CJ Roy: സിജെ റോയ് ഹൃദയത്തോട് ചേര്ത്ത വാഹനം; ആ മാരുതി 800-നായി മുടക്കിയത് 10 ലക്ഷം
CJ Roy's love for cars: 1994ല് വാങ്ങിയ മാരുതി 800 കാറിന് 10 ലക്ഷം രൂപ കൊടുത്ത് തിരികെ വാങ്ങിയ ഒരു ചരിത്രമുണ്ട് സിജെ റോയിക്ക്. അദ്ദേഹം തന്നെ സോഷ്യല് മീഡിയയില് പങ്കുവച്ചതാണ് ഈ കഥ. ആ കഥ ഇങ്ങനെ.
CJ Roy
ആദ്യത്തെ വാഹനം എല്ലാവര്ക്കും സ്പെഷ്യലായിരിക്കും. അക്കാര്യത്തില് കോണ്ഫിഡന്റ് ഗ്രൂപ്പ് ചെയര്മാന് സിജെ റോയിയും വ്യത്യസ്തനായിരുന്നില്ല. ബിസിനസില് നേട്ടങ്ങള് കൊയ്യുമ്പോഴും തന്റെ ആദ്യത്തെ മാരുതി 800 റോയി എന്നും ഹൃദയത്തോട് ചേര്ത്തിരുന്നു. 1994 ല് വാങ്ങിയ ആ കാര് മൂന്ന് വര്ഷത്തിനുശേഷം റോയി വിറ്റു. എന്നാല് എന്നും റോയിയുടെ ഓര്കളില് ആ മാരുതി കാറുണ്ടായിരുന്നു.
ഒടുവില് ആ വാഹനം തിരികെ സ്വന്തമാക്കണമെന്നായി റോയിയുടെ ആഗ്രഹം. തന്റെ പഴയ കാര് കണ്ടെത്തുന്നവര്ക്ക് 10 ലക്ഷം രൂപയാണ് റോയി വാഗ്ദാനം ചെയ്തത്. സോഷ്യല് മീഡിയയുടെ കരുത്തില് റോയിക്ക് ആ വാഹനം തിരികെ ലഭിക്കുകയും ചെയ്തു.
10 ലക്ഷം മുടക്കി തന്റെ പഴയ കാര് സ്വന്തമാക്കിയതിനെക്കുറിച്ച് റോയി അന്ന് ഫേസ്ബുക്കില് പങ്കുവച്ചത് ഏറെ ശ്രദ്ധേയമായിരുന്നു. 2025 നവംബര് 19 ന് സിജെ റോയി ഫേസ്ബുക്കില് പങ്കുവച്ച കുറിപ്പിന്റെ മലയാള പരിഭാഷ ഇങ്ങനെ:
Also Read: CJ Roy: കോണ്ഫിഡന്റ് ഗ്രൂപ്പ് ചെയര്മാന് സിജെ റോയ് ജീവനൊടുക്കി
”എന്റെ ആദ്യത്തെ കാറായ ആ ചുവന്ന മാരുതി 800 കണ്ടെത്തി നൽകുന്നവർക്ക് ഞാൻ 10 ലക്ഷം രൂപ പാരിതോഷികം പ്രഖ്യാപിച്ചിരുന്നു. സോഷ്യൽ മീഡിയയുടെ കരുത്തുകൊണ്ട് എന്റെ ഇൻസ്റ്റാഗ്രാം സുഹൃത്തുക്കൾ അത് കണ്ടെത്തി. ഒരു മാരുതി 800-ന് ലഭിക്കുന്ന ഏറ്റവും ഉയർന്ന തുകയായിരിക്കാം ഇത്. എന്നാല്, ആദ്യത്തെ വാഹനം എന്നത് എപ്പോഴും ജീവിതത്തിലെ ആദ്യത്തെ വലിയ നേട്ടമാണല്ലോ.
1994-ൽ, എനിക്ക് 25 വയസ്സുള്ളപ്പോൾ എന്റെ സ്വന്തം സമ്പാദ്യം കൊണ്ട് ഞാൻ വാങ്ങിയതാണ് ഈ മാരുതി 800. 31 വർഷങ്ങൾക്ക് മുമ്പ് ഇന്ത്യൻ റോഡുകളിലെ ഏറ്റവും മികച്ച കാറുകളിൽ ഒന്നായിരുന്നു മാരുതി 800. അന്ന് 1.10 ലക്ഷം രൂപയ്ക്കാണ് ഞാനിത് വാങ്ങിയത്. അന്ന് ഈ തുകയ്ക്ക് സര്ജാപൂരില് രണ്ട് ഏക്കര് സ്ഥലം കിട്ടുമായിരുന്നു. ഇന്ന് സർജാപൂരിലെ 2 ഏക്കർ സ്ഥലത്തിന് 20 കോടിയിലധികം വിലവരും.
ഈ കഥയിലെ ഗുണപാഠം ഇതാണ്: കാർ വാങ്ങിക്കോളൂ, പക്ഷേ ഒപ്പം കുറച്ച് ഭൂമി കൂടി വാങ്ങുക. കാരണം ഭൂമി എന്നത് വിലമതിക്കാനാകാത്ത സ്വത്തായി മാറും.
1997 ൽ ഈ മാരുതി 800 കാർ വിറ്റു. ആ സമയത്ത് ഇന്ത്യൻ റോഡുകളിലെ ഏറ്റവും വിലയേറിയതും മികച്ചതുമായ മാരുതി എസ്റ്റീം വാങ്ങുകയും ചെയ്തു. ഞാൻ എപ്പോഴും ഒരു കാർ പ്രേമിയാണ്”.
