UAE Weather: യു.എ.ഇയിൽ ഈ കൊടുംചൂട് എന്ന് അവസാനിക്കും? സുഖകരമായ ദിനങ്ങൾ തൊട്ടരികെ !
Summer Heat to Drop Below 40°C by Late September in UAE: സെപ്റ്റംബർ 25-ന് ‘ദാർ അൽ ഖംസീൻ’ ആരംഭിക്കുന്നതോടെ കാലാബസ്ഥയിൽ കാര്യമായ മാറ്റം പ്രകടമാകും. ഈ കാലയളവിൽ പകൽ സമയത്തെ പരമാവധി താപനില 40 ഡിഗ്രി സെൽഷ്യസിൽ താഴെയായിരിക്കും. രാത്രിയിൽ താപനില 25 ഡിഗ്രി സെൽഷ്യസിന് താഴെ എത്തുമെന്നാണ് പ്രതീക്ഷിക്കുന്നത്.
അബുദാബി: യു.എ.ഇയിലെ വേനൽ ചൂടിന് ഉടൻ ശമനമാകുമെന്ന് കാലാവസ്ഥാ വിദഗ്ധർ, സെപ്റ്റബറിൻ്റെ രണ്ടാം പകുതിയോടെ താപനിലയിൽ ഗണ്യമായ കുറവ് അനുഭവപ്പെടുമെന്ന് കാലാവസ്ഥാ നിരീക്ഷകർ വ്യക്തമാക്കി. യു.എ.യിൽ പരമ്പരാഗതമായി തണുപ്പ് കാലത്തിന് ആരംഭം കുറിക്കുന്ന സുഹൈൽ നക്ഷത്രം ദൃശ്യമായതിന് ശേഷമുള്ള ‘ദാർ അൽ അർബീൻ’ എന്ന് അറിയപ്പെടുന്ന 40 ദിവസങ്ങൾ സെപ്റ്റംബർ 24-ന് അവസാനിക്കുമെന്ന് എമിറേറ്റ് ആസ്ട്രണോമിക്ക സൊസൈറ്റി ചെയർമാൻ ഇബ്രാഹിം അൽ ജർവാൻ അറിയിച്ചതായി അറബ് മാധ്യമായ ‘ഗൾഫ് ന്യൂസ്’ റിപ്പോർട്ട് ചെയ്യുന്നു.
സുഹൈൽ നക്ഷത്രം ദൃശ്യമായതിന് ശേഷമുള്ള ആദ്യ 40 ദിവസങ്ങളിൽ ചൂടിന് നേരിയ ശമനം അനുഭവപ്പെടാറുണ്ടെങ്കിലും താപനില വീണ്ടും ഉയർന്നേക്കാം. രാത്രിയിൽ ഹ്യുമിഡിറ്റി വർധിക്കാമെന്നും അതിരാവിലെ മൂടൽമഞ്ഞ് അനുഭവപ്പെടാൻ സധ്യതയുണ്ടെന്നും അറബ് ദിനപത്രമായ ‘എമിറേറ്റ് അൽ യൂം’ പ്രസിദ്ധീകരിച്ച റിപ്പോർട്ടിൽ പറയുന്നു.
പ്രകടമായ മാറ്റങ്ങൾ ആരംഭിക്കുക സെപ്റ്റംബർ 25 മുതൽ
എന്നാൽ സെപ്റ്റംബർ 25-ന് ‘ദാർ അൽ ഖംസീൻ’ ആരംഭിക്കുന്നതോടെ കാലാബസ്ഥയിൽ കാര്യമായ മാറ്റം പ്രകടമാകും. ഈ കാലയളവിൽ പകൽ സമയത്തെ പരമാവധി താപനില 40 ഡിഗ്രി സെൽഷ്യസിൽ താഴെയായിരിക്കും. രാത്രിയിൽ താപനില 25 ഡിഗ്രി സെൽഷ്യസിന് താഴെ എത്തുമെന്നാണ് പ്രതീക്ഷിക്കുന്നത്. ഇതോടെ നിലവിലെ താരതമ്യേനെ ആശ്വാസകരമായ കാലാവസ്ഥയിലേക്ക് യു.എ.ഇ കടക്കും.
മഞ്ഞുകാലത്തിൻ്റെ വരവറിയിക്കുന്ന മാറ്റങ്ങൾ
ഒക്ടോബർ 5 മുതൽ 15 വരെയുള്ള കാലയളവിനെ ‘ദാർ അൽ സിറ്റിൻ’ എന്നാണ് വിശേഷിപ്പിക്കുന്നത്. ഈ സമയത്ത് ശക്തമായ കാറ്റ് അനുഭവപ്പെടാറുണ്ട്. ഇത് തണൂപ്പുള്ള കാലാവസ്ഥയിലേക്കുള്ള മാറ്റം വേഗത്തിലാക്കാൻ സഹായിക്കുന്നു.
ന്യുനമർദ്ദത്തിനും മഴയ്ക്കും സാധ്യത
പിന്നീട് തണുപ്പ് കാലത്തിന് തൊട്ടുമുൻപുള്ള ‘അൽ മുറബ്ബാനിയ’ എന്ന പ്രത്യേക കാലയളവിലേക്കാണ് യു.എ.ഇ കടക്കുക. ഒക്ടോബർ 15 മുതൽ നവംബർ 25 വരെ ഏകദേശം 40 ദിവസങ്ങളാണ് ഈ കാലയളവ് നീണ്ടു നിൽക്കുക. ഈ സമയത്ത് മഴ ലഭിക്കാൻ സാധ്യത വളരെ കൂടുതലാണ്. ഒക്ടോബർ നവംബർ മാസങ്ങളിൽ അറബിക്കടലിൽ ന്യുനമർദ്ദത്തിന് സാധ്യതയുണ്ടെന്നും ഇബ്രാഹിം അൽ ജർവാൻ കൂട്ടിച്ചേർത്തു. ഇതുന് മുൻപ് മെയ് ജൂൺ മാസങ്ങളിലാണ് അറബിക്കടലിൽ ന്യൂനമർദ്ദം അനുഭവപ്പെട്ടത്.
English Summary
The UAE’s intense summer heat will gradually drop below 40°C by late September. Experts state that traditional astronomical phases indicate milder weather, stronger winds, and upcoming rain from October.
