Jensen Huang: മുൻ എൻവിഡിയ സി.ഇ.ഒ ജെൻസൺ ഹുവാങ്ങിന് മറ്റൊരു ജീവനക്കാരിയുമായി കൂടി രഹസ്യബന്ധമെന്ന് പുതിയ റിപ്പോർട്ട്
Third Affair Allegation Surfaces Against Nvidia Ex-CEO Jensen Huang: അതേസമയം, സി.ഇ.ഒ സ്ഥാനത്ത് നിന്നുള്ള രാജിയോടെ 108 മില്യൺ ഡോളറിൻ്റെ എൻവിഡിയ ഓഹരികളാണ് ഹുവാങ്ങിന് നഷ്ടമാകുന്നത്. കമ്പനിയുടെ ഇക്വിറ്റി ഇൻസെൻ്റീവ് പ്ലാൻ വഴി വിവിധ വർഷങ്ങളിലായി ലഭിച്ച 3,10,000 ഓഹരികളാണിത്. ഈ ഓഹരികൾ നഷ്ടപ്പെടുന്നതോടെ ജെൻസൻ ഹുവാങ്ങിൻ്റെ ആകെ ആസ്തി മൂല്യം 144 ബില്യൺ ഡോളറായി മാറും എന്നാണ് ഫോബ്സ് റിപ്പോർട്ട് ചെയ്യുന്നത്
ജെൻസൻ ഹുവാങ്
വാഷിംഗ്ടൺ: ചാരവൃത്തി വിവാദങ്ങൾക്കും രഹസ്യബന്ധങ്ങൾക്കും പിന്നാലെ ലോകത്തിലെ ഏറ്റവും വലിയ ചിപ്പ് നിർമ്മാണ കമ്പനിയായ എൻവിഡിയയുടെ സി.ഇ.ഒ സ്ഥാനത്ത് നിന്ന് ജെൻസൻ ഹുവാങ് കഴിഞ്ഞ ദിവസം രാജിവെച്ചിരുന്നു. ഇതിന് പിന്നാലെ അദ്ദേഹത്തിനെതിരെ വീണ്ടും ഗുരുതര ആരോപണങ്ങൾ ഉയരുകയാണ്. കമ്പനിയിലെ മറ്റൊരു ജീവനക്കാരിയുമായി കൂടി ഹുവാങ്ങിന് രഹസ്യബന്ധമുണ്ടായിരുന്നു എന്നാണ് പുതിയ റിപ്പോർട്ടുകൾ. ഇതോടെ ഹുവാങ്ങിനെതിരെ ഉയർന്ന ഇത്തരം ആരോപണങ്ങളുടെ എണ്ണം മൂന്നായി.
ചൈനയ്ക്ക് വേണ്ടി വിവരങ്ങൾ ചോർത്തുന്നുവെന്ന് യു.എസ് രഹസ്യാന്വേഷണ ഏജൻസികൾ സംശയിക്കുന്ന ചൈനീസ് വ്യവസായി ആലീസ് ഹുവാങ്ങുമായുള്ള ബന്ധമാണ് ആദ്യം പുറത്തുവന്നത്. ഈ ബന്ധം ഹുവാങ് സമ്മതിക്കുകയും ചെയ്തിരുന്നു. ഇതിന് പിന്നാലെയാണ് എൻവിഡിയയുടെ ഹെൽത്ത് കെയർ വിഭാഗം മേധാവിയായ കിംബർലി പവലുമായി ഹുവാങ്ങിന് അവിഹിത ബന്ധമുണ്ടായിരുന്നെന്ന വിവരം ചൊവ്വാഴ്ച വാൾസ്ട്രീറ്റ് ജേണൽ പുറത്തുവിട്ടത്. ഇതിന് പുറമെയാണ് കമ്പനിയിലെ മറ്റൊരു ജീവനക്കാരിയുമായി കൂടി ഇദ്ദേഹത്തിന് ബന്ധമുണ്ടായിരുന്നതായി റോയിട്ടേഴ്‌സ് കഴിഞ്ഞ ദിവസം റിപ്പോർട്ട് ചെയ്തത്. എന്നാൽ മൂന്നാമത്തെ വ്യക്തിയുടെ പേരോ മറ്റ് വിവരങ്ങളോ റോയിട്ടേഴ്‌സ് വെളിപ്പെടുത്തിയിട്ടില്ല.
Also Read: ചാരവനിതയുമായുള്ള ബന്ധം എല്ലാം തകർത്തു; എൻവിഡിയ സി.ഇ.ഒ ജെൻസൻ ഹുവാങ് രാജിവെച്ചു
തുടർച്ചയായ വിവാദങ്ങൾ കമ്പനിയുടെ പേരിനെ വലിയ രീതിയിൽ ബാധിച്ചതോടെയാണ് ജെൻസൻ ഹുവാങ് അടിയന്തരമായി സി.ഇ.ഒ സ്ഥാനം രാജിവെച്ചത്. നിലവിലെ ചീഫ് ഫിനാൻഷ്യൽ ഓഫീസറായ കോലെറ്റ് ക്രെസ് താൽക്കാലിക സി.ഇ.ഒ ആയി ചുമതലയേൽക്കുമെന്ന് എൻവിഡിയ വ്യക്തമാക്കി. പുതിയ സി.ഇ.ഒയെ കണ്ടെത്തുന്നത് വരെ കോലെറ്റ് ക്രെസ് ഈ സ്ഥാനത്ത് തുടരും. എന്നാൽ ബോർഡ് പുറത്തിറക്കിയ പ്രസ്താവനയിൽ രാജിക്ക് പിന്നിലെ കാരണമോ യുഎസ് രഹസ്യാന്വേഷണ ഏജൻസികളുടെ അന്വേഷണമോ പരാമർശിച്ചിട്ടില്ല. പകരം എൻവിഡിയയുടെ വളർച്ചയിൽ ഹുവാങ് നൽകിയ വലിയ സംഭാവനകളെ പ്രശംസിക്കുകയാണ് കമ്പനി ചെയ്തത്.
അതേസമയം, സി.ഇ.ഒ സ്ഥാനത്ത് നിന്നുള്ള രാജിയോടെ 108 മില്യൺ ഡോളറിൻ്റെ എൻവിഡിയ ഓഹരികളാണ് ഹുവാങ്ങിന് നഷ്ടമാകുന്നത്. കമ്പനിയുടെ ഇക്വിറ്റി ഇൻസെൻ്റീവ് പ്ലാൻ വഴി വിവിധ വർഷങ്ങളിലായി ലഭിച്ച 3,10,000 ഓഹരികളാണിത്. ഈ ഓഹരികൾ നഷ്ടപ്പെടുന്നതോടെ ജെൻസൻ ഹുവാങ്ങിൻ്റെ ആകെ ആസ്തി മൂല്യം 144 ബില്യൺ ഡോളറായി മാറും എന്നാണ് ഫോബ്സ് റിപ്പോർട്ട് ചെയ്യുന്നത്. അതിനിടെ ഹുവാങ് നിയമപോരാട്ടത്തിലേക്ക് കടക്കാൻ തയ്യാറെടുക്കുകയാണ്. കേസിൽ പ്രമുഖ നിയമ സ്ഥാപനമായ പോൾ വെയ്‌സിനെ ഹുവാങ് ചുമതലപ്പെടുത്തിയതായാണ് ന്യൂയോർക്ക് ടൈംസ് റിപ്പോർട്ട് ചെയ്യുന്നത്.
English Summary
In a shocking follow-up, former Nvidia CEO Jensen Huang is now accused of a third affair with another employee. The revelation follows his resignation over previous scandals and stock forfeiture.
