Kerala Rain Alert: പകലത്തെ ചൂട് കണ്ട് പേടിക്കേണ്ട ഇന്നും ഇനിയുള്ള ദിവസങ്ങളിലും മഴ ഉറപ്പ്
Kerala Weather update tomorrow: ചില പ്രദേശങ്ങളിൽ വൈകുന്നേരത്തോടെ ഇടിയോടുകൂടിയ ഒറ്റപ്പെട്ട മഴ ലഭിക്കാനും സാധ്യതയുണ്ടെന്ന് പ്രവചനത്തിൽ വ്യക്തമാക്കുന്നു.
തിരുവനന്തപുരം: സംസ്ഥാനത്ത് ഇന്ന് ഭാഗികമായി മേഘാവൃതമായ കാലാവസ്ഥയാണ് അനുഭവപ്പെടുന്നത്. രാവിലെ പല പ്രദേശങ്ങളിലും മൂടൽമഞ്ഞ് അനുഭവപ്പെട്ടു. പകൽ സമയത്ത് ചൂട് ക്രമാതീതമായി ഉയർന്ന് പരമാവധി താപനില 33 മുതൽ 34 ഡിഗ്രി സെൽഷ്യസ് വരെ എത്താനിടയുണ്ട്. രാത്രി സമയത്ത് താപനില 24 മുതൽ 26 ഡിഗ്രി സെൽഷ്യസ് വരെ കുറഞ്ഞേക്കും. സംസ്ഥാനത്ത് ഈർപ്പം 75 മുതൽ 90 ശതമാനം വരെ ഉയർന്ന നിലയിൽ തുടരുമെന്നതിനാൽ ഉഷ്മാവുള്ള കാലാവസ്ഥ അനുഭവപ്പെടാൻ സാധ്യതയുണ്ട്. വടക്കുകിഴക്കൻ ദിശയിൽ നിന്നുള്ള നേരിയ കാറ്റ് വീശാനാണ് സാധ്യത.
കാലാവസ്ഥാ വകുപ്പ് പുറത്തുവിട്ട റിപ്പോർട്ട് നാളെ അനുസരിച്ച് തിരുവനന്തപുരം, കൊല്ലം, പത്തനംതിട്ട, ആലപ്പുഴ കോട്ടയം, ഇടുക്കി, എറണാകുളം, തൃശ്ശൂർ ജില്ലകളിൽ നേരിയതോ ശക്തികുറഞ്ഞതോ ആയ മഴയ്ക്ക് സാധ്യത ഉണ്ട്. കൂടാതെ ലക്ഷദ്വീപിലും ഒറ്റപ്പെട്ട മഴയ്ക്ക് സാധ്യത ഉണ്ടെന്നാണ് വിവരം.
ഇന്ന് ചില ജില്ലകളിൽ പകൽ സമയത്ത് ചൂട് കൂടുതൽ അനുഭവപ്പെടാൻ സാധ്യതയുള്ളതിനാൽ ഉച്ച സമയത്ത് നേരിട്ട് വെയിലിൽ അധികസമയം ചെലവഴിക്കുന്നത് ഒഴിവാക്കാനും ആവശ്യമായത്ര വെള്ളം കുടിക്കാനും ആരോഗ്യ വിദഗ്ധർ നിർദേശിക്കുന്നു.
കനത്ത ചൂടിനിടയിൽ ആശ്വാസ മഴ
കനത്ത ചൂടിനിടയിൽ സംസ്ഥാനത്ത് കഴിഞ്ഞ ദിവസം ചില ജില്ലകളിൽ വേനൽമഴ ലഭിച്ചു. രാത്രിയോടെ മഴ എത്തുമെന്ന് റിപ്പോർട്ട് ഉണ്ടായിരുന്നു. തെക്കൻ കേരളത്തിലെ ചില പ്രദേശങ്ങളിൽ ശ്രദ്ധേയമായ മഴയാണ് ലഭിച്ചത്. പത്തനംതിട്ട ജില്ലയിലെ കോന്നി, കുറുടമണ്ണിൽ എന്നിവിടങ്ങളിൽ ഏകദേശം 7 സെ.മീ വരെ മഴ ലഭിച്ചതായാണ് റിപ്പോർട്ട്.
ALSO READ: കേരളത്തിന്റെ പാലിയേറ്റീവ് കെയർ മാതൃക ഏറ്റെടുത്ത് കർണാടക; അഭിമാനകരമെന്ന് മന്ത്രി വീണ ജോർജ്
തിരുവനന്തപുരം വിമാനത്താവള പ്രദേശത്ത് ഏകദേശം 6 സെ.മീ മഴയും ലഭിച്ചു. നെയ്യാറ്റിൻകര, ചേർത്തല, തുടങ്ങിയ സ്ഥലങ്ങളിലും 4 സെ.മീ വരെ മഴ രേഖപ്പെടുത്തി. കൊല്ലം കരുനാഗപ്പള്ളിയിലും രാത്രിയോടെ ശക്തമായ മഴ പെയ്തു.
ഇടിമിന്നൽ ജാഗ്രത
ചില പ്രദേശങ്ങളിൽ വൈകുന്നേരത്തോടെ ഇടിയോടുകൂടിയ ഒറ്റപ്പെട്ട മഴ ലഭിക്കാനും സാധ്യതയുണ്ടെന്ന് പ്രവചനത്തിൽ വ്യക്തമാക്കുന്നു. ഇടിമിന്നൽ ജാഗ്രത പാലിക്കേണ്ടതുണ്ട്. ഇടിമിന്നൽ ട്രാക്ക് ചെയ്യാനുള്ള മാപ്പ് https://metbeatnews.com/page/lightning-strike-map സന്ദർശിച്ച് ഇടിമിന്നൽ ഭീഷണി മുൻകൂട്ടി മനസ്സിലാക്കാം. ഇത് നിങ്ങളുടെ അടുത്തുള്ള ഇടിമിന്നൽ തത്സമയം നിരീക്ഷിക്കാനും ഇടിമിന്നലിന്റെ സഞ്ചാരദിശ അറിയാനും സഹായിക്കും.
