Viral Video: വിസ്മയം ഈ ഇബു ബാരൻ, ചരിത്രത്തിലെ ഏറ്റവും നീളമേറിയ പാമ്പിനെ കാണണോ?

Longest Snake In The World

ജക്കാർത്ത: ലോകത്തിലെ ഏറ്റവും നീളമേറിയ പാമ്പ് എവിടെ ഉണ്ടാകും എന്ന് ചിന്തിച്ചിട്ടുണ്ടോ? ആമസോൺ കാടുകളിലെവിടെയെങ്കിലും ഉണ്ടാകും അല്ലെങ്കിൽ സിനിമയിൽ കാണുന്ന പോലെ അനാക്കോണ്ട പോലെ ഏതെങ്കിലും ആവും എന്ന് ഊഹിക്കേണ്ട. ഇതാ അത് ഇവിടെ ഉണ്ട്. ഇന്തോനേഷ്യയിലെ സുലവേസിയിലെ മാരോസ് മേഖലയിൽ നിന്നാണ് ഈ നീളക്കാരൻ പാമ്പിനെ കണ്ടെത്തിയത്.

റെറ്റിക്കുലേറ്റഡ് പൈത്തൺ ഇനത്തിൽപ്പെട്ട കൂറ്റൻ പെൺപാമ്പാണ് ഈ റെക്കോഡ് സ്വന്തമാക്കിയത്. ‘ഇബു ബാരൻ’ (Ibu Baron) എന്ന് പേരിട്ടിരിക്കുന്ന ഈ പാമ്പിന് 7.22 മീറ്റർ നീളമുണ്ടെന്ന് ഔദ്യോഗികമായി സ്ഥിരീകരിച്ചു. അതായത് 23 അടി 8 ഇഞ്ച് നീളം.

റെക്കോർഡുകൾ തിരുത്തിക്കുറിച്ച അളവെടുപ്പ്

2025 അവസാനത്തോടെയാണ് ഇന്തോനേഷ്യയിലെ സുലവേസിയിലുള്ള മാരോസ് പ്രദേശത്തു നിന്ന് ഈ കൂറ്റൻ പാമ്പിനെ കണ്ടെത്തിയത്. തുടർന്ന് ശാസ്ത്രീയമായ പരിശോധനകൾക്ക് ശേഷം 2026 ജനുവരി 18-നാണ് ഇതിന്റെ കൃത്യമായ നീളം അളന്നത്. കാടിന്റെ വന്യതയിൽ ജീവിക്കുന്ന പാമ്പുകളിൽ നടത്തിയിട്ടുള്ള കണക്കെടുപ്പുകളിൽ ഏറ്റവും വിശ്വാസയോഗ്യമായി അളക്കപ്പെട്ട ഏറ്റവും വലിയ പാമ്പ് എന്ന പദവി ഇനി ‘ഇബു ബാരന്’ സ്വന്തം.

മനുഷ്യവാസമുള്ള പ്രദേശങ്ങളിൽ നിന്ന് അകലെ കണ്ടുപിടിക്കപ്പെട്ട ഈ പാമ്പിനെ സുരക്ഷിതമായി നിരീക്ഷിച്ചു വരികയാണ്. ഇതിനു മുൻപ് പലപ്പോഴും എട്ട് മീറ്ററിലധികം നീളമുള്ള പാമ്പുകളെ കണ്ടെത്തിയതായി അവകാശവാദങ്ങൾ ഉയർന്നിട്ടുണ്ടെങ്കിലും, ഔദ്യോഗികമായി ഇത്രയും കൃത്യതയോടെ അളക്കപ്പെട്ട മറ്റൊന്ന് ചരിത്രത്തിലില്ലെന്ന് ഗവേഷകർ പറയുന്നു.