Rahul Mamkootathil: രാഹുൽ മാങ്കൂട്ടത്തിൽ ഇന്നലെ തിരുവനന്തപുരത്തെത്തി വക്കാലത്ത് ഒപ്പിട്ടു; മുന്കൂര് ജാമ്യാപേക്ഷ ബുധനാഴ്ച പരിഗണിക്കും
Rahul Mamkoottathil Reaches Trivandrum, Meets Lawyer; രാഹുല് മാങ്കൂട്ടത്തിലിന്റെ മുന്കൂര് ജാമ്യാപേക്ഷ ബുധനാഴ്ച പരിഗണിക്കും. തിരുവനന്തപുരം പ്രിന്സിപ്പല് ജില്ലാ സെഷന്സ് കോടതിയാണ് ഹർജി പരിഗണിക്കുന്നത്. ഇന്നലെയാണ് രാഹുലിന്റെ അഭിഭാഷകന് കോടതിയില് മുന്കൂര് ജാമ്യാപേക്ഷ സമര്പ്പിച്ചത്.
തിരുവനന്തപുരം: യുവതിയെ ബലാത്സംഗം ചെയ്തെന്ന കേസില് ഒളിവിൽ കഴിയുന്ന പാലക്കാട് എംഎല്എ രാഹുല് മാങ്കൂട്ടത്തിൽ തിരുവനന്തപുരത്തെത്തി. ഇന്നലെയാണ് രാഹുൽ തിരുവനന്തപുരം വഞ്ചിയൂരിലെ അഭിഭാഷകന്റെ ഓഫീസിലെത്തിയത്. ഇവിടെ നേരിട്ടെത്തി രാഹുൽ വക്കാലത്ത് ഒപ്പിട്ടതെന്ന് അഭിഭാഷകൻ വ്യക്തമാക്കി. മുൻകൂർ ജാമ്യ ഹർജി നൽകാനായാണ് രാഹുൽ തലസ്ഥാനത്ത് എത്തിയത്.
അതിജീവിത പരാതി നൽകിയതിനു പിന്നാലെ രാഹുൽ ഒളിവിൽ പോവുകയായിരുന്നുവെന്നായിരുന്നു വിവരം. രാഹുൽ സംസ്ഥാനം വിട്ടതായും അഭ്യൂഹം വന്നിരുന്നു. ഇതിനിടെയിലാണ് തിരുവനന്തപുരത്തെത്തിയത്. അതേസമയം രാഹുലിനെ പിടികൂടാൻ പോലീസ് അന്വേഷണം ഊർജിതമാക്കിയിരുന്നു. ഇതിന്റെ ഭാഗമായി ലുക്ക്ഔട്ട് സര്ക്കുലറും പൊലീസ് പുറത്തുവിട്ടിരുന്നു. തിരുവനന്തപുരത്ത് എത്തിയശേഷം പിന്നീട് രാഹുൽ എങ്ങോട്ട് പോയെന്നകാര്യത്തിലടക്കം വിവരമില്ല.
Also Read:രാഹുല് മാങ്കൂട്ടത്തില് പാലക്കാട് തന്നെയുണ്ട്? എംഎല്എ വാഹനം ഫ്ളാറ്റിന് മുന്നില്
രാഹുല് മാങ്കൂട്ടത്തിലിന്റെ മുന്കൂര് ജാമ്യാപേക്ഷ ബുധനാഴ്ച പരിഗണിക്കും. തിരുവനന്തപുരം പ്രിന്സിപ്പല് ജില്ലാ സെഷന്സ് കോടതിയാണ് ഹർജി പരിഗണിക്കുന്നത്. ഇന്നലെയാണ് രാഹുലിന്റെ അഭിഭാഷകന് കോടതിയില് മുന്കൂര് ജാമ്യാപേക്ഷ സമര്പ്പിച്ചത്. കോടതി ഹര്ജി പരിഗണിക്കുന്നതുവരെ രാഹുല് മാറിനില്ക്കുമെന്നാണ് സൂചന.
പരാതിക്കാരിയായ യുവതിയുമായി ദീർഘകാലമായി സൗഹൃദമുണ്ടെന്നും, സമ്മതപ്രകാരം ലൈംഗിക ബന്ധത്തില് ഏര്പ്പെട്ടിട്ടുണ്ടെന്നും മുന്കൂര് ജാമ്യാപേക്ഷയില് രാഹുല് മാങ്കൂട്ടത്തില് പറഞ്ഞു. എന്നാൽ പീഡിപ്പിച്ചുവെന്ന ആരോപണം നിഷേധിക്കുന്നുണ്ട്. ബലാത്സംഗം ചെയ്യുകയോ, ഗര്ഭച്ഛിദ്രത്തിന് നിര്ബന്ധിക്കുകയോ ചെയ്തിട്ടില്ലെന്നാണ് രാഹുല് ഹര്ജിയില് പറയുന്നത്. തന്നെ കുടുക്കാനായി യുവതി ഫോണ് സംഭാഷണം റെക്കോര്ഡ് ചെയ്തുവെന്നാണ് രാഹുല് സൂചിപ്പിക്കുന്നത്.
വിവാഹിതയാണെന്ന് അറിഞ്ഞു തന്നെയാണ് യുവതിയുമായി സൗഹൃദത്തിലായതെന്നും ലൈംഗിക ബന്ധത്തില് ഏര്പ്പെട്ടതെന്നും രാഹുല് മാങ്കൂട്ടത്തില് ജാമ്യാപേക്ഷയില് പറയുന്നു. യുവതിക്ക് ഭർത്താവിൽ നിന്ന് നേരിട്ട പീഡനങ്ങളെപറ്റി അറിഞ്ഞപ്പോള് സഹതാപം തോന്നിയെന്നും അങ്ങനെയാണ് സൗഹൃദത്തിലായതെന്നും ജാമ്യാപേക്ഷയില് വിശദീകരിക്കുന്നത്.
