KEAM 2026: എന്‍ട്രന്‍സ് പരീക്ഷയുടെ പ്രാക്ടീസ് ടെസ്റ്റ് ചെയ്യേണ്ടത് എങ്ങനെ? ദേ, വളരെ സിമ്പിളാണ്‌
KEAM Practice Test 2026: എഞ്ചിനീയറിങ്, ഫാര്‍മസി പ്രവേശന പരീക്ഷയ്ക്ക് തയ്യാറെടുക്കുന്നവര്‍ക്ക്‌ പ്രാക്ടീസ് ടെസ്റ്റ് നടത്താന്‍ അവസരം. കീം 2026-ന് അപേക്ഷിച്ച വിദ്യാര്‍ത്ഥികള്‍ക്ക് കമ്പ്യൂട്ടര്‍ അധിഷ്ഠിത പരീക്ഷാരീതി പരിചയപ്പെടുത്താനാണ് പ്രാക്ടീസ് ടെസ്റ്റ് സൗകര്യം ലഭ്യമാക്കിയത്. ഏപ്രില്‍ 17 മുതല്‍ 22 വരെയാണ് കമ്പ്യൂട്ടര്‍ അധിഷ്ഠിത പരീക്ഷകള്‍ നടത്തുന്നത്.
പ്രതീകാത്മക ചിത്രം
തിരുവനന്തപുരം: എഞ്ചിനീയറിങ്, ഫാര്‍മസി പ്രവേശന പരീക്ഷയ്ക്ക് തയ്യാറെടുക്കുന്ന വിദ്യാര്‍ത്ഥികള്‍ക്ക് പ്രാക്ടീസ് ടെസ്റ്റ് നടത്താന്‍ അവസരം. കീം 2026-ന് അപേക്ഷിച്ചവര്‍ക്ക് കമ്പ്യൂട്ടര്‍ അധിഷ്ഠിത പരീക്ഷാരീതി പരിചയപ്പെടുത്താനാണ് പ്രാക്ടീസ് ടെസ്റ്റ് സൗകര്യം ലഭ്യമാക്കിയത്. cee.kerala.gov.in എന്ന പ്രവേശന പരീക്ഷാ കമ്മീഷണറുടെ ഔദ്യോഗിക വെബ്‌സൈറ്റിലാണ് പ്രാക്ടീസ് ടെസ്റ്റിനുള്ള സൗകര്യമുള്ളത്.
വെബ്‌സൈറ്റിലെ ‘KEAM 2026 Candidate Portal’വഴി ആപ്ലിക്കേഷന്‍ നമ്പര്‍, പാസ്‌വേഡ് എന്നിവ നല്‍കി ലോഗിന്‍ ചെയ്തതിനു ശേഷം, മെനുവിലുള്ള ‘പ്രാക്ടീസ് ടെസ്റ്റ്’ എന്ന ലിങ്കില്‍ ക്ലിക്ക് ചെയ്ത് ഈ സൗകര്യം പ്രയോജനപ്പെടുത്താം. സംശയങ്ങളുണ്ടെങ്കില്‍ 0471- 2332120 എന്ന ഹെല്‍പ്‌ലൈന്‍ നമ്പറില്‍ വിളിക്കാം.
2026-27 അധ്യയന വര്‍ഷത്തെ എഞ്ചിനീയറിങ്, ഫാര്‍മസി കോഴ്‌സുകളിലെ പ്രവേശനത്തിനായി ഏപ്രില്‍ 17 മുതല്‍ 22 വരെയാണ് കമ്പ്യൂട്ടര്‍ അധിഷ്ഠിത പരീക്ഷകള്‍ നടത്തുന്നത്. കേരളത്തിലെ വിവിധ കേന്ദ്രങ്ങളിലും, ഡല്‍ഹി, ചെന്നൈ, ബെംഗളൂരു, മുംബൈ, ഷാര്‍ജ, കുവൈത്ത്, ബഹ്‌റൈന്‍ എന്നിവിടങ്ങളിലെ വിവിധ കേന്ദ്രങ്ങളിലുമാണ് പരീക്ഷ നടത്തുന്നത്.
ഏപ്രില്‍ 17 മുതല്‍ 22 വരെ ഉച്ചയ്ക്ക് രണ്ട് മുതല്‍ വൈകുന്നേരം അഞ്ച് മണി വരെയാണ് എഞ്ചിനീയറിങ് എന്‍ട്രന്‍സ് പരീക്ഷ നടത്തുന്നത്. ഏപ്രില്‍ 18 മുതല്‍ 20 വരെ രാവിലെ 10 മുതല്‍ 11.30 വരെ ഫാര്‍മസി പരീക്ഷ നടത്തും. എഞ്ചിനീയറിങ് പരീക്ഷ എഴുതുന്നവര്‍ പരീക്ഷയ്ക്ക് രണ്ട് മണിക്കൂര്‍ മുമ്പ് പരീക്ഷാ കേന്ദ്രത്തില്‍ റിപ്പോര്‍ട്ട് ചെയ്യണം. പ്രവേശന പരീക്ഷാ കമ്മീഷണറുടെ വെബ്‌സൈറ്റില്‍ വിശദാംശങ്ങള്‍ നല്‍കിയിട്ടുണ്ട്.
പരീക്ഷയുടെ അഡ്മിറ്റ് കാര്‍ഡ് ഇപ്പോള്‍ ലഭ്യമാണ്. അപേക്ഷയിലെ അപാതകള്‍ മൂലം ചില വിദ്യാര്‍ത്ഥികളുടെ അഡ്മിറ്റ് കാര്‍ഡ് ലഭ്യമാക്കിയിട്ടില്ല. ഇവര്‍ക്ക് ഏപ്രില്‍ 15 വരെ അപാകതകള്‍ തിരുത്തുന്നതിന് അവസരമുണ്ട്. പിഴവുകള്‍ പരിഹരിച്ചാല്‍ ഈ വിദ്യാര്‍ത്ഥികള്‍ക്കും അഡ്മിറ്റ് കാര്‍ഡ് ലഭ്യമാകും.
