട്ടു. തുടർന്നാണ് സംഗീത പുതിയ ഹർജിയുമായി കോടതിയെ സമീപിക്കുന്നത്. വീട്ടിൽ തുടരാൻ നടൻ അനുവദിക്കുന്നില്ലെങ്കിൽ പകരം മറ്റൊരു ഇടത്ത് താമസം ഒരുക്കണമെന്നും ഹർജിയിൽ പറയുന്നു.
കഴിഞ്ഞ ദിവസം തമിഴ് സിനിമ നിർമാതാവ് കലപതി സുരേഷിൻ്റെ മകൻ്റെ വിവാഹത്തിന് വിജയിയും നടി തൃഷ കൃഷ്ണയും ഒരുമിച്ച് പങ്കെടുത്തിരുന്നു. അതിന് പിന്നാലെയാണ് നടൻ്റെ ഭാര്യ പുതിയ ഹർജിയുമായി രംഗത്തെത്തിയത്. കോളിവുഡ് മാധ്യമങ്ങൾ നൽകുന്ന റിപ്പോർട്ട് പ്രകാരം വിജയിയും തൃഷയും ഒരുമിച്ച് ഒരു കാറിലാണ് വിവാഹസൽക്കാരത്തിനെത്തിയത്. അതിന് ശേഷം ഇരുവരും ഒരുമിച്ച് മടങ്ങി പോകുകയും ചെയ്തു.
ഈ അടുത്തിടെയാണ് വിജയിയുടെ ഭാര്യ സംഗീത തൻ്റെ 26 വർഷത്തെ ദാമ്പത്യജീവിതം അവസാനിപ്പിച്ചുകൊണ്ട് വിവാഹമോചന ഹർജി കോടതിയിൽ സമർപ്പിച്ചത്. 1999ലാണ് വിജയിയും സംഗീതയും തമ്മിൽ വിവാഹതിരാകുന്നത്. ഇരുവർക്കും രണ്ട് മക്കളുമുണ്ട്, ജേസൺ സഞ്ജയ്, ദിവ്യ സാഷ എന്നാണ് മക്കളുടെ പേര്. തമിഴിലെ പ്രമുഖയായ നടിയുമായി വിജയിക്ക് അവിഹിതം ബന്ധമുണ്ടെന്ന് ചൂണ്ടിക്കാട്ടിയാണ് സംഗീത വിവാഹമോചനത്തിന് ഹർജി സമർപ്പിച്ചത്. 2021 മുതലാണ് നടിയുമായി വിജയിക്ക് അവിഹിതബന്ധമുള്ളതെന്ന് സംഗീതയുടെ ഹർജിയിൽ പറയുന്നു.
