Asia Cup 2025: ‘ഏത് ടീമിനും ഇന്ത്യയെ തോല്പിക്കാൻ പറ്റും’; അവകാശവാദവുമായി ബംഗ്ലാദേശ് പരിശീലകൻ
Bangladesh Coach About India Match: ഏത് ടീമിനും ഇന്ത്യയെ തോല്പിക്കാൻ കഴിയുമെന്ന് ബംഗ്ലാദേശ് പരിശീലകൻ ഫിൽ സിമ്മൺസ്. ഇന്ത്യ മുൻപ് എന്ത് ചെയ്തു എന്നതിൽ കാര്യമില്ലെന്നും അദ്ദേഹം പറഞ്ഞു.
ഏത് ടീമിനും ഇന്ത്യയെ തോല്പിക്കാൻ കഴിയുമെന്ന അവകാശവാദവുമായി ബംഗ്ലാദേശ് പരിശീലകൻ ഫിൽ സിമ്മൺസ്. സൂപ്പർ ഫോറിൽ ഇന്ത്യക്കെതിരായ മത്സരത്തിന് മുന്നോടിയായി നടത്തിയ വാർത്താസമ്മേളനത്തിലാണ് ബംഗ്ലാദേശ് പരിശീലകൻ്റെ അവകാശവാദം. (Image Credits- PTI)
"കളി ആ ദിവസമാണ് കളിക്കുക. ഇന്ത്യ മുൻപ് എന്ത് ചെയ്തു എന്നത് പ്രശ്നമല്ല. ബുധനാഴ്ചയാണ് അത് സംഭവിക്കുക. മൂന്നര മണിക്കൂറിൽ എന്ത് സംഭവിക്കും എന്നതിനനുസരിച്ചാണ് കാര്യങ്ങൾ. ഞങ്ങൾ ഏറ്റവും നന്നായി കളിക്കും. അതാണ് മത്സരങ്ങൾ വിജയിക്കാനുള്ള ഏറ്റവും നല്ല മാർഗം."- അദ്ദേഹം പറഞ്ഞു.
"എല്ലാ മത്സരവും, പ്രത്യേകിച്ച് ഇന്ത്യ ഉൾപ്പെടുന്ന മത്സരങ്ങൾക്ക് ആവേശമുണ്ട്. കാരണം, അവർ ലോകത്തിലെ ഒന്നാം നമ്പർ ടീമാണ്. തീർച്ചയായും ആവേശമുണ്ടാവണം. ഞങ്ങൾ അത് ആസ്വദിക്കാൻ പോവുകയാണ്. ഞങ്ങൾ ആ നിമിഷങ്ങളും മത്സരവും ആസ്വദിക്കും."- സിമ്മൺസ് തുടർന്നു.
ഏഷ്യാ കപ്പിൽ മികച്ച പ്രകടനങ്ങളാണ് ബംഗ്ലാദേശ് നടത്തുന്നത്. ഗ്രൂപ്പ് ഘട്ടത്തിൽ അഫ്ഗാനിസ്ഥാനെയും ഹോങ്കോങിനെയും കീഴടക്കിയ അവർ ബംഗ്ലാദേശിനെതിരെ മാത്രമാണ് പരാജയപ്പെട്ടത്. എന്നാൽ, സൂപ്പർ ഫോറിൽ ഈ പരാജയത്തിന് പ്രതികാരം വീട്ടാൻ ബംഗ്ലാദേശിന് സാധിച്ചിരുന്നു.
ഈ മാസം 24നാണ് ഇന്ത്യ - ബംഗ്ലാദേശ് പോരാട്ടം. ദുബായ് രാജ്യാന്തര സ്റ്റേഡിയത്തിൽ ഇന്ത്യൻ സമയം രാത്രി 8 മണിക്ക് മത്സരം ആരംഭിക്കും. തകർപ്പൻ ഫോമിലുള്ള ഇന്ത്യയെ വീഴ്ത്തുക ബംഗ്ലാദേശിന് എളുപ്പമല്ല. എന്നാൽ, ലിറ്റൺ ദാസിന് കീഴിൽ യുവാക്കളുടെ സംഘം മികച്ച രീതിയിലാണ് കളിക്കുന്നത്.
