Health tips : നെയിൽ ആർട്ടും ജെൽ പോളീഷും, രോ​ഗം വരുന്ന വഴി ഇങ്ങനെയുമാകാം

കൊച്ചി: നഖങ്ങൾ മനോഹരമാക്കുക എന്നത് ഇന്ന് കേവലം ഒരു ഫാഷൻ എന്നതിലുപരി മാനസിക ഉന്മേഷത്തിനായുള്ള സെൽഫ് കെയർ രീതിയായി മാറിയിട്ടുണ്ട്. എന്നാൽ, ഇതിനായി ഉപയോഗിക്കുന്ന രാസവസ്തുക്കളും ഉപകരണങ്ങളും ദീർഘകാലാടിസ്ഥാനത്തിൽ ദോഷകരമാണെന്ന് വിദഗ്ധർ ചൂണ്ടിക്കാട്ടുന്നു.

ജെൽ മാനിക്യൂറുകൾ ഉറപ്പിക്കാനായി ഉപയോഗിക്കുന്ന യുവി ലാമ്പുകൾ ചർമ്മ കാൻസറിന് കാരണമായേക്കാവുന്ന ഘടകങ്ങളിൽ ഒന്നാണ്. ഇടയ്ക്കിടെ മാത്രം ഇത് ചെയ്യുന്നവർക്ക് ഭീഷണി കുറവാണെങ്കിലും, സ്കിൻ കാൻസർ സാധ്യതയുള്ളവർക്ക് ഇത് പൂർണ്ണമായും സുരക്ഷിതമല്ല.

Also Read – ഇനി നിങ്ങളുടെ മെത്തകൾ കൂടുതൽകാലം പുത്തൻ പോലെ ഇരിക്കും, ഇതാ വഴികൾ

അക്രിലിക് നഖങ്ങളിലും അവ ഒട്ടിക്കാൻ ഉപയോഗിക്കുന്ന പശകളിലും അടങ്ങിയിട്ടുള്ള രാസവസ്തുക്കൾ അലർജിക് കോൺടാക്റ്റ് ഡെർമറ്റൈറ്റിസ്, കൈകളിലെയും ചുണ്ടിലെയും എക്സിമ എന്നിവയ്ക്ക് കാരണമായേക്കാം. രാസവസ്തുക്കളുടെ നിരന്തര ഉപയോഗം നഖങ്ങൾ ദുർബലമാകാനും നഖത്തിന് ചുറ്റുമുള്ള ചർമ്മത്തിൽ അണുബാധയുണ്ടാകാനും ഇടയാക്കും.

സലൂൺ തൊഴിലാളികൾക്ക് റിസ്ക് കൂടുതൽ

ഉപഭോക്താക്കളെക്കാൾ അധികം അപകടസാധ്യത നിലനിൽക്കുന്നത് സലൂൺ ജീവനക്കാർക്കാണെന്ന് ഡോക്ടർമാർ അഭിപ്രായപ്പെടുന്നു. ഒരു ദിവസം ഏകദേശം 8 മണിക്കൂറോളം രാസവസ്തുക്കളുടെ പുകയും മണവും ഏൽക്കുന്നത് ശ്വസനസംബന്ധമായ പ്രശ്നങ്ങൾക്കും ഗുരുതരമായ ചർമ്മരോഗങ്ങൾക്കും കാരണമാകും. പല സലൂണുകളിലും കൃത്യമായ വായുസഞ്ചാരം ഇല്ലെന്നത് ആശങ്ക വർദ്ധിപ്പിക്കുന്നു. നെയിൽ ആർട്ട് ചെയ്യുന്നതിന്റെ ആവൃത്തി കുറയ്ക്കുക.

സലൂൺ തിരഞ്ഞെടുക്കുമ്പോൾ നല്ല വായുസഞ്ചാരമുള്ളതും വൃത്തിയുള്ളതുമായ സലൂണുകൾ തിരഞ്ഞെടുക്കുക. അലർജി, ചൊറിച്ചിൽ, നഖം പൊട്ടിപ്പോകൽ തുടങ്ങിയ ലക്ഷണങ്ങൾ കണ്ടാൽ വിദഗ്ധ ചികിത്സ തേടുക. സൗന്ദര്യവർദ്ധക ചികിത്സകൾ പൂർണ്ണമായും സുരക്ഷിതമാണെന്ന് കരുതരുത്. ഓരോ നടപടിക്രമങ്ങളിലും അപകടസാധ്യതകളുണ്ടെന്ന ബോധ്യം ഉപഭോക്താക്കൾക്കുണ്ടാകണമെന്ന് ആരോഗ്യവിദഗ്ധർ ഓർമ്മിപ്പിക്കുന്നു.