Gold: ലക്ഷങ്ങൾ കൊടുക്കേണ്ട, ഒരു പവൻ സ്വർണം 97,168 രൂപയ്ക്ക് വാങ്ങാം, എങ്ങനെ?
Gold Rate Update Kerala: ഇന്ന് വിവാഹത്തിനുൾപ്പെടെ ഈ ആഭരണങ്ങൾ വലിയൊരു ട്രെൻഡ് ആയി മാറുകയാണ്. പ്രധാന ഉപഭോക്താക്കൾ പുതിയ തലമുറയിലെ കുട്ടികളാണെന്ന് വ്യാപാരികൾ പറയുന്നു.
പ്രതീക്ഷകളെയെല്ലാം കാറ്റിൽപറത്തി സംസ്ഥാനത്ത് സ്വർണവില കുതിക്കുകയാണ്. ഒരു പവൻ സ്വർണം വാങ്ങണമെങ്കിൽ ഏകദേശം 1,28,000 രൂപ നൽകേണ്ട അവസ്ഥയാണ്. നിലവിൽ ഒരു പവൻ സ്വർണത്തിന് 1,18,760 രൂപയാണ് വിപണിവില. വില കുതിക്കുന്നതോടെ സാധാരണക്കാർക്ക് സ്വർണം കിട്ടാക്കനിയാവുകയാണ്.
എന്നാൽ ലക്ഷങ്ങൾ മുടക്കാതെ തന്നെ സ്വർണാഭരണങ്ങൾ വാങ്ങാൻ സാധിക്കുമെന്ന് അറിയാമോ? 18 കാരറ്റ് സ്വർണമാണ് കഥയിലെ താരം. സ്വർണവില വർദ്ധിക്കും തോറും വിപണിയിൽ 18 കാരറ്റ് സ്വർണാഭരണങ്ങൾക്ക് ഡിമാൻഡ് കൂടുകയാണ്. 18 കാരറ്റ് സ്വർണ്ണത്തിൽ 75% ശുദ്ധസ്വർണ്ണവും 25% മറ്റ് ലോഹങ്ങളുമാണ് (കാപ്പർ, സിൽവർ, നിക്കൽ മുതലായവ) അടങ്ങിയിട്ടുള്ളത്.
18 കാരറ്റ് സ്വർണ്ണത്തിന് നിലവിൽ ഗ്രാമിന് 12,146 രൂപയാണ് വില. അതായത് പവന് 97,168 രൂപ നൽകിയാൽ മതി. പണിക്കൂലിയും ജിഎസ്ടിയും ഉൾപ്പെടെ ഏകദേശം 1,05,625 രൂപ നൽകേണ്ടി വരും. പൊതുവെ ഉപയോഗിക്കുന്ന 22 കാരറ്റ് സ്വർണ്ണവിലയുമായി താരതമ്യം ചെയ്താൽ ഒരു പവന് ഏകദേശം 21,000 രൂപയുടെ ലാഭം 18 കാരറ്റ് വാങ്ങുമ്പോൾ ലഭിക്കും.
22 കാരറ്റിലാണ് പൊതുവെ സ്വർണാഭരണങ്ങൾ നിർമിക്കുന്നത്. ഇവയിൽ 91.6% സ്വർണത്തിന്റെ അംശം ഉണ്ട്. എങ്കിലും ദിവസേന ഉപയോഗിക്കാൻ 18 കാരറ്റ് സ്വർണവും നല്ലതാണ്. റെക്കോർഡുകൾ ഭേദിച്ച് സ്വർണവില ഉയരുന്ന പശ്ചാത്തലത്തിൽ വിപണിയിൽ ഇവയ്ക്ക് ആവശ്യക്കാർ കൂടുന്നുണ്ട്.
ഇന്ന് വിവാഹത്തിനുൾപ്പെടെ 18 കാരറ്റ് ആഭരണങ്ങൾ വലിയൊരു ട്രെൻഡ് ആയി മാറുകയാണ്. പ്രധാന ഉപഭോക്താക്കൾ പുതിയ തലമുറയിലെ കുട്ടികളാണെന്ന് വ്യാപാരികൾ പറയുന്നു. സ്വർണം കൂടുതലുള്ള ആഭരണങ്ങളേക്കാൾ ഇവ സുരക്ഷിതവുമാണ്. (Image Credit: Getty Images)
