Sanju Samson: ‘ഡല്ഹിക്കെതിരെ സെഞ്ചുറി നേടണമെന്ന് ആഗ്രഹമുണ്ടായിരുന്നു’; സഞ്ജുവിന്റെ വെളിപ്പെടുത്തല്
Sanju Samson reflects on missing third century: ഡല്ഹി ക്യാപിറ്റല്സിനെതിരായ മത്സരത്തില് സെഞ്ചുറി നേടാന് ആഗ്രഹിച്ചിരുന്നെന്ന് സഞ്ജു സാംസണ്. പുറത്താകാതെ നിന്ന് ടീമിനെ വിജയലക്ഷ്യത്തിൽ എത്തിച്ചതാണ് തനിക്ക് കൂടുതൽ സംതൃപ്തി നൽകിയതെന്നും താരം. ഡല്ഹിക്കെതിരായ മത്സരത്തില് സഞ്ജുവാണ് ചെന്നൈയെ വിജയിപ്പിച്ചത്.
സഞ്ജു സാംസണ്
ന്യൂഡല്ഹി, 6-5-2026: ഡല്ഹി ക്യാപിറ്റല്സിനെതിരായ മത്സരത്തിന് പിന്നാലെ, ഈ സീസണിലെ മൂന്നാം സെഞ്ചുറി നേടാന് ആഗ്രഹിച്ചിരുന്നെന്ന് വ്യക്തമാക്കി ചെന്നൈ സൂപ്പര് കിങ്സ് താരം സഞ്ജു സാംസണ്. എങ്കിലും, പുറത്താകാതെ നിന്ന് ടീമിനെ വിജയലക്ഷ്യത്തിൽ എത്തിച്ചതാണ് തനിക്ക് കൂടുതൽ സംതൃപ്തി നൽകിയതെന്ന് അദ്ദേഹം മത്സരശേഷം പറഞ്ഞു. ഡല്ഹിക്കെതിരായ മത്സരത്തില് പുറത്താകാതെ 52 പന്തില് 87 റണ്സ് നേടിയ സഞ്ജുവായിരുന്നു കളിയിലെ താരം. ഈ ടൂർണമെന്റിൽ ഉടനീളം സഞ്ജു സ്ഥിരതയാർന്ന പ്രകടനം പുറത്തെടുത്തിട്ടില്ലെങ്കിലും, ബാറ്റ് കൊണ്ട് 20 റൺസിന് മുകളിൽ സ്കോർ ചെയ്തപ്പോഴെല്ലാം അദ്ദേഹം ടീമിനെ വിജയിപ്പിച്ചിട്ടുണ്ട്.
ബാറ്റിംഗിലെ പ്രാഥമിക നീക്കങ്ങളിൽ താന് കുറച്ച് മാറ്റങ്ങൾ വരുത്തിയതായും, അത് ഫലം കാണുന്നുണ്ടെന്നും അദ്ദേഹം പറഞ്ഞു. കഴിഞ്ഞ കുറച്ച് വർഷങ്ങളായി ഞാൻ ഇത് ചെയ്യുന്നുണ്ട്. നേരിടുന്ന ബൗളർമാർക്കും തന്റെ സമീപനത്തിനും അനുസരിച്ചുള്ള തന്ത്രപരമായ മാറ്റമാണത്. 160-ഓളം റൺസ് പിന്തുടരുമ്പോൾ, പവർപ്ലേയ്ക്ക് ശേഷമുള്ള മധ്യ ഓവറുകളിൽ കൂടുതൽ സ്കോർ ചെയ്യാമായിരുന്നുവെന്നും സഞ്ജു അഭിപ്രായപ്പെട്ടു.
സെഞ്ചുറി മോഹം
സീസണിലെ മൂന്നാം സെഞ്ച്വറി നഷ്ടമായതിനെക്കുറിച്ച് സഞ്ജു പറഞ്ഞത് ഇപ്രകാരം: “സെഞ്ച്വറികൾ എപ്പോഴും സവിശേഷമാണ്. അത് നേടണമെന്ന് ആഗ്രഹമുണ്ടായിരുന്നു. പക്ഷേ അത് സ്വന്തമാക്കാൻ എനിക്ക് അല്പം സ്വാർത്ഥനാകേണ്ടി വരുമായിരുന്നു. സഹ ബാറ്റര് നന്നായി കളിക്കുന്നുണ്ടായിരുന്നു. ഒപ്പം കളി ജയിക്കുന്നത് കൂടുതൽ ആത്മവിശ്വാസവും സംതൃപ്തിയും സന്തോഷവും നൽകുന്നു. ഇനിയും കുറച്ച് മത്സരങ്ങൾ വരാനുണ്ട്, നമുക്ക് നോക്കാം (കൂടുതൽ സെഞ്ച്വറികൾ ലഭിക്കുമോ എന്ന്).”
നാഴികക്കല്ല്
അതേസമയം, ചൊവ്വാഴ്ച നടന്ന സിഎസ്കെ-ഡിസി മത്സരത്തിനിടെ ഒരു നാഴികക്കല്ലും സഞ്ജു പിന്നിട്ടു. കാർത്തിക് ശർമ്മയുമായി ചേർന്ന് 66 പന്തിൽ 114 റൺസിന്റെ ഉജ്ജ്വലമായ കൂട്ടുകെട്ടാണ് സഞ്ജു പടുത്തുയർത്തിയിരുന്നു.
ഡൽഹിക്കെതിരെ ചെന്നൈ നേടുന്ന അഞ്ചാമത്തെ നൂറ് റൺസ് കൂട്ടുകെട്ടാണിത്. എങ്കിലും, ഒരേ സീസണിൽ തന്നെ ഡൽഹിക്കെതിരെ രണ്ട് നൂറ് റൺസ് കൂട്ടുകെട്ടുകളിൽ പങ്കാളിയായി സഞ്ജു മാറി. ടൂർണമെന്റിന്റെ ഒരു സീസണിൽ തന്നെ ഡൽഹി ക്യാപിറ്റൽസിനെതിരെ രണ്ട് നൂറ് റൺസ് പ്ലസ് പങ്കാളിത്തങ്ങളിൽ ഭാഗമാകുന്ന ആദ്യ താരം എന്ന റെക്കോർഡ് സഞ്ജു സ്വന്തമാക്കി. ഡൽഹിക്കെതിരെ ഏറ്റവും കൂടുതൽ സെഞ്ച്വറി കൂട്ടുകെട്ടുകളിൽ പങ്കാളിയായ റെക്കോർഡ് റുതുരാജ് ഗെയ്ക്വാദിന്റെ (മൂന്ന് തവണ) പേരിലാണെങ്കിലും, അവ 2021, 2022, 2023 എന്നിങ്ങനെ വ്യത്യസ്ത സീസണുകളിലായിരുന്നു.
പ്ലേ ഓഫ് പ്രതീക്ഷ
ഡല്ഹിക്കെതിരായ വിജയത്തോടെ ചെന്നൈ പ്ലേ ഓഫ് പ്രതീക്ഷകള് സജീവമാക്കി. ആദ്യം ബാറ്റു ചെയ്ത ഡല്ഹി 20 ഓവറില് ഏഴു വിക്കറ്റിന് 155 റണ്സെടുത്തു. ചെന്നൈ 17.3 ഓവറില് രണ്ട് വിക്കറ്റ് മാത്രം നഷ്ടത്തില് വിജയലക്ഷ്യം മറികടന്നു. 10 മത്സരങ്ങളില് നിന്ന് അഞ്ച് വീതം ജയവും, തോല്വിയുമായി ചെന്നൈ പോയിന്റ് ടേബിളില് ആറാമതാണ്. 10 മത്സരങ്ങളില് നിന്ന് നാലു ജയം സ്വന്തമാക്കിയ ഡല്ഹി ഏഴാമതും.
English Summary
Sanju Samson led CSK to victory with an unbeaten 87 against Delhi Capitals. He shared a 114-run partnership with teammate Kartik Sharma. Samson prioritized the team’s win over achieving his third season century. He attributed his success to improved technical movements and a calm mindset.
