Eid Al-Fitr holidays: മാർച്ച് 19 മുതൽ ആറുദിവസം ആഘോഷം, സൗദിയിൽ ഈദുൽ ഫിത്ർ അവധി പ്രഖ്യാപിച്ചു
Saudi Arabia Announces Eid al-Fitr Holidays: സ്വകാര്യ മേഖലയിലെ സ്ഥാപനങ്ങൾ തൊഴിൽ നിയമത്തിലെ ആർട്ടിക്കിൾ 24 പ്രകാരം ജീവനക്കാർക്ക് ഈ അവധി നൽകാൻ ബാധ്യസ്ഥരാണെന്ന് മന്ത്രാലയം വ്യക്തമാക്കിയിട്ടുണ്ട്.
റിയാദ്: സൗദി അറേബ്യയിൽ ഈ വർഷത്തെ ഈദുൽ ഫിത്ർ പ്രമാണിച്ച് പൊതു-സ്വകാര്യ മേഖലകളിലെ അവധി ദിനങ്ങൾ മാനവശേഷി, സാമൂഹിക വികസന മന്ത്രാലയം പ്രഖ്യാപിച്ചു. സർക്കാർ, സ്വകാര്യ, ലാഭേച്ഛയില്ലാത്ത മേഖലകളിൽ മാർച്ച് 19 വ്യാഴാഴ്ച മുതൽ അവധി ആരംഭിക്കും. മാർച്ച് 18 ബുധനാഴ്ചത്തെ പ്രവൃത്തി സമയത്തിന് ശേഷമാകും ആരംഭിക്കുക.
മാർച്ച് 24 ചൊവ്വാഴ്ചയാണ് അവധി അവസാനിക്കുന്നത്. മാർച്ച് 25 ബുധനാഴ്ച മുതൽ ജോലി പുനരാരംഭിക്കും. ഔദ്യോഗികമായി നാല് പ്രവൃത്തി ദിനങ്ങളാണ് പെരുന്നാൾ അവധിയായി മന്ത്രാലയം നിശ്ചയിച്ചിട്ടുള്ളത്. എന്നാൽ ഇതിനോട് അനുബന്ധിച്ചുള്ള വെള്ളി, ശനി വാരാന്ത്യ അവധികൾ കൂടി ചേരുന്നതോടെ ഭൂരിഭാഗം ജീവനക്കാർക്കും ആറ് ദിവസം തുടർച്ചയായി അവധി ലഭിക്കും.
സ്വകാര്യ മേഖലയിലെ സ്ഥാപനങ്ങൾ തൊഴിൽ നിയമത്തിലെ ആർട്ടിക്കിൾ 24 പ്രകാരം ജീവനക്കാർക്ക് ഈ അവധി നൽകാൻ ബാധ്യസ്ഥരാണെന്ന് മന്ത്രാലയം വ്യക്തമാക്കിയിട്ടുണ്ട്. ചന്ദ്രദർശനത്തിന്റെ അടിസ്ഥാനത്തിൽ മാസപ്പിറവിയിൽ മാറ്റം വരികയാണെങ്കിൽ പെരുന്നാൾ ദിനങ്ങളിൽ ചെറിയ വ്യത്യാസങ്ങൾ ഉണ്ടായേക്കാം എന്നും ഇതിനൊപ്പം പ്രഖ്യാപിച്ചിട്ടുണ്ട്. എങ്കിലും ഔദ്യോഗിക അവധി കലണ്ടർ പ്രകാരം മുകളിൽ പറഞ്ഞ തീയതികളാണ് നിശ്ചയിച്ചിരിക്കുന്നത്.
വിശുദ്ധ റമദാൻ 29-ന് അതായത് മാർച്ച് 18 ബുധനാഴ്ച മാസപ്പിറവി ദർശിച്ചാൽ മാർച്ച് 19 വ്യാഴാഴ്ച പെരുന്നാൾ ആയിരിക്കും. മാസപ്പിറവി ദൃശ്യമായില്ലെങ്കിൽ റമദാൻ 30 പൂർത്തിയാക്കി മാർച്ച് 20 വെള്ളിയാഴ്ചയായിരിക്കും ചെറിയ പെരുന്നാൾ ആഘോഷിക്കുക.
