Bengaluru Parking: ബെംഗളൂരുവില് എല്ലായിടത്തും പേ & പാര്ക്ക്; സൗജന്യസംവിധാനം അവസാനിക്കുന്നു
Bengaluru Pay and Park System Explained Locations Charges: നഗരത്തില് പേ ആന്ഡ് പാര്ക്ക് സംവിധാനം ഏര്പ്പെടുത്താനുള്ള നീക്കത്തിലാണ് ഗ്രേറ്റര് ബെംഗളൂരു അതോറിറ്റി. ഓരോ കോര്പ്പറേഷനിലും നടപടിക്രമങ്ങള് ആരംഭിഭിച്ചതായി അധികൃതര് പറയുന്നു. എന്നാല് പദ്ധതി നടപ്പിലാക്കാന് കുറച്ചുസമയമെടുക്കുമെന്നാണ് വിവരം. മഞ്ഞ കിയോസ്ക്കുകള് ഉപയോഗിച്ച് ആളുകള്ക്ക് പാര്ക്കിങ് ടിക്കറ്റ് സ്വയം എടുക്കാവുന്നതാണ്.
ബെംഗളൂരു നഗരം
ബെംഗളൂരു: ബെംഗളൂരു നഗരത്തില് പാര്ക്കിങ് സംവിധാനത്തില് വലിയ മാറ്റങ്ങള് സംഭവിക്കാന് പോകുന്നു. കാര്യക്ഷമമായ പാര്ക്കിങ് സംവിധാനമില്ലാത്തത് നഗരവാസികളെ വല്ലാതെ വലച്ചിരുന്നു. തെരുവോരങ്ങളില് അലക്ഷ്യമായി വാഹനങ്ങള് പാര്ക്ക് ചെയ്യുന്നത് ഗതാഗത തടസമുണ്ടാക്കുന്നതും പതിവാണ്. ഇതെല്ലാം പരിഹരിക്കാനായി പുത്തന് സംവിധാനങ്ങള്ക്ക് തുടക്കം കുറിക്കാനുള്ള നീക്കത്തിലാണ് അധികൃതര്.
നഗരത്തില് പേ ആന്ഡ് പാര്ക്ക് സംവിധാനം ഏര്പ്പെടുത്താനുള്ള നീക്കത്തിലാണ് ഗ്രേറ്റര് ബെംഗളൂരു അതോറിറ്റി. ഓരോ കോര്പ്പറേഷനിലും നടപടിക്രമങ്ങള് ആരംഭിഭിച്ചതായി അധികൃതര് പറയുന്നു. എന്നാല് പദ്ധതി നടപ്പിലാക്കാന് കുറച്ചുസമയമെടുക്കുമെന്നാണ് വിവരം.
ഇവിടങ്ങളില് നേരത്തെ തുടങ്ങി
പഴയ ബ്രുഹത് ബെംഗളൂരു മഹാനഗര പാലികെ (ബിബിഎംപി) സെന്ട്രല് ബെംഗളൂരു ജില്ലയിലെ (സിബിഡി) എംജി റോഡ്, സെന്റ് മാര്ക്ക്സ് റോഡ്, മ്യൂസിയം റോഡ്, തുടങ്ങി 10 സ്ഥലങ്ങളില് സ്മാര്ട്ട് പാര്ക്കിങ് സംവിധാനം 2020ല് അവതരിപ്പിച്ചിരുന്നു.
പുതിയ സംവിധാനം വരുന്നതോടെ ഫുട്പാത്തുകളില് സ്ഥാപിച്ചിട്ടുള്ള മഞ്ഞ കിയോസ്ക്കുകള് ഉപയോഗിച്ച് ആളുകള്ക്ക് പാര്ക്കിങ് ടിക്കറ്റ് സ്വയം എടുക്കാവുന്നതാണ്. പാര്ക്കിങ് സ്ഥലങ്ങള് കണ്ടെത്തുന്നതിനും അതിലൂടെ പണമടയ്ക്കുന്നതിനുമായി നമ്മ ബെംഗളൂരു സ്മാര്ട്ട് പാര്ക്കിങ് എന്ന പേരില് പുതിയ ആപ്പും പുറത്തിറക്കുന്നുണ്ട്.
എംജി റോഡില് പേ ആന്ഡ് പാര്ക്ക് സംവിധാനം തിരിച്ചെത്തി. മായോ ഹാള് മുതല് എല്ഐസി കെട്ടിടം വരെയുള്ള റോഡരികുകള് പാര്ക്കിങ്ങിനായി 2025 മുതല് ഉപയോഗിച്ചുവരുന്നുണ്ട്. ഏകദേശം 30 രൂപ മുതല് ഇവിടെ പാര്ക്കിങ് ഫീസ് ഈടാക്കുന്നു.
