PM Modi: ജനാധിപത്യം പരിണാമത്തിന്റെ പാതയില്; നെഹ്റുവിനെ മറികടന്ന മോദിയെ പ്രശംസിച്ച് ദേവഗൗഡ
Deve Gowda Praises Modi for Surpassing Nehru’s Milestone in Indian Politics: സ്വാതന്ത്ര്യാനന്തര കാലഘട്ടത്തില് നെഹ്റു രാജ്യത്തിന്റെ ആദ്യ പ്രധാനമന്ത്രിയായി തിരഞ്ഞെടുക്കപ്പെട്ടത് പ്രത്യേക സാഹചര്യത്തെ തുടര്ന്നാണ്. അന്നത്തെ രാഷ്ട്രീയ സാഹചര്യവും ഇന്നത്തെ ഇന്ത്യയും തമ്മില് വലിയ വ്യത്യാസമുണ്ടെന്നും അദ്ദേഹം.
ദേവഗൗഡ, മോദി
ബെംഗളൂരു: പ്രധാനമന്ത്രി നരേന്ദ്ര മോദിയെ പ്രശംസിച്ച് മുന് പ്രധാനമന്ത്രി എച്ച്ഡി ദേവഗൗഡ. രാജ്യത്തിന്റെ ആദ്യ പ്രധാനമന്ത്രിയായ ജവഹര്ലാല് നെഹ്റുവിന്റെ പേരിലുണ്ടായിരുന്ന റെക്കോഡ് മറികടന്ന മോദി ഇന്ത്യന് ജനാധിപത്യത്തെ പരിണാമത്തിലേക്ക് നയിക്കുകയാണെന്നാണ് അദ്ദേഹത്തിന്റെ അഭിപ്രായം. ഏറ്റവും കൂടുതല് കാലം പ്രധാനമന്ത്രിയായി ഇരുന്നു എന്ന റെക്കോഡാണ് മോദി സ്വന്തമാക്കിയിരിക്കുന്നത്. ഇത് ഇന്ത്യന് ജനാധിപത്യത്തിന്റെ കരുത്തിനെയും വളര്ച്ചയെയും പ്രതിഫലിപ്പിക്കുന്നുവെന്നും ദേവഗൗഡ അഭിപ്രായപ്പെട്ടു.
സ്വാതന്ത്ര്യാനന്തര കാലഘട്ടത്തില് നെഹ്റു രാജ്യത്തിന്റെ ആദ്യ പ്രധാനമന്ത്രിയായി തിരഞ്ഞെടുക്കപ്പെട്ടത് പ്രത്യേക സാഹചര്യത്തെ തുടര്ന്നാണ്. അന്നത്തെ രാഷ്ട്രീയ സാഹചര്യവും ഇന്നത്തെ ഇന്ത്യയും തമ്മില് വലിയ വ്യത്യാസമുണ്ടെന്നും അദ്ദേഹം.
1952ലെ ആദ്യ പൊതുതെരഞ്ഞെടുപ്പില് പരിമിതമായ രാഷ്ട്രീയ മത്സരമാണ് ഉണ്ടായിരുന്നതെങ്കില്, ഇന്നത്തെ ഇന്ത്യയില് ആയിരക്കണക്കിന് രാഷ്ട്രീയ പാര്ട്ടികള് സജീവമായി പ്രവര്ത്തിക്കുന്നുണ്ടെന്ന് ദേവഗൗഡ നിരീക്ഷിച്ചു. ഇന്ത്യയുടെ ജനസംഖ്യയും സാമൂഹിക വൈവിധ്യവും സാമ്പത്തിക പ്രശ്നങ്ങളും കഴിഞ്ഞ ദശകങ്ങളില് ഗണ്യമായി വര്ധിച്ചിട്ടുണ്ടെന്നും ദേവഗൗഡ കൂട്ടിച്ചേര്ത്തു.
താനും മോദിയും രാഷ്ട്രീയ പാരമ്പര്യമോ കുടുംബാധിപത്യത്തിന്റെ പിന്തുണയോ ഇല്ലാതെ ദേശീയ നേതൃത്വത്തിലേക്ക് ഉയര്ന്നവരാണ്. മോദിയുടെ ദീര്ഘകാല രാഷ്ട്രീയ സ്വാധീനവും ജനപിന്തുണയും ശ്രദ്ധേയമാണെന്നും ദേവഗൗഡ പറഞ്ഞു.
മോദിയുടെ നേതൃത്വത്തിലുള്ള കേന്ദ്ര മന്ത്രിസഭ സാമൂഹിക വൈവിധ്യത്തെ കൂടുതല് പ്രതിഫലിപ്പിക്കുന്നതാണെന്നും പിന്നാക്ക വിഭാഗങ്ങള്, പട്ടികജാതി-പട്ടികവര്ഗ വിഭാഗങ്ങള്, സ്ത്രീകള് എന്നിവരുടെ പ്രാതിനിധ്യം വര്ധിച്ചിട്ടുണ്ടെന്നും അദ്ദേഹം അഭിപ്രായപ്പെട്ടു.
ഇന്നത്തെ ഇന്ത്യ മുന്കാലത്തേക്കാള് കൂടുതല് സജീവവും ജനകീയ പങ്കാളിത്തമുള്ള ജനാധിപത്യ രാഷ്ട്രമാകുകയാണെന്ന് അദ്ദേഹം വിലയിരുത്തി. മാധ്യമങ്ങളുടെയും സാമൂഹിക മാധ്യമങ്ങളുടെയും നിരന്തര നിരീക്ഷണത്തിനിടയിലും മോദിക്ക് ജനപിന്തുണ നിലനിര്ത്താന് കഴിഞ്ഞത് ശ്രദ്ധേയമാണെന്നും ദേവഗൗഡ.
രാജ്യത്തിന്റെ താല്പര്യങ്ങള് സംരക്ഷിക്കുന്നതിലും ക്ഷേമപദ്ധതികള് നടപ്പാക്കുന്നതിലും മോദി ശക്തമായ നേതൃത്വം കാഴ്ചവെച്ചിട്ടുണ്ടെന്ന് ദേവഗൗഡ അഭിപ്രായപ്പെട്ടു. ജനങ്ങളുമായുള്ള തുടര്ച്ചയായ ഇടപെടലും ജനാധിപത്യ സംവിധാനത്തോടുള്ള പ്രതിബദ്ധതയും മോദിയുടെ രാഷ്ട്രീയ വിജയത്തിന് പ്രധാന കാരണങ്ങളാണെന്നും അദ്ദേഹം കൂട്ടിച്ചേര്ത്തു.
നെഹ്റുവിന്റെ റെക്കോഡും മോദി മറികടന്നു
തുടര്ച്ചയായി ഏറ്റവും കൂടുതല് കാലം പ്രധാനമന്ത്രി പദവി വഹിച്ച നേതാവെന്ന നേട്ടം മോദി സ്വന്തമാക്കിയിരിക്കുകയാണ്. സ്വാതന്ത്ര്യാനന്തര ഇന്ത്യയുടെ ആദ്യ പ്രധാനമന്ത്രിയായ ജവഹര്ലാല് നെഹ്റുവിന്റെ ദീര്ഘകാല റെക്കോര്ഡിനെയാണ് മോദി മറികടന്നത്. എന്നാല് ഈ നേട്ടം വെറും ദിവസങ്ങളുടെ കണക്കില് മാത്രം ഒതുങ്ങുന്നതല്ല. രണ്ട് വ്യത്യസ്ത രാഷ്ട്രീയ സാഹചര്യങ്ങളിലൂടെയാണ് ഇരുവരും രാജ്യത്തെ നയിച്ചത് എന്നതും ശ്രദ്ധേയമാണ്.
Also Read: PM Modi: നെഹ്റുവിന്റെ ഇന്ത്യയല്ല, മോഡിയുടെ ഇന്ത്യ, പുതിയ ചരിത്രമെഴുതിയ ‘പ്രധാനമന്ത്രിക്കസേര’
നെഹ്റുവിന്റെ കാലത്ത് ദേശീയ രാഷ്ട്രീയത്തില് കോണ്ഗ്രസിന്റെ ആധിപത്യം ശക്തമായിരുന്നു. രാഷ്ട്രീയ എതിരാളികള് പരിമിതമായിരുന്നതിനാല് ഭരണനേതൃത്വത്തിന് മുന്നിലുള്ള വെല്ലുവിളികളും ഇന്നത്തേതില് നിന്ന് വ്യത്യസ്തമായിരുന്നു. എന്നാല് നിലവിലെ രാഷ്ട്രീയ സാഹചര്യത്തില് നിരവധി ദേശീയ-പ്രാദേശിക പാര്ട്ടികള് ശക്തമായ സാന്നിധ്യമാണ് പുലര്ത്തുന്നതിനാല് തന്നെ മോദിയുടെ നേട്ടം വലിയ അംഗീകാരമായി കണക്കാം.
കടുത്ത രാഷ്ട്രീയ മത്സരവും സഖ്യരാഷ്ട്രീയവും നിറഞ്ഞ കാലഘട്ടത്തിലാണ് മോദി തുടര്ച്ചയായി മൂന്ന് തവണ അധികാരത്തിലെത്തിയത്. ഡിജിറ്റല് മാധ്യമങ്ങളുടെയും സാമൂഹിക മാധ്യമങ്ങളുടെയും നിരന്തര നിരീക്ഷണത്തിനിടയിലും ജനപിന്തുണ നിലനിര്ത്താന് അദ്ദേഹത്തിന് സാധിച്ചുവെന്നതാണ് രാഷ്ട്രീയ നിരീക്ഷകര് എടുത്തുപറയുന്നത്.
ആഗോള തലത്തിലും ഇന്ത്യയുടെ സ്വാധീനം വര്ധിപ്പിക്കാന് മോദി സര്ക്കാരിന് കഴിഞ്ഞുവെന്നാണ് പൊതുവേയുള്ള വിലയിരുത്തല്. വിവിധ രാജ്യങ്ങളുമായുള്ള ബന്ധം ശക്തിപ്പെടുത്തുകയും ഇന്ത്യയെ ആഗോള ചര്ച്ചകളിലെ പ്രധാന പങ്കാളിയാക്കുകയും ചെയ്തതായും സര്ക്കാര് അവകാശപ്പെടുന്നു.
English Summary
Former Prime Minister H. D. Deve Gowda praised Prime Minister Narendra Modi, stating that surpassing Jawaharlal Nehru’s record is a reflection of the evolution and strength of Indian democracy. The remarks have drawn attention in national political circles.
