Air India: ശുചീകരണത്തിനിടെ എയര്‍ഇന്ത്യ വിമാനത്തില്‍ വെടിയുണ്ട കണ്ടെത്തി; അന്വേഷണം ആരംഭിച്ചു
Air India flight: വിമാനങ്ങൾക്ക് നേരെ ബോംബ് ഭീഷണി തുടരുന്നതിനിടെയാണ് സംഭവം. ഡൽഹി പൊലീസ് കേസെടുത്ത് അന്വേഷണം ആരംഭിച്ചു.
ന്യൂഡൽഹി: എയര്‍ഇന്ത്യ വിമാനത്തില്‍നിന്ന് വെടിയുണ്ട കണ്ടെത്തിയതായി റിപ്പോർട്ട്. ദുബായില്‍നിന്ന് ഡല്‍ഹിയിലെത്തിയ എയര്‍ഇന്ത്യ വിമാനത്തിനുള്ളിലാണ് വെടിയുണ്ട കണ്ടെത്തിയത്. വിമാനങ്ങൾക്ക് നേരെ ബോംബ് ഭീഷണി തുടരുന്നതിനിടെയാണ് സംഭവം. ഡൽഹി പൊലീസ് കേസെടുത്ത് അന്വേഷണം ആരംഭിച്ചു.
ഒക്ടോബര്‍ 27-ാം തീയതിയായിരുന്നു സംഭവം. ദുബായ്-ഡല്‍ഹി AI916 വിമാനത്തിൽ ശുചീകരണത്തിനിടെയാണ് സീറ്റിലെ പോക്കറ്റില്‍നിന്നാണ് ജീവനക്കാര്‍ വെടിയുണ്ട കണ്ടെത്തിയതെന്ന് ഡൽഹി പൊലീസ് വ്യക്തമാക്കിയത്. തുടര്‍ന്ന് എയർ ഇന്ത്യ അ‌ധികൃതർ എയർപോർട്ട് പൊലീസിനെ വിവരമറിയിക്കുകയായിരുന്നു. തുടർന്നാണ് ഡൽഹി പൊലീസിന് പരാതി നൽകിയത്. ആയുധ നിയമപ്രകാരമാണ് ഡല്‍ഹി പൊലീസ് കേസെടുത്തത്. ആഭ്യന്തര-അന്താരാഷ്ട്ര വിമാനങ്ങളടക്കം ബോംബം ഭീഷണി വ്യാപകമായി തുടരുകയാണ് കഴിഞ്ഞ രണ്ടാഴ്ചയ്ക്കിടെ 510-ഓളം വിമാനങ്ങള്‍ക്ക് നേരേയാണ് ഇത്തരത്തിൽ ബോംബ് ഭീഷണിയുണ്ടായത്. തുടർന്ന് നടന്ന അന്വേഷണത്തിൽ വ്യാജ ഭീഷണികളാണെന്ന് കണ്ടെത്തുകയായിരുന്നു.
വിമാനങ്ങളിലെ വ്യാജ ബോംബ് ഭീഷണി ദിനം പ്രതി വർധിച്ചുവരുന്ന സാഹചര്യത്തിൽ കഴിഞ്ഞ ദിവസം പുതിയ മാർഗരേഖ കേന്ദ്രം പുറത്തിറക്കിയിരുന്നു. ഭീഷണി യഥാർഥത്തിലുള്ളതാണോ വ്യാജമാണോയെന്ന് കൃത്യമായി കണ്ടെത്താൻ സമഗ്രപരിശോധനയ്ക്ക് സുരക്ഷാസമിതിക്ക് കൂടുതൽ അധികാരം നൽകും. ഭീഷണി മുഴക്കുന്നയാളുടെയോ സംഘടനയുടെയോ സാമൂഹിക മാധ്യമ മേൽവിലാസം വ്യാജമാണോ എന്ന് സമിതി സൂക്ഷ്മമായി പരിശോധിക്കും. ഭീഷണിപ്പെടുത്തുന്നവർക്ക് ഏതെങ്കിലും തീവ്രവാദ സംഘങ്ങളുമായി ബന്ധമുണ്ടോ, ഭീഷണിക്ക് പിന്നിൽ സാമൂഹികവും സാമ്പത്തികവും രാഷ്ട്രീയവുമായ കാരണങ്ങളുണ്ടോ, അന്താരാഷ്ട്രതലത്തിലുള്ള സംഘങ്ങളുമായി ബന്ധമുണ്ടോ തുടങ്ങിയ കാര്യങ്ങളെല്ലാം പരിശോധിക്കും. വിമാനത്തിന്റെ ടേക്ക് ഓഫിന് മുൻപ്‌ ആളുകളെ ഒഴിപ്പിക്കൽ, അടിയന്തര ലാൻഡിങ്, യാത്രക്കാരെയും അവരുടെ സാധനങ്ങളുടെയും സമഗ്രപരിശോധന വീണ്ടും നടത്തൽ എന്നിവയ്ക്കെല്ലാം മുൻപായിട്ടാകും സമിതി ഭീഷണിയുടെ സ്വഭാവം പരിശോധിക്കുക.
