Viral Video: മെക്സിക്കോയിലെ തെരുവിലൂടെ സ്വൈര്യവിഹാരം നടത്തി ബംഗാൾ കടുവ, ദൃശ്യങ്ങൾ ഇതാ

Tiger

മെക്സിക്കോ സിറ്റി: ജനവാസമേഖലയിലൂടെ ഒരു ബംഗാൾ കടുവ സ്വതന്ത്രമായി നടന്നുനീങ്ങുന്ന നടുക്കുന്ന ദൃശ്യങ്ങൾ മെക്സിക്കോയിൽ നിന്നും പുറത്തുവന്നു. മെക്സിക്കോയിലെ നായരിത് സംസ്ഥാനത്തെ ടെക്വാല എന്ന നഗരത്തിലാണ് സംഭവം നടന്നത്. സോഷ്യൽ മീഡിയയിൽ വൈറലായ വീഡിയോയിൽ, തെരുവിലൂടെ ശാന്തനായി നടന്നുപോകുന്ന കടുവയെ കണ്ട് നാട്ടുകാർ പരിഭ്രാന്തരാകുന്നത് കാണാം.

തെരുവിലൂടെ നടന്നുപോയ കടുവയെ കണ്ട ഒരു യുവതി ഭയന്ന നിലവിളിക്കുന്നതും വീഡിയോയിലുണ്ട്. എന്നാൽ അൽപ്പസമയത്തിന് ശേഷം കൗതുകകരമായ മറ്റൊരു സംഭവം കൂടി അരങ്ങേറി. കടുവ ആരെയോ കാത്തുനിൽക്കുന്നതുപോലെ നിൽക്കുകയും, പിന്നാലെ എത്തിയ ഒരാൾ അതിന്റെ കഴുത്തിൽ വെറുമൊരു കയർ കെട്ടി വളരെ എളുപ്പത്തിൽ കൊണ്ടുപോവുകയും ചെയ്തു.

പ്രാദേശിക മാധ്യമങ്ങൾ റിപ്പോർട്ട് ചെയ്യുന്നതനുസരിച്ച്, ഈ കടുവയുടെ നഖങ്ങൾ നീക്കം ചെയ്തിരുന്നു. സംഭവം ശ്രദ്ധയിൽപ്പെട്ടതോടെ പരിസ്ഥിതി സംരക്ഷണത്തിനായുള്ള അറ്റോർണി ജനറൽ ഓഫീസിൽ നിന്നെത്തിയവർ കടുവയെ പിടികൂടി. കടുവയെ അനധികൃതമായാണ് വളർത്തിയിരുന്നതെന്ന് അധികൃതർ സ്ഥിരീകരിച്ചു. സിനലോവ അതിർത്തിക്ക് സമീപമാണ് കടുവയെ പിടികൂടിയത്.

സുന്ദർബനിലെ പഴയ വീഡിയോയും തരംഗമാകുന്നു

ഇതോടൊപ്പം തന്നെ, മുൻപ് ഇന്ത്യയിലെ സുന്ദർബനിൽ നിന്നും രക്ഷപ്പെടുത്തിയ കടുവയെ വനത്തിലേക്ക് തുറന്നുവിടുന്ന പഴയൊരു വീഡിയോയും വീണ്ടും ചർച്ചയാകുന്നുണ്ട്. ഐഎഫ്എസ് ഉദ്യോഗസ്ഥനായ പർവീൺ കസ്വാൻ പങ്കുവെച്ച വീഡിയോയിൽ, ബോട്ടിൽ നിന്നും വെള്ളത്തിലേക്ക് ചാടി കടുവ തന്റെ സ്വഭാവിക ആവാസവ്യവസ്ഥയിലേക്ക് തിരികെ നീന്തിപ്പോകുന്നത് കാണാം.