India vs Pakistan Conflict: ഇന്ത്യ ദൗത്യം നടപ്പാക്കിയത് എങ്ങനെ? മണിക്കൂറുകള്‍ക്കുള്ളില്‍ എല്ലാമറിയാം; നിര്‍ണായക വാര്‍ത്താസമ്മേളനം രാവിലെ തന്നെ
India vs Pakistan Conflict updates: ലാഹോര്‍, സിയാല്‍കോട്ട്, കറാച്ചി തുറമുഖം എന്നിവിടങ്ങളില്‍ ആക്രമണം നടന്നെന്നാണ് റിപ്പോര്ട്ട്. നാവികസേനയാണ് കറാച്ചിയിലെ ദൗത്യം നടപ്പാക്കിയത്. എന്നാല്‍ ഇതുസംബന്ധിച്ച് ഔദ്യോഗികമായ വിശദീകരണങ്ങള്‍ ഇതുവരെ പുറത്തുവന്നിട്ടില്ല
പാകിസ്ഥാനെതിരെ ഇന്ത്യ നടത്തിയ പ്രത്യാക്രമണങ്ങളെക്കുറിച്ച് കേന്ദ്രം ഇന്ന് വിശദീകരിച്ചേക്കും. ‘ഓപ്പറേഷന്‍ സിന്ദൂറി’ന് പിന്നാലെ വിദേശകാര്യ വകുപ്പ് സെക്രട്ടറി വിക്രം മിസ്രി, കേണല്‍ സോഫിയ ഖുറേഷി, വിങ് കമാന്‍ഡര്‍ വ്യോമിക സിങ് എന്നിവര്‍ ദൗത്യത്തെ സംബന്ധിച്ച് വിശദീകരിച്ചിരുന്നു. സമാനമായ രീതിയില്‍ ഇന്ത്യ വ്യാഴാഴ്ച പാകിസ്ഥാനില്‍ നടത്തിയ പ്രത്യാക്രമണത്തെക്കുറിച്ച് വിശദീകരിക്കുമെന്നാണ് റിപ്പോര്ട്ട്. രാവിലെ 10നകം വാര്‍ത്താ സമ്മേളനം തുടങ്ങുമെന്ന് റിപ്പോര്‍ട്ടുകളുണ്ട്.
ഇന്നലെ രാത്രിയോടെയാണ് പാകിസ്ഥാന് ഇന്ത്യയില്‍ ആക്രമണം നടത്താന്‍ തുനിഞ്ഞിറങ്ങിയത്. ജമ്മു, പത്താന്‍കോട്ട്, ഉധംപൂര്‍ എന്നിവിടങ്ങളിലെ സൈനിക കേന്ദ്രങ്ങള്‍ ഡ്രോണ്‍, മിസൈല്‍, യുദ്ധവിമാനങ്ങള്‍ എന്നിവ ഉപയോഗിച്ച് ആക്രമിക്കുയായിരുന്നു ലക്ഷ്യം. എന്നാല്‍ ഇന്ത്യയുടെ കരുത്തിന് മുന്നില്‍ പാകിസ്ഥാന് അടിപതറി. നാല് പോര്‍വിമാനങ്ങള്‍ ഇന്ത്യ വെടിവച്ചിട്ടതായും, രണ്ട് പാക് പൈലറ്റുമാരെ കസ്റ്റഡിയിലെടുത്തതായും റിപ്പോര്‍ട്ടുണ്ട്.
ഇതിന് പിന്നാലെ ഇന്ത്യ ശക്തമായ പ്രത്യാക്രമണം തുടങ്ങി. ലാഹോര്‍, സിയാല്‍കോട്ട്, കറാച്ചി തുറമുഖം എന്നിവിടങ്ങളില്‍ ആക്രമണം നടന്നെന്നാണ് റിപ്പോര്ട്ട്. നാവികസേനയാണ് കറാച്ചിയിലെ ദൗത്യം നടപ്പാക്കിയത്. എന്നാല്‍ ഇതുസംബന്ധിച്ച് ഔദ്യോഗികമായ വിശദീകരണങ്ങള്‍ ഇതുവരെ പുറത്തുവന്നിട്ടില്ല. വാര്‍ത്താസമ്മേളനത്തില്‍ ഔദ്യോഗികമായ വെളിപ്പെടുത്തലുകള്‍ പ്രതീക്ഷിക്കാം.
അതേസമയം, പൂഞ്ചില്‍ പാകിസ്ഥാന്റെ കനത്ത ഷെല്ലാക്രമണം തുടരുന്നുവെന്നാണ് റിപ്പോര്ട്ട്. ഇതിനിടെ സാംബ ജില്ലയില്‍ നുഴഞ്ഞുകയറ്റ ശ്രമം ബിഎസ്എഫ് പരാജയപ്പെടുത്തി.
