ബ്രിക്സ് ഉച്ചകോടി: റഷ്യൻ പ്രസിഡൻ്റ് വ്ലഡിമിർ പുടിൻ ഡൽഹിയിലെത്തി

പ്രധാനമന്ത്രി നരേന്ദ്ര മോദിയും റഷ്യൻ പ്രസിഡൻ്റ് വ്ലാഡിമിർ പുടിനും

ന്യൂഡൽഹി: ഇന്ത്യ ആതിഥേയത്വം വഹിക്കുന്ന ബ്രിക്സ് ഉച്ചകോടിയിൽ പങ്കെടുക്കുന്നതിനായി റഷ്യൻ പ്രസിഡൻ്റ് വ്ലാഡിമിർ പുടിൻ ഡൽഹിയിലെത്തി. സന്ദർശനത്തിൻ്റെ ഭാഗമായി അദ്ദേഹം പ്രധാനമന്ത്രി നരേന്ദ്ര മോദിയുമായി ചർച്ചകൾ നടത്തും. പ്രതിരോധം, ഊർജം, സാങ്കേതികവിദ്യ എന്നീ മേഖലകളിലെ സഹകരണം കൂടുതൽ ശക്തിപ്പെടുത്തുന്നതിലാകും ഇരുവരും പ്രധാനമായും ചർച്ചകൾ നടത്തുക.

കഴിഞ്ഞ ആഴ്ച ബിഷ്കെക്കിൽ നടന്ന ഷാങ്ഹായ് കോർപ്പറേഷൻ ഓർഗനൈസേഷൻ ഉച്ചകോടിക്കിടെയാണ് മോദിയും പുടിനും അവസാനമായി കൂടിക്കാഴ്ച നടത്തിയത്. അഞ്ച് വർഷം മുൻപ് ആരംഭിച്ച റഷ്യ-ഉക്രെയ്ൻ യുദ്ധം ഇനിയും അനന്തമായി നീട്ടിക്കൊണ്ടുപോകരുതെന്നും, എത്രയും വേഗം യുദ്ധം അവസാനിപ്പിക്കണമെന്നാണ് ലോക ജനത ആഗ്രഹിക്കുന്നതെന്നും പ്രധാനമന്ത്രി മോദി റഷ്യൻ പ്രസിഡൻ്റിനെ അറിയിച്ചിരുന്നു.

വെള്ളിയാഴ്ച നടക്കുന്ന ചർച്ചകളിൽ തന്ത്രപ്രാധാനമായ പല നിർണായക വിഷയങ്ങളും കടന്നുവരും. ബ്രഹ്മോസ് മിസൈലുകളുടെ നവീകരണം, ബാക്കിയുള്ള എസ്-400 പ്രതിരോധ സംവിധാനങ്ങളുടെ കൈമാറ്റം, സുഖോയ് എസ്.യു-57 യുദ്ധവിമാനങ്ങളുടെ വിതരണം തുടങ്ങിയ കാര്യങ്ങളിൽ ഇന്ത്യയും റഷ്യയും ചർച്ചകൾ നടത്തുമെന്ന് ക്രെംലിൻ വക്താവ് ദിമിത്രി പെസ്കോവ് നേരത്തെ വ്യക്തമാക്കിയിരുന്നു. കൂടാതെ ഇന്ത്യയിൽ പുതിയ സിവിൽ ആണവ റിയാക്ടറുകൾ സ്ഥാപിക്കുന്നതിനെക്കുറിച്ചും തീരുമാനങ്ങളുണ്ടാകും.

Also Read: ഏഴു വർഷത്തെ ഇടവേളയ്ക്ക് ശേഷം ഷി ജിൻപിങ് ഇന്ത്യയിലേക്ക്; ബ്രിക്സ് ഉച്ചകോടിയിൽ പങ്കെടുക്കും

രണ്ട് ദിവസത്തെ ബ്രിക്സ് ഉച്ചകോടിയിൽ പങ്കെടുക്കുന്ന പുടിൻ, വാർഷിക ബിസിനസ്സ് ഫോറത്തിൻ്റെ പ്ലീനറി സെഷനിലും സംസാരിക്കും. തുടർന്ന് പ്രധാനമന്ത്രി നരേന്ദ്ര മോദിക്കൊപ്പം ഇന്നോപ്രോം എക്സിബിഷനും അദ്ദേഹം സന്ദർശിക്കും. ദക്ഷിണാഫ്രിക്കൻ പ്രസിഡൻ്റ് സിറിൽ റമഫോസ, മലേഷ്യൻ പ്രധാനമന്ത്രി അൻവർ ഇബ്രാഹിം, ഈജിപ്ഷ്യൻ പ്രസിഡൻ്റ് അബ്ദുൽ ഫത്താഹ് അൽ സിസി തുടങ്ങിയ ലോക നേതാക്കളുമായും അദ്ദേഹം കൂടിക്കാഴ്ച നടത്തുന്നുണ്ട്. എന്നാൽ ഏഴ് വർഷത്തിന് ശേഷം ഇന്ത്യയിലെത്തുന്ന ചൈനീസ് പ്രസിഡൻ്റ് ഷി ജിൻപിങ്ങുമായി പുടിൻ പ്രത്യേകം ചർച്ചകൾ നടത്താൻ സാധ്യതയില്ലെന്നാണ് റിപ്പോർട്ടുകൾ.

അതേസമയം, ശനിയാഴ്ച വൈകുന്നേരം ഷി ജിൻപിങ്ങും പ്രധാനമന്ത്രി മോദിയും തമ്മിൽ സുപ്രധാന കൂടിക്കാഴ്ച നടക്കും. വ്യാപാര-നിക്ഷേപ വിഷയങ്ങൾക്ക് പുറമെ എൽ.എ.സിയിലെ സാഹചര്യങ്ങളും ഇരുവരും വിലയിരുത്തും. ഇറാൻ പ്രസിഡൻ്റ് മസൂദ് പെസെഷ്കിയാനുമായും മോദി വെള്ളിയാഴ്ച ചർച്ചകൾ നടത്തുന്നുണ്ട്. നിലവിൽ ബ്രിക്സ് അധ്യക്ഷ പദവി വഹിക്കുന്നത് ഇന്ത്യയാണ്. ‘ബിൽഡിംഗ് ഫോർ റെസിലിയൻസ്, ഇന്നൊവേഷൻ, കോ-ഓപ്പറേഷൻ ആൻഡ് സസ്റ്റെയ്നബിലിറ്റി’ എന്നതാണ് ഇത്തവണത്തെ ഉച്ചകോടിയുടെ പ്രമേയം.

English Summary

Russian President Vladimir Putin has arrived in New Delhi for the BRICS summit. He will hold strategic bilateral talks with PM Modi focusing on defence, energy, and BrahMos missile upgrades.