KEAM 2026: ഗള്ഫ് രാജ്യങ്ങളിലെ എന്ട്രന്സ് പരീക്ഷാ കേന്ദ്രം ഇനിയും മാറ്റാം; ചെയ്യേണ്ടത് ഇത്ര മാത്രം
Entrance exam center change in Gulf countries: ഗള്ഫിലെ എന്ട്രന്സ് പരീക്ഷാ കേന്ദ്രങ്ങള് മാറ്റാനുള്ള സമയപരിധി ഏപ്രില് ഏഴിന് അവസാനിക്കും. മിഡില് ഈസ്റ്റിലെ നിലവിലെ സാഹചര്യം മൂലം യുഎഇ പരീക്ഷാ കേന്ദ്രമായി തിരഞ്ഞെടുത്ത ചില അപേക്ഷകര് ബുദ്ധിമുട്ട് നേരിടുന്നുണ്ട്. ഈ സാഹചര്യത്തിലാണ് ഗള്ഫിലെ പരീക്ഷാ കേന്ദ്രങ്ങള് മാറ്റാന് അനുവദിച്ചിരിക്കുന്നത്.
ഗള്ഫ് രാജ്യങ്ങളിലെ എഞ്ചിനീയറിങ്, ഫാര്മസി പ്രവേശനാ പരീക്ഷയുടെ കേന്ദ്രങ്ങള് മാറ്റാനുള്ള സമയപരിധി നാളെ (ഏപ്രില് 7) അവസാനിക്കും. നാളെ ഉച്ചയ്ക്ക് ഒരു മണിക്ക് സമയപരിധി തീരും. ഷാര്ജ പരീക്ഷാ കേന്ദ്രമായി തിരഞ്ഞെടുക്കുകയും, എന്നാല് നിലവില് ഗള്ഫിലേക്ക് യാത്രാ ബുദ്ധിമുട്ട് നേരിടുകയും ചെയ്യുന്ന വിദ്യാര്ത്ഥികള്ക്ക് കേരളത്തിലുള്ള ഏതെങ്കിലും പരീക്ഷാ കേന്ദ്രം തിരഞ്ഞെടുക്കാന് അവസരമുണ്ട്.
എന്നാല് കേരളത്തില് പരീക്ഷാ കേന്ദ്രം തിരഞ്ഞെടുത്ത ഗള്ഫിലുള്ള വിദ്യാര്ത്ഥികള്ക്ക്, ഇങ്ങോട്ടേക്ക് വരാന് ബുദ്ധിമുട്ട് നേരിടുന്നുണ്ടെങ്കില് ഗള്ഫിലെ കേന്ദ്രങ്ങള് പരീക്ഷയ്ക്കായി തിരഞ്ഞെടുക്കാം. ഷാര്ജ പരീക്ഷാ കേന്ദ്രമായി തിരഞ്ഞെടുത്തവര്ക്ക്, താല്പര്യമുണ്ടെങ്കില് കുവൈത്തിലെയും, ബഹ്റൈനിലെയും കേന്ദ്രങ്ങളും തിരഞ്ഞെടുക്കാം.
ചെയ്യേണ്ടത് ഇത്ര മാത്രം
- cee.kerala.gov.in എന്ന വെബ്സൈറ്റില് പ്രവേശിക്കുക
- കീം 2026 ആപ്ലിക്കേഷന് എന്ന ലിങ്കില് ലോഗിന് ചെയ്യുക
- ചേഞ്ച് സെന്റര് എന്ന മെനു ക്ലിക്ക് ചെയ്ത് പരീക്ഷാ കേന്ദ്രം തിരഞ്ഞെടുക്കുക/മാറ്റുക
Also Read: KEAM Admit Card 2026: കീം അഡ്മിറ്റ് കാര്ഡ് ഇനിയും വൈകും; ലഭ്യമാകുന്നത് ഏപ്രില് എട്ട് മുതല്
അപേക്ഷാ ഫീസ് ബാധകമെങ്കില് അതും നിശ്ചിത സമയപരിധിക്കുള്ളില് അടയ്ക്കണം. മിഡില് ഈസ്റ്റിലെ നിലവിലെ സാഹചര്യം മൂലം യുഎഇ പരീക്ഷാ കേന്ദ്രമായി തിരഞ്ഞെടുത്ത ചില അപേക്ഷകര് ബുദ്ധിമുട്ട് നേരിടുന്നുണ്ട്. ഈ സാഹചര്യത്തിലാണ് ഗള്ഫിലെ പരീക്ഷാ കേന്ദ്രങ്ങള് മാറ്റാന് അനുവദിച്ചിരിക്കുന്നത്. ഇതിനായി ഇനി സമയപരിധി നീട്ടി നല്കില്ല. ഏപ്രില് എട്ട് മുതല് അഡ്മിറ്റ് കാര്ഡ് ഡൗണ്ലോഡ് ചെയ്യാം. മധ്യേഷ്യൻ പ്രശ്നങ്ങൾ മൂലം ശക്തമായ നിയന്ത്രണങ്ങളാണ് അതാത് സർക്കാരുകൾ ഏർപ്പെടുത്തുന്നത്.
