ടിക്കറ്റ് നിരക്കുകൾ വർധിപ്പിച്ച് ഇൻഡിഗോ; പുതുക്കിയ നിരക്കുകൾ ഒക്ടോബർ 6 മുതൽ
IndiGo Increases Fuel Surcharge Due to Rising ATF Costs: തുടർച്ചയായി വിമാന ഇന്ധന വിലയിൽ ഉണ്ടാകുന്ന വലിയ വർധനവാണ് ഈ തീരുമാനത്തിന് പിന്നിലെ പ്രധാന കാരണം. കഴിഞ്ഞ മാസങ്ങളെ അപേക്ഷിച്ച് ഇന്ധന വിലയിൽ 14 ശതമാനത്തിലധികം വർധനവാണ് അടുത്തിടെ രേഖപ്പെടുത്തിയിരിക്കുന്നത്. കഴിഞ്ഞ ഒരു പതിറ്റാണ്ടിനിടയിലെ ഏറ്റവും ഉയർന്ന നിരക്കിലാണ് വിമാന ഇന്ധന വില ഇപ്പോൾ എത്തിനിൽക്കുന്നത് എന്ന് ഇൻഡിഗോ ഔദ്യോഗിക പ്രസ്താവനയിൽ ചൂണ്ടിക്കാട്ടി
Indigo
ന്യൂഡൽഹി: രാജ്യത്തെ ഏറ്റവും വലിയ വിമാനക്കമ്പനിയായ ഇൻഡിഗോ തങ്ങളുടെ യാത്രാ നിരക്കുകൾ വർധിപ്പിച്ചു. വിമാന ഇന്ധന വിലയിലുണ്ടായ വലിയ വർധനവാണ് ടിക്കറ്റ് നിരക്ക് കൂട്ടാൻ കമ്പനിയെ നിർബന്ധിതരാക്കിയത്. ആഭ്യന്തര വിമാന സർവീസുകൾക്കും അന്താരാഷ്ട്ര വിമാന സർവീസുകൾക്കും ഈ നിരക്ക് വർധനവ് ഒരേപോലെ ബാധകമായിരിക്കും എന്ന് കമ്പനി തിങ്കളാഴ്ച പുറത്തിറക്കിയ വാർത്താക്കുറിപ്പിൽ വ്യക്തമാക്കിയിട്ടുണ്ട്. വിമാന യാത്രക്കാർക്ക് വലിയ തിരിച്ചടിയാണ് ഇൻഡിഗോയുടെ ഈ പുതിയ തീരുമാനം.
പുതുക്കിയ യാത്രാ നിരക്കുകൾ ഒക്ടോബർ 6 മുതൽ പ്രാബല്യത്തിൽ വരും. ഇന്ധന സർച്ചാർജ് എന്ന പേരിലാണ് കമ്പനി ഈ അധിക തുക ഈടാക്കുന്നത്. യാത്ര ചെയ്യുന്ന ദൂരത്തിന് അനുസരിച്ച് ഈ തുകയിൽ മാറ്റം വരും. ആഭ്യന്തര വിമാന യാത്രക്കാർക്ക് ദൂരത്തിനനുസരിച്ച് 100 രൂപ മുതൽ 350 രൂപ വരെയാണ് ഒരു ടിക്കറ്റിൽ അധികമായി നൽകേണ്ടി വരുന്നത്. സമാനമായ രീതിയിൽ തന്നെ അന്താരാഷ്ട്ര വിമാന സർവീസുകൾക്കും ഇന്ധന സർച്ചാർജ് വർധിപ്പിച്ചിട്ടുണ്ട്. ഇത് വരും ദിവസങ്ങളിൽ വിമാന ടിക്കറ്റ് നിരക്കുകൾ കുത്തനെ ഉയരാൻ കാരണമാകും.
Also Read: Namma Metro: ബെംഗളൂരുവിൽ ഇനി മെട്രോയും സബർബൻ റെയിലും ഒരേ പാതയിൽ
തുടർച്ചയായി വിമാന ഇന്ധന വിലയിൽ ഉണ്ടാകുന്ന വലിയ വർധനവാണ് ഈ തീരുമാനത്തിന് പിന്നിലെ പ്രധാന കാരണം. കഴിഞ്ഞ മാസങ്ങളെ അപേക്ഷിച്ച് ഇന്ധന വിലയിൽ 14 ശതമാനത്തിലധികം വർധനവാണ് അടുത്തിടെ രേഖപ്പെടുത്തിയിരിക്കുന്നത്. കഴിഞ്ഞ ഒരു പതിറ്റാണ്ടിനിടയിലെ ഏറ്റവും ഉയർന്ന നിരക്കിലാണ് വിമാന ഇന്ധന വില ഇപ്പോൾ എത്തിനിൽക്കുന്നത് എന്ന് ഇൻഡിഗോ ഔദ്യോഗിക പ്രസ്താവനയിൽ ചൂണ്ടിക്കാട്ടി.
ഏതൊരു വിമാനക്കമ്പനിയുടെയും പ്രവർത്തനച്ചെലവിൻ്റെ സിംഹഭാഗവും ഇന്ധനത്തിനാണ് ചിലവാകുന്നത്. ഇന്ധന വില ഇത്തരത്തിൽ കുതിച്ചുയരുന്നത് വിമാനക്കമ്പനികളുടെ സാമ്പത്തിക ഘടനയെയും പ്രവർത്തനങ്ങളെയും വളരെ പ്രതികൂലമായി ബാധിക്കും. അതിനാൽ തന്നെ ഇൻഡിഗോയുടെ സാമ്പത്തിക നിലയെയും ഈ വിലക്കയറ്റം വലിയ രീതിയിൽ സ്വാധീനിക്കുന്നുണ്ട്. ഈ പ്രതിസന്ധി മറികടക്കുന്നതിനും, കമ്പനിയുടെ ദൈനംദിന പ്രവർത്തനങ്ങൾ സാമ്പത്തിക ബാധ്യതകളില്ലാതെ സുഗമമായി മുന്നോട്ട് കൊണ്ടുപോകുന്നതിനുമാണ് ആഭ്യന്തര, അന്താരാഷ്ട്ര സർവീസുകളിലെ ടിക്കറ്റുകളിൽ ഇന്ധന സർച്ചാർജ് നേരിയ തോതിൽ വർധിപ്പിക്കാൻ തീരുമാനിച്ചതെന്ന് കമ്പനി അറിയിച്ചു.
English Summary
IndiGo has announced a hike in fuel surcharges for domestic and international flights by Rs 100 to Rs 350, effective October 6, due to a massive surge in aviation fuel prices.
