KLOO App: ഇനി യാത്രക്കാർക്ക് സമാധാനിക്കാം, വൃത്തിയുള്ള ടോയ്ലറ്റുകൾ ഇനി ഒറ്റക്ലിക്കിൽ

Kloo App

തിരുവനന്തപുരം: യാത്രക്കാർ നേരിടുന്ന ഏറ്റവും വലിയ വെല്ലുവിളികളിലൊന്നായ വൃത്തിയുള്ള ശുചിമുറികളുടെ അഭാവത്തിന് പരിഹാരവുമായി സംസ്ഥാന സർക്കാർ. തദ്ദേശ സ്വയംഭരണ വകുപ്പിന്റെ ‘മാലിന്യമുക്തം നവകേരളം’ പദ്ധതിയുടെ ഭാഗമായി ശുചിത്വ മിഷൻ വികസിപ്പിച്ച ക്ലൂ മൊബൈൽ ആപ്ലിക്കേഷൻ പുറത്തിറങ്ങുന്നു.

ഔദ്യോഗിക ഉദ്ഘാടനം ഇന്ന് ഡിസംബർ 23-ന് വൈകിട്ട് നടക്കും. വട്ടിയൂർക്കാവ് എം.എൽ.എ വി.കെ. പ്രശാന്ത് അധ്യക്ഷത വഹിക്കുന്ന ചടങ്ങിൽ പ്ലാനിംഗ് ബോർഡ് അംഗം ജിജു പി അലക്‌സ് മുഖ്യാഥിതിയാകും. സ്ത്രീകൾക്കും കുട്ടികൾക്കും ദീർഘദൂര യാത്രക്കാർക്കും ഒരുപോലെ ആശ്വാസമാകുന്ന ഈ പദ്ധതി, കേരളത്തെ ആഗോളതലത്തിൽ ഒരു മികച്ച ശുചിത്വ സൗഹൃദ വിനോദസഞ്ചാര കേന്ദ്രമായി ഉയർത്താൻ സഹായിക്കുമെന്ന് അധികൃതർ അറിയിച്ചു.

Also Read:ആലപ്പുഴയിൽ വീണ്ടും പക്ഷിപ്പനി; അടിയന്തര നടപടികൾക്ക് നിർദേശം

ഡിജിറ്റൽ മാപ്പിംഗിലൂടെ യാത്രക്കാർക്ക് അവരുടെ ലൊക്കേഷന് തൊട്ടടുത്തുള്ള ശുചിമുറികൾ ഗൂഗിൾ മാപ്പിന്റെ സഹായത്തോടെ എളുപ്പത്തിൽ കണ്ടെത്താൻ സാധിക്കുമെന്നതാണ് ഈ ആപ്പിന്റെ പ്രത്യേകത. തദ്ദേശ സ്വയംഭരണ സ്ഥാപനങ്ങളുടെ കീഴിലുള്ള പൊതു ശുചിമുറികൾക്ക് പുറമെ, കേരള ഹോട്ടൽ ആൻഡ് റസ്റ്റോറന്റ് അസോസിയേഷനുമായി സഹകരിച്ച് മികച്ച നിലവാരം പുലർത്തുന്ന സ്വകാര്യ ഹോട്ടലുകളിലെയും റെസ്റ്റോറന്റുകളിലെയും ശുചിമുറികൾ കൂടി ഈ ശൃംഖലയിൽ ഉൾപ്പെടുത്തിയിട്ടുണ്ട്.

പ്രധാന സവിശേഷതകൾ

• ശുചിമുറികളുടെ പ്രവർത്തന സമയം, പാർക്കിംഗ് സൗകര്യം എന്നിവ ആപ്പിലൂടെ അറിയാം.
• ഉപയോക്താക്കളുടെ റേറ്റിംഗുകൾ നോക്കി ശുചിമുറികളുടെ ഗുണനിലവാരം ഉറപ്പുവരുത്താം.
• സംസ്ഥാനത്തെ പ്രധാന വിനോദസഞ്ചാര പാതകളെയും ദേശീയ പാതകളെയും കേന്ദ്രീകരിച്ചാണ് ആദ്യഘട്ടത്തിൽ പദ്ധതി നടപ്പിലാക്കുന്നത്.
• ഫ്രൂഗൽ സയന്റിഫിക് പ്രൈവറ്റ് ലിമിറ്റഡാണ് ആപ്പിന്റെ സാങ്കേതിക പങ്കാളികൾ.