Crying Benefits: ഒന്നു കരഞ്ഞുനോക്കൂ.. മസാജ് ചെയ്ത സുഖമാണ്… ഉറക്കത്തിനും ബെസ്റ്റ്, ഗുണങ്ങൾ പിന്നെയുമുണ്ട്
Health benefits of crying: ഏതെങ്കിലും ഒരു വികാരത്തിനോടുള്ള ശരീരത്തിന്റെ സ്വാഭാവിക പ്രതികരണമാണ് കരച്ചില്. കരയുമ്പോള് ശരീരത്തില് ചില പ്രത്യേക രാസപ്രവര്ത്തനങ്ങള് നടക്കുന്നു.
സങ്കടം വരുമ്പോഴോ സന്തോഷം കൂടുമ്പോഴോ നമ്മുടെ കണ്ണുകൾ നിറയുന്നത് സ്വാഭാവികമാണ്. എന്നാൽ പലപ്പോഴും 'കരച്ചിൽ ബലഹീനതയാണ്' എന്ന തെറ്റായ ചിന്താഗതി കാരണം നാം കണ്ണുനീർ അടക്കിപ്പിടിക്കാറുണ്ട്. എന്നാൽ കരച്ചിൽ കേവലം ഒരു വികാരപ്രകടനമല്ലെന്നും അത് ശരീരത്തിന് മികച്ചൊരു ഔഷധമാണെന്നുമാണ് പുതിയ പഠനങ്ങൾ വ്യക്തമാക്കുന്നത്.
നമ്മൾ കരയുമ്പോൾ ശരീരം എൻഡോർഫിനുകളും, ഓക്സിടോസിനും പുറത്തുവിടുന്നു. ഇവ വേദന കുറയ്ക്കാനും മനസ്സിന് ആശ്വാസം നൽകാനും സഹായിക്കുന്ന പ്രകൃതിദത്ത രാസവസ്തുക്കളാണ്. ഒരു മസാജ് ചെയ്യുമ്പോൾ ലഭിക്കുന്ന അതേ ശാരീരിക-മാനസിക ഉന്മേഷം ഒരുതവണ മനസ്സ് തുറന്ന് കരയുമ്പോൾ ലഭിക്കുമെന്ന് വിദഗ്ധർ ചൂണ്ടിക്കാട്ടുന്നു.
സമ്മർദ്ദമുണ്ടാക്കുന്ന ഹോർമോണുകളെ ശരീരത്തിൽ നിന്നും പുറന്തള്ളാൻ കരച്ചിൽ സഹായിക്കുന്നു. കണ്ണുനീരിലെ ലൈസോസൈം എന്ന പദാർത്ഥം ബാക്ടീരിയകളെ നശിപ്പിക്കുകയും കൃഷ്ണമണിയെയും കൺപീലികളെയും വൃത്തിയായി സൂക്ഷിക്കുകയും ചെയ്യുന്നു.
കരച്ചിലിന് ശേഷം മസ്തിഷ്കം ശാന്തമാകുന്നതിനാൽ വേഗത്തിലും ആഴത്തിലുമുള്ള ഉറക്കം ലഭിക്കാൻ ഇത് സഹായിക്കുന്നു. വികാരങ്ങളെ അടിച്ചമർത്തുന്നത് ഉത്കണ്ഠയ്ക്കും വിഷാദത്തിനും കാരണമാകും. കരച്ചിൽ ഈ വികാരഭാരങ്ങളെ ഇറക്കിവെക്കാനുള്ള എളുപ്പവഴിയാണ്.
കുട്ടികളോട് 'ആൺകുട്ടികൾ കരയില്ല' എന്ന് പറയുന്ന രീതി അവരുടെ മാനസിക വളർച്ചയെ ദോഷകരമായി ബാധിക്കുമെന്നും വിദഗ്ധർ മുന്നറിയിപ്പ് നൽകുന്നു. അതിനാൽ ഹൃദയം ഭാരപ്പെടുമ്പോൾ മനസ്സ് തുറന്ന് കരയുന്നത് ആരോഗ്യത്തിന് ഗുണകരമാണ്.
