Kerala SSLC Result 2025: കാത്തിരുന്ന ഫലം മണിക്കൂറുകൾക്കകം; എസ്എസ്എൽസി പരീക്ഷാഫലം ഇന്നറിയാം

Kerala Sslc Result

തിരുവനന്തപുരം: വിദ്യാർത്ഥിക്കളുടെ കാത്തിരിപ്പിന് വിരാമമിട്ടുകൊണ്ട് എസ്എസ്എൽസി 2025 പരീക്ഷാഫലം ഇന്ന് പ്രഖ്യാപിക്കും. വൈകിട്ട് മൂന്ന് മണിയോടെ വിദ്യാഭ്യാസമന്ത്രി വി ശിവൻകുട്ടിയാണ് ഫലം പ്രഖ്യാപനം നടത്തുന്നത്. ടിഎച്ച്എസ്എൽസി, എഎച്ച്എസ്എൽസി ഫലങ്ങളും പ്രഖ്യാപിക്കും. മന്ത്രി ഫലം പ്രഖ്യാപിക്കുന്നതിന് പിന്നാലെ തന്നെ ഔദ്യോഗിക വെബ്‌സൈറ്റുകളിൽ ഫലം ലഭ്യമായി തുടങ്ങുന്നതാണ്. വിദ്യാർത്ഥികൾക്ക് അവരവരുടെ ഫലം വെബ്സൈറ്റുകളിൽ കൃത്യമായ വിവരം നൽകി പരിശോധിക്കാവുന്നതാണ്.

കേരളം, ലക്ഷദ്വീപ്, ഗൾഫ് മേഖലകൾ എന്നിവിടങ്ങളിലായി 4,27,021 വിദ്യാർത്ഥികളാണ് ഇത്തവണ പരീക്ഷ എഴുതിയത്. 2,17,696 ആൺകുട്ടികളും 2,09,325 പെൺകുട്ടികളും പരീക്ഷ എഴുതിയതായി വിദ്യാഭ്യാസ വകുപ്പ് കണക്കുകൾ വ്യക്തമാക്കുന്നു. 2025 മാർച്ച് മൂന്നിനാണ് എസ്എസ്എൽസി പരീക്ഷകൾ ആരംഭിച്ചത്. 26ന് അവസാനിച്ചു. ഏപ്രിൽ ആദ്യയാഴ്ച മൂല്യനിർണയം തുടങ്ങി. രണ്ട് ഘട്ടങ്ങളിലായാണ് മൂല്യനിർണയം പൂർത്തിയാക്കിയത്.

വിവിധ സൈറ്റുകൾ വഴിയും, ഡിജിലോക്കർ, എസ്എംഎസ് സേവനങ്ങൾ വഴിയും ഫലങ്ങൾ അറിയാൻ സാധിക്കുന്നതാണ്. ഔദ്യോഗിക പോർട്ടലുകളായ sslcexam.kerala.gov.in, results.kite.kerala.gov.in, pareekshabhavan.kerala.gov.in, prd.kerala.gov.in എന്നിവ വഴി വിദ്യാർത്ഥികൾക്ക് അവരവരുടെ ഫലങ്ങൾ പരിശോധിക്കാവുന്നതാണ്.

ഫലങ്ങൾ ശ്രദ്ധാപൂർവ്വം പരിശോധിക്കാനും പൊരുത്തക്കേടുകൾ കണ്ടെത്തിയാൽ സ്കൂളുകളുമായോ പരീക്ഷാ ഭവനുമായോ ബന്ധപ്പെടാനും അധികൃതർ വിദ്യാർത്ഥികൾക്ക് നിർദ്ദേശം നൽകിയിട്ടുണ്ട്. അതേസമയം, എസ്എസ്എൽസി ജയിക്കാൻ എഴുത്തു പരീക്ഷയിൽ 30 ശതമാനം മാർക്ക് എന്ന നിബന്ധന ഈ അധ്യയന വർഷം മുതൽ നടപ്പിലാക്കില്ലെന്ന് അധികൃതർ അറിയിച്ചിരുന്നു. 2027 മാർച്ചിലെ എസ്എസ്എൽസി പരീക്ഷ മുതലാകും ഇത് പ്രാബല്യത്തിൽ വരിക.

Updating….