Mango Payasam: പഴുത്ത മാമ്പഴംകൊണ്ട് കിടുക്കൻ പായസം തയ്യാറാക്കാം… വിഷു സദ്യയിൽ താരം ഇവൻ തന്നെ…
Vishu Feast Special Delicious Mampazha Prathaman Recipe: പഴമയുടെ രുചിയും പുതുമയുടെ ഗന്ധവും ഒത്തുചേരുന്ന മാമ്പഴ പ്രഥമൻ ഇത്തവണത്തെ വിഷുസദ്യയ്ക്ക് മധുരമേകുമെന്ന് ഉറപ്പാണ്. വരാനിരിക്കുന്ന ഒരു വർഷം മുഴുവൻ ജീവിതത്തിൽ മധുരം നിറയട്ടെ എന്ന പ്രത്യാശയോടെ ഈ വിഷുവിന് മാമ്പഴ പ്രഥമൻ വിളമ്പാം.
സമൃദ്ധിയുടെയും ഐശ്വര്യത്തിന്റെയും പ്രതീകമായ വിഷു എത്തുമ്പോൾ മലയാളിക്ക് ഒഴിച്ചുകൂടാനാവാത്തതാണ് വിഭവസമൃദ്ധമായ വിഷുസദ്യ. സദ്യയുടെ രുചി പൂർണ്ണമാകണമെങ്കിൽ ഒടുവിൽ മധുരമൂറുന്ന പായസം തന്നെ വേണം. വസന്തകാലത്ത് തൊടിയിൽ മാമ്പഴങ്ങൾ പഴുത്തുനിൽക്കുന്ന ഈ വേളയിൽ, വിഷുസദ്യയിലെ താരമാകാൻ ഇതാ ഒരു തകർപ്പൻ മാമ്പഴ പ്രഥമൻ. പഴുത്ത മാമ്പഴത്തിന്റെ തനിമയും ശർക്കരയുടെയും തേങ്ങാപ്പാലിന്റെയും സ്വാദും ഒത്തുചേരുന്ന ഈ വിഭവം തയ്യാറാക്കുന്നത് എങ്ങനെയെന്ന് നോക്കാം.
തയ്യാറാക്കുന്ന വിധം
പഴുത്ത മാമ്പഴം തൊലി കളഞ്ഞ് മിക്സിയിൽ നന്നായി അരച്ച് പൾപ്പ് രൂപത്തിലാക്കുക. ഒരു ഉരുളിയിൽ നെയ്യ് ചൂടാക്കി മാമ്പഴ പൾപ്പ് ചേർക്കുക. ഇതിന്റെ പച്ചമണം മാറി എണ്ണ തെളിയുന്നത് വരെ നന്നായി വഴറ്റണം. ഇതിലേക്ക് ഉരുക്കി അരിച്ചെടുത്ത ശർക്കരപ്പാനി ഒഴിച്ച് നന്നായി കുറുകുന്നത് വരെ തിളപ്പിക്കുക. മിശ്രിതം കുറുകി വരുമ്പോൾ രണ്ടാം തേങ്ങാപ്പാൽ ചേർത്ത് ചെറിയ തീയിൽ വീണ്ടും കുറുക്കുക.
നന്നായി കുറുകിയ ശേഷം ഒന്നാം പാൽ, ഏലയ്ക്കാപ്പൊടി, ചുക്കുപൊടി എന്നിവ ചേർക്കുക. ശ്രദ്ധിക്കുക, ഒന്നാം പാൽ ചേർത്ത ശേഷം തിളപ്പിക്കാൻ പാടില്ല; ഉടൻ തന്നെ സ്റ്റൗ ഓഫ് ചെയ്യുക. മറ്റൊരു പാനിൽ നെയ്യ് ചൂടാക്കി തേങ്ങാക്കൊത്ത്, കശുവണ്ടി, മുന്തിരി എന്നിവ വറുത്ത് പായസത്തിൽ ചേർക്കാം.
