ബെംഗളൂരുവിലെ ഗതാഗതക്കുരുക്ക് കുറയ്ക്കാന്‍ സ്‌കൂള്‍ സമയം മാറ്റും; തീരുമാനം ഉടനെത്തും

പ്രതീകാത്മക ചിത്രം

ബെംഗളൂരുവിലെ രൂക്ഷമായ ഗതാഗതക്കുരുക്കിന് പരിഹാരം കാണാനുള്ള ശ്രമങ്ങളുടെ ഭാഗമായി സ്‌കൂളുകളുടെ പ്രവര്‍ത്തനസമയം മാറ്റിയേക്കും. സമയം മാറ്റുന്ന കാര്യം കര്‍ണാടക സര്‍ക്കാര്‍ പരിഗണിക്കുന്നതായി വിവരം. രാവിലെ ഓഫീസുകളിലേക്കുള്ളവരും വിദ്യാര്‍ഥികളെ സ്‌കൂളിലെത്തിക്കുന്ന വാഹനങ്ങളും ഒരേസമയം നിരത്തിലിറങ്ങുന്നത് നഗരത്തിലെ പ്രധാന റോഡുകളില്‍ വലിയ ഗതാഗതക്കുരുക്കിന് കാരണമാകുന്ന സാഹചര്യത്തിലാണ് പുതിയ നിര്‍ദേശം.

സ്‌കൂള്‍ സമയം മാറുമോ?

സ്‌കൂള്‍ സമയത്തില്‍ 30 മിനിറ്റ് മുതല്‍ ഒരു മണിക്കൂര്‍ വരെ മാറ്റം വരുത്തുന്നതിനെക്കുറിച്ചാണ് സര്‍ക്കാര്‍ ആലോചിക്കുന്നത്. ഓഫീസ് സമയവും സ്‌കൂള്‍ സമയവും ഒരുപോലെ വരുന്നത് ഇല്ലാതാക്കുകയാണ് ലക്ഷ്യം. രാവിലെയും വൈകുന്നേരവും ഏറ്റവും കൂടുതല്‍ വാഹനങ്ങള്‍ നിരത്തിലിറങ്ങുന്ന സമയത്ത് റോഡുകളിലെ തിരക്ക് കുറയ്ക്കാന്‍ സമയക്രമത്തിലെ ചെറിയ മാറ്റം സഹായിക്കുമെന്നാണ് അധികൃതരുടെ വിലയിരുത്തല്‍.

എന്നാല്‍ സ്‌കൂളുകളുടെ സമയം ഉടന്‍ മാറ്റാനുള്ള തീരുമാനം സര്‍ക്കാര്‍ എടുത്തിട്ടില്ല. വിഷയത്തില്‍ ബന്ധപ്പെട്ട എല്ലാവരുടെയും അഭിപ്രായം തേടിയ ശേഷമായിരിക്കും അന്തിമ തീരുമാനം. കര്‍ണാടക സ്‌കൂള്‍ വിദ്യാഭ്യാസ-സാക്ഷരതാ മന്ത്രി മധു ബംഗാരപ്പയുടെ നേതൃത്വത്തില്‍ ബെംഗളൂരു ട്രാഫിക് പൊലീസ്, സ്വകാര്യ സ്‌കൂള്‍ മാനേജ്‌മെന്റുകള്‍, രക്ഷിതാക്കള്‍, സ്‌കൂള്‍ വാഹന ഉടമകളുടെയും ഡ്രൈവര്‍മാരുടെയും സംഘടനകള്‍, ബന്ധപ്പെട്ട സര്‍ക്കാര്‍ വകുപ്പുകള്‍ എന്നിവരുമായി ചര്‍ച്ച നടത്താനാണ് നീക്കം.

വിദ്യാര്‍ഥികളുടെ യാത്രാസുരക്ഷയും പരിഗണിച്ചുകൊണ്ടായിരിക്കും സമയക്രമത്തില്‍ മാറ്റം വരുത്തുക. സ്‌കൂള്‍ വാഹനങ്ങള്‍ തിരക്കേറിയ ഓഫീസ് സമയത്ത് റോഡിലിറങ്ങേണ്ട സാഹചര്യം ഒഴിവാക്കാന്‍ കഴിഞ്ഞാല്‍ ഗതാഗത സമ്മര്‍ദം കുറയ്ക്കുന്നതിനൊപ്പം കുട്ടികളുടെ യാത്ര കൂടുതല്‍ സുരക്ഷിതമാക്കാനും സാധിക്കുമെന്നാണ് സര്‍ക്കാരിന്റെ പ്രതീക്ഷ.

Also Read: ബെംഗളൂരു എയര്‍പോര്‍ട്ട് റോഡില്‍ അണ്ടര്‍പാസ് നിര്‍മാണം; സദഹള്ളിയില്‍ ഗതാഗത നിയന്ത്രണം

ആവശ്യം നേരത്തെയും ശക്തം

ബെംഗളൂരുവിലെ ഗതാഗതപ്രശ്‌നം പരിഹരിക്കുന്നതിന് സ്‌കൂള്‍ സമയക്രമം പുനഃക്രമീകരിക്കണമെന്ന ആവശ്യം നേരത്തെയും ഉയര്‍ന്നിരുന്നു. കര്‍ണാടക ഹൈക്കോടതിയും നഗരത്തിലെ ഗതാഗതക്കുരുക്ക് കുറയ്ക്കുന്നതിനായി സ്‌കൂള്‍, ഓഫീസ് സമയങ്ങളില്‍ ആവശ്യമായ മാറ്റങ്ങള്‍ പരിഗണിക്കണമെന്ന് സര്‍ക്കാരിനോട് നിര്‍ദേശിച്ചിരുന്നു. ഇതോടെയാണ് ചര്‍ച്ചകള്‍ വീണ്ടും സജീവമായത്.

അതേസമയം, സ്‌കൂള്‍ സമയം മാറ്റുന്നതിന് പുറമെ നഗരത്തിലെ ഗതാഗതക്കുരുക്ക് കുറയ്ക്കാന്‍ അടിസ്ഥാന സൗകര്യ വികസന പദ്ധതികളും സര്‍ക്കാര്‍ പരിഗണിക്കുന്നുണ്ട്. ഹെബ്ബാള്‍ മുതല്‍ സില്‍ക്ക് ബോര്‍ഡ് ജംഗ്ഷന്‍ വരെ ഏകദേശം 17 കിലോമീറ്റര്‍ നീളത്തില്‍ ഭൂഗര്‍ഭ പാതാ ശൃംഖല ഒരുക്കാനാണ് നീക്കം. നഗരത്തിലെ ഉപരിതല റോഡുകളിലെ വാഹനത്തിരക്ക് കുറയ്ക്കുകയും പ്രധാന മേഖലകള്‍ക്കിടയിലെ യാത്ര സുഗമമാക്കുകയും ചെയ്യുകയാണ് ഇത്തരം പദ്ധതികളിലൂടെ സര്‍ക്കാര്‍ ലക്ഷ്യമിടുന്നത്.

English Summary

Karnataka is considering changes to school timings to reduce Bengaluru’s traffic congestion. The proposal aims to ease rush-hour traffic by avoiding peak travel times.