Health Tips: ചെവിയിൽ എപ്പോഴും ‘മൂളിച്ച’ കേൾക്കുന്നുണ്ടോ? നിസ്സാരമായി കാണരുത്, കാരണങ്ങൾ

Ear Health

പലരും ഒരിക്കലെങ്കിലും അനുഭവിച്ചിട്ടുള്ള ഒന്നാണ് ചെവിക്കുള്ളിലെ വിചിത്രമായ ശബ്ദങ്ങൾ. ചിലപ്പോൾ അത് വണ്ടിൻ്റെ മൂളൽ പോലെ ആയിരിക്കാം, അല്ലെങ്കിൽ വിസിൽ അടിക്കുന്നത് പോലെയോ കാറ്റ് ചീറ്റുന്നത് പോലെയോ ഉള്ള ശബ്ദമാകാം. പുറത്തുനിന്നുള്ള ശബ്ദങ്ങളില്ലാതെ തന്നെ നിങ്ങളുടെ ഉള്ളിൽ മാത്രം ഇത്തരത്തിൽ ശബ്ദം കേൾക്കുന്ന അവസ്ഥയെ വൈദ്യശാസ്ത്രം ‘ടിന്നിറ്റസ്’ (Tinnitus) എന്നാണ് വിളിക്കുന്നത്. ഇതൊരു രോഗമല്ല, മറിച്ച് നിങ്ങളുടെ ആരോഗ്യത്തെ ബാധിക്കുന്ന മറ്റ് ചില പ്രശ്നങ്ങളുടെ സൂചനയാണ്. ഇതിനെ എപ്പോഴാണ് ഗൗരവമായി കാണേണ്ടത്? ഡോക്ടർമാർ വിശദീകരിക്കുന്നത് നോക്കാം.

എന്താണ് ടിന്നിറ്റസ്?

ചെവിക്കുള്ളിലോ തലയ്ക്കുള്ളിലോ ഒന്നോ അതിലധികമോ ശബ്ദങ്ങൾ തുടർച്ചയായോ ഇടവിട്ടോ കേൾക്കുന്ന അവസ്ഥയാണ് ടിന്നിറ്റസ്. ഇത് നിങ്ങളുടെ ഉറക്കത്തെയും ജോലിയെയും മാനസികാവസ്ഥയെയും വരെ ബാധിച്ചേക്കാം. ശരീരത്തിലുണ്ടാകുന്ന ചില മാറ്റങ്ങളുടെ സൂചനയായാണ് ഇത്തരം ശബ്ദങ്ങൾ ചെവിക്കുള്ളിൽ നിന്ന് ഉണ്ടാകുന്നത്.

ALSO READ: ചൂടുകാലത്ത് മുടിക്കൊഴിച്ചിൽ കൂടുന്നോ? പരിഹാരം ഉണ്ട്!

പ്രധാന കാരണങ്ങൾ

അമിതമായ ശബ്ദം: തുടർച്ചയായി ഹെഡ്‌ഫോൺ ഉപയോഗിക്കുന്നത്, ഫാക്ടറികളിലെ വലിയ ശബ്ദം, വെടിമരുന്ന് ശബ്ദം എന്നിവ കേൾവിശക്തിയെ ബാധിക്കുകയും ടിന്നിറ്റസിന് കാരണമാവുകയും ചെയ്യും.

ചെവിയിലെ അഴുക്ക്: ചെവിയിൽ അഴുക്ക് അടിഞ്ഞുകൂടുന്നത് മൂലം കർണ്ണപടത്തിന് സമ്മർദ്ദം ഉണ്ടാവുകയും ഇത്തരം ശബ്ദങ്ങൾ കേൾക്കുകയും ചെയ്യാം.

പ്രായം: പ്രായമേറുന്തോറും ആന്തരിക കർണ്ണത്തിലെ കോശങ്ങൾക്ക് സംഭവിക്കുന്ന തേയ്മാനം ടിന്നിറ്റസിലേക്ക് നയിക്കാൻ സാധ്യതയുണ്ട്.

രക്തസമ്മർദ്ദം: ഉയർന്ന രക്തസമ്മർദ്ദമുള്ളവരിലോ രക്തക്കുഴലുകളിൽ തടസ്സമുള്ളവരിലോ ചെവിയിൽ ‘ഹൃദയമിടിപ്പ്’ പോലെ ശബ്ദം കേൾക്കാറുണ്ട്.

മാനസിക സമ്മർദ്ദം: അമിതമായ സ്ട്രെസ്, ഉത്കണ്ഠ എന്നിവ ടിന്നിറ്റസ് വർദ്ധിപ്പിക്കുന്ന പ്രധാന ഘടകങ്ങളാണ്.

എപ്പോൾ ഡോക്ടറെ കാണണം?

ഇനി പറയാൻ പോകുന്ന ലക്ഷണങ്ങൾ നിങ്ങൾക്കുണ്ടെങ്കിൽ ഉടൻ തന്നെ വൈദ്യസഹായം തേടേണ്ടതാണ്.

ഒരു ചെവിയിൽ മാത്രം ശബ്ദം

കേൾവിശക്തി പെട്ടെന്ന് കുറയുന്നു

ശബ്ദത്തിനൊപ്പം തലകറക്കം

ചെവിയിൽ നിന്ന് പഴുപ്പോ മറ്റ് ദ്രാവകങ്ങളോ വരുന്നു

എങ്ങനെ ഇത് ഒഴിവാക്കാം?

നിങ്ങളിൽ ഇത്തരം അസ്വസ്ഥത അനുഭവപ്പെടുകയാണെങ്കിൽ നിശ്ചിത സമയത്തിൽ കൂടുതൽ ഹെഡ്‌ഫോണുകൾ ഉപയോഗിക്കരുത്, ശബ്ദം പരിധിയിൽ താഴെ നിലനിർത്തുക. കൂടാതെ സ്വയം ബഡ്‌സ് ഉപയോഗിച്ച് ചെവി വൃത്തിയാക്കാൻ ശ്രമിക്കരുത്. ഇത് അഴുക്ക് ഉള്ളിലേക്ക് തള്ളാൻ മാത്രമേ സഹായിക്കൂ. അതുപോലെ തന്നെ കൃത്യമായ വ്യായാമം രക്തചംക്രമണം വർദ്ധിപ്പിക്കുകയും ഇത്തരം പ്രശ്നങ്ങൾ കുറയ്ക്കുകയും ചെയ്യും. ചെവിയിലെ മുഴക്കം ഭൂരിഭാഗം പേരിലും താൽക്കാലികമാണ്. എങ്കിലും, അത് നിങ്ങളുടെ ദൈനംദിന ജീവിതത്തെ ബാധിക്കുന്നുണ്ടെങ്കിൽ സ്വയം ചികിത്സ ഒഴിവാക്കി ഒരു വിദഗ്ധ ഡോക്ടറുടെ നിർദ്ദേശം തേടുക.