Murikootti Pacha: മില്ലിഗ്രാമിന് 6000 രൂപ, ഇത് വെറുമൊരു കാട്ടുചെടിയല്ല; മുറിവ് ഉണക്കും പണവും തരും!
Murikootti Pacha Price: ചെറിയ ചെടിയായാലും അവയുടെ വ്യാപാര സാധ്യതകൾ വലുതാണ്. രാജ്യാന്തര വിപണിയിൽ മില്ലിഗ്രാമിന് ഏകദേശം 6000 രൂപയാണ് വില വരുന്നത്.
കാട്ടുചെടിയെന്ന് തള്ളിക്കളയുന്നവയ്ക്ക് ചിലപ്പോൾ നമ്മൾ വിചാരിക്കാത്ത നിരവധി ഗുണങ്ങൾ ഉണ്ടായിരിക്കും. അത്തരത്തിൽ ഒരു ചെടിയാണ് മുറികൂടിപ്പച്ച. ഈ ചെടി ഗുണത്തോടൊപ്പം തന്നെ പണം സമ്പാദിക്കാനുള്ള മികച്ച മാർഗം കൂടിയാണ്.
‘സ്ട്രോ ബലാന്തസ് ആൾട്ടർനേറ്റ’ എന്ന ശാസ്ത്രനാമമുള്ള ‘മുറികൂടിപ്പച്ച’ നാട്ടിൻപുറങ്ങളിൽ മുറിവുണക്കാൻ ഉപയോഗിക്കുന്ന സസ്യമാണ്. ഇല പിഴിഞ്ഞെടുത്ത സത്ത് മുറിവിൽ പുരട്ടി കെട്ടി വച്ചാൽ ആഴത്തിലുള്ള മുറിവു പോലും വേഗം കരിയുന്നതാണ്. ഇതിലെ ആക്ടിയോസിഡ് എന്ന ഘടകമാണ് ഇതിന് സഹായിക്കുന്നത്.
ചെറിയ ചെടിയായാലും അവയുടെ വ്യാപാര സാധ്യതകൾ വലുതാണ്. മുറികൂടിപ്പച്ചയുടെ ഇല, വള്ളി, എണ്ണ എന്നിവ എല്ലാം തന്നെ ആയുർവേദ ഉൽപ്പന്നങ്ങൾ നിർമ്മിക്കാൻ ഉപയോഗിക്കുന്നു. അതുകൊണ്ട് തന്നെ ഇവ കൃഷി ചെയ്യുന്നത് നല്ലതാണ്.
ഹാംഗിങ്ങ് പ്ലാന്റായിട്ടും വെറും തറയിലും ഇവ നടാവുന്നതാണ്. ജവാഹർലാൽ നെഹ്റു ട്രോപ്പിക്കൽ ബൊട്ടാണിക് ഗാർഡനിലെ സെന്റർ ഓഫ് എക്സലൻസ് ഫൈറ്റോ കെമിക്കൽ നാനോ ടെക്നോളജിയിലെ ഗവേഷകരാണ് ഇവ എങ്ങനെ അതിവേഗം മുറിവ് ഉണക്കുന്നതെന്ന് കണ്ടെത്തിയത്.
മുറികൂടിപ്പച്ചയ്ക്ക് രാജ്യാന്തര വിപണിയിൽ മില്ലിഗ്രാമിന് ഏകദേശം 6000 രൂപയാണ് വില വരുന്നത്. മുറികൂടിപ്പച്ചയിൽ വലിയ തോതിൽ കാണുന്ന ‘ആക്ടിയോസിഡ്’ സംയുക്തത്തിനാണ് രാജ്യാന്തര വിപണിയിൽ മില്ലി ഗ്രാമിന് 4,500 മുതൽ 6,000 രൂപ വരെ വില വരുന്നത്. (Image Credit: Getty Images)
