Patriot song: പേട്രിയറ്റിലെ പുതിയ പാട്ട് പാടിയത് മഹാനടൻ, സോഷ്യൽ മീഡിയയിൽ ചർച്ച

കൊച്ചി: വർഷങ്ങൾക്ക് ശേഷം മലയാളത്തിന്റെ ബിഗ് എംസ് ഒന്നിക്കുന്ന പേട്രിയറ്റ് എന്ന ചിത്രത്തിലെ പുതിയ ഗാനം പുറത്തിറങ്ങി. മമ്മൂട്ടിയുടെ ഗാംഭീര്യമുള്ള ശബ്ദത്തിൽ ആലപിക്കപ്പെട്ട മനുഷ്യൻ എന്ന് തുടങ്ങുന്ന ഗാനമാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. മഹേഷ് നാരായണൻ സംവിധാനം ചെയ്യുന്ന ചിത്രത്തിന്റെ റിലീസിന് ദിവസങ്ങൾ മാത്രം ബാക്കി നിൽക്കെയാണ് സർപ്രൈസ് ആയി ഗാനം പുറത്തുവിട്ടത്.

മമ്മൂട്ടിയ്ക്കൊപ്പം പ്രശസ്ത ഗായിക ശക്തിശ്രീ ഗോപാലനും ചേർന്നാണ് ഈ ഗാനം പാടിയിരിക്കുന്നത്. യുവസംഗീത സംവിധായകൻ സുഷിൻ ശ്യാം ഈണമിട്ട ഗാനത്തിന് വരികൾ രചിച്ചിരിക്കുന്നത് വിനായക് ശശികുമാറാണ്. മമ്മൂട്ടിയുടെ പാട്ടിലെ പ്രകടനം കണ്ട് അമ്പരന്നിരിക്കുകയാണ് ആരാധകർ.

ഹൈപ്പില്ലാതെ എത്തിയ സർപ്രൈസ്

യാതൊരുവിധ മുൻകൂർ അറിയിപ്പുമില്ലാതെ അപ്രതീക്ഷിതമായാണ് അണിയറപ്രവർത്തകർ ഗാനം റിലീസ് ചെയ്തത്. ചിത്രത്തിന്റെ ഹൈപ്പ് നിയന്ത്രിക്കാൻ മനപ്പൂർവ്വം പ്ലാൻ ചെയ്തതാണോ ഈ സൈലന്റ് റിലീസ് എന്ന് ആരാധകർ ചോദിക്കുന്നുണ്ട്. “ഒന്നറിയിക്കാമെങ്കിലും ഇല്ലായിരുന്നു”, പ്രതീക്ഷിക്കാത്ത സർപ്രൈസ്” എന്നിങ്ങനെ രസകരമായ കമന്റുകളാണ് വീഡിയോയ്ക്ക് താഴെ വരുന്നത്.

വൻ താരനിരയുമായി മെയ് 1-ന് തിയേറ്ററുകളിലേക്ക്

മമ്മൂട്ടിക്കും മോഹൻലാലിനുമൊപ്പം മലയാളത്തിലെയും തമിഴിലെയും മുൻനിര താരങ്ങൾ അണിനിരക്കുന്ന ഒരു ബിഗ് ബജറ്റ് ചിത്രമാണ് പേട്രിയറ്റ്. നയൻതാര, ഫഹദ് ഫാസിൽ, കുഞ്ചാക്കോ ബോബൻ, ദർശന രാജേന്ദ്രൻ, ഗ്രേസ് ആന്റണി, രേവതി, രാജീവ് മേനോൻ എന്നിങ്ങനെ വൻ താരനിരയാണ് ചിത്രത്തിൽ അണിനിരക്കുന്നത്. ആന്റോ ജോസഫും കെ.ജി അനിൽ കുമാറും ചേർന്നാണ് ചിത്രം നിർമ്മിക്കുന്നത്. ലോകമെമ്പാടുമുള്ള തിയേറ്ററുകളിൽ മെയ് 1-ന് ചിത്രം പ്രദർശനത്തിനെത്തും.

Also Read – ഞാനും ലാലും വന്ന് ഡയലോഗടിച്ചു കെട്ടിപ്പിടിച്ച് അവസാനിക്കുന്ന ചിത്രമില്ല ഇത്! പാട്രിയറ്റിനെക്കുറിച്ച് മമ്മൂട്ടി

‘മാലിക്’, ‘അറിയിപ്പ്’ തുടങ്ങിയ ചിത്രങ്ങൾക്ക് ശേഷം മഹേഷ് നാരായണൻ ഒരുക്കുന്ന ഈ ചിത്രം ഒരു പൊളിറ്റിക്കൽ ത്രില്ലറാണെന്നാണ് സൂചന. മമ്മൂട്ടിയും മോഹൻലാലും തുല്യ പ്രാധാന്യമുള്ള വേഷങ്ങളിലാണ് എത്തുന്നതെന്ന് റിപ്പോർട്ടുകളുണ്ട്. ചിത്രത്തിന്റെ ഛായാഗ്രഹണവും എഡിറ്റിംഗും മഹേഷ് നാരായണൻ തന്നെയാണോ നിർവ്വഹിക്കുന്നത് എന്നതിനെക്കുറിച്ചും ചർച്ചകൾ സജീവമാണ്.

കേരളത്തിന് പുറമെ ശ്രീലങ്ക, ലണ്ടൻ, ഡൽഹി എന്നിവിടങ്ങളിലായി വലിയൊരു ഭാഗം ചിത്രീകരിച്ചിട്ടുണ്ട്. ഹോളിവുഡ് നിലവാരത്തിലുള്ള ആക്ഷൻ രംഗങ്ങൾ ചിത്രത്തിലുണ്ടെന്നാണ് അണിയറപ്രവർത്തകർ നൽകുന്ന സൂചന. മലയാള സിനിമയിലെ രണ്ട് ഇതിഹാസങ്ങൾ സ്ക്രീനിൽ ഒന്നിച്ചെത്തുമ്പോൾ ബോക്സ് ഓഫീസിൽ പുതിയ ചരിത്രം പിറക്കുമെന്ന പ്രതീക്ഷയിലാണ് സിനിമാ ലോകം.

ട്രെയിലർ നൽകുന്ന സൂചന

ട്രെയ്‌ലറിന്റെ ഏറ്റവും വലിയ ആകർഷണം മമ്മൂട്ടിയും മോഹൻലാലും ഒന്നിച്ചുള്ള ഫ്രെയിമുകളാണ്. രണ്ട് വ്യത്യസ്ത പ്രത്യയശാസ്ത്രങ്ങളെ പ്രതിനിധീകരിക്കുന്ന കഥാപാത്രങ്ങളായാണ് ഇവർ എത്തുന്നതെന്ന് ട്രെയ്‌ലർ സൂചിപ്പിക്കുന്നു. ഇരുവരുടെയും ഡയലോഗ് ഡെലിവറിയും സ്ക്രീൻ പ്രസൻസും ഒരുപോലെ ഗംഭീരമാണ്. രാജ്യാന്തര തലത്തിലുള്ള ചാരപ്രവർത്തനങ്ങളും ഭരണകൂടങ്ങൾ തമ്മിലുള്ള രഹസ്യ ഇടപാടുകളും പ്രമേയമാകുന്ന ഒരു പൊളിറ്റിക്കൽ ആക്ഷൻ ത്രില്ലറാണിതെന്ന സൂചനയും ട്രെയിലറിലുണ്ട്.

ഫഹദ് ഫാസിലിന്റെ നിഗൂഢത നിറഞ്ഞ കഥാപാത്രവും നയൻതാരയുടെ കരുത്തുറ്റ സാന്നിധ്യവും ട്രെയ്‌ലറിൽ എടുത്തു കാണിക്കുന്നു. കുഞ്ചാക്കോ ബോബൻ ഇതുവരെ കാണാത്ത ഗെറ്റപ്പിലാണ് എത്തുന്നത്. ഒട്ടേറെ താരങ്ങൾ ഉണ്ടെങ്കിലും എല്ലാവർക്കും പെർഫോം ചെയ്യാൻ സ്പേസ് ഉണ്ടെന്ന സൂചന ട്രെയ്‌ലർ നൽകുന്നു.