Nivin Pauly: ‘സെറ്റിൽ നിന്ന് നിവിൻ പോളി ഇറങ്ങിപ്പോയിട്ടില്ല’; വ്യാജവാർത്തകൾ പ്രചരിപ്പിക്കരുതെന്ന് ബേബി ഗേളിൻ്റെ സംവിധായകൻ
Nivin Pauly - Listin Stephen: ബേബി ഗേൾ എന്ന സിനിമയുടെ സെറ്റിൽ നിന്ന് നിവിൻ പോളി ഇറങ്ങിപ്പോയെന്ന വാർത്തകൾ വ്യാജമെന്ന് സംവിധായകൻ അരുൺ വർമ്മ. നിവിൻ സിനിമയ്ക്കൊപ്പമുണ്ടെന്നും ഇനിയും ഉണ്ടാവുമെന്നും അദ്ദേഹം പറഞ്ഞു.
നിവിൻ പോളി
ബേബി ഗേൾ സിനിമയുടെ സെറ്റിൽ നിന്ന് നായകൻ നിവിൻ പോളി ഇറങ്ങിപ്പോയെന്ന വാർത്തകൾ തള്ളി സംവിധായകൻ അരുൺ വർമ്മ. വ്യാജവാർത്തകൾ പ്രചരിപ്പിക്കരുതെന്നും സംവിധായകനോടോ നടനോടോ ഇക്കാര്യം അന്വേഷിക്കാമായിരുന്നു എന്നും അദ്ദേഹം പറഞ്ഞു. മലയാള സിനിമയിലെ പ്രമുഖ നടൻ വലിയ തെറ്റിന് തിരി കൊളുത്തിയിട്ടുണ്ടെന്ന നിർമ്മാതാവ് ലിസ്റ്റിൻ സ്റ്റീഫൻ്റെ പ്രസ്താവനയ്ക്ക് പിന്നാലെയാണ് അദ്ദേഹം പറഞ്ഞത് നിവിൻ പോളിയെപ്പറ്റി ആണെന്ന തരത്തിൽ വാർത്തകൾ പ്രചരിച്ചത്. ഇതിനെയാണ് സംവിധായകൻ തള്ളിയത്.
സമൂഹമാധ്യമങ്ങളിൽ പ്രചരിക്കുന്ന വാർത്തകൾ അടിസ്ഥാനരഹിതമാണെൻ അരുൺ വർമ്മ പറഞ്ഞു. നിവിൻ സീനിയറായ നടനാണ്. അദ്ദേഹത്തിന് ഇങ്ങനെ ചെയ്യേണ്ട കാര്യമില്ല. ലിസ്റ്റിൻ പറഞ്ഞതെന്താണെന്ന് അറിയില്ല. അതിൽ അഭിപ്രായം പറയാനും കഴിയില്ല. പക്ഷേ, ഇപ്പോൾ പ്രചരിക്കുന്ന തരത്തിലുള്ള പ്രശ്നങ്ങൾ ഉണ്ടായിട്ടില്ല. സിനിമയുടെ സെറ്റിൽ നിന്ന് നിവിൻ പോളി ഇറങ്ങിപ്പോയെന്ന വാർത്തകൾ അടിസ്ഥാനരഹിതമാണ്. പറഞ്ഞ ഡേറ്റിന് നിവിൻ വന്ന് അഭിനയിച്ചിരുന്നു. നിവിൻ്റെ പ്രധാന ഭാഗങ്ങളൊക്കെ തീർത്തുകഴിഞ്ഞു. ഇനി ബാക്കിയുള്ളത് രണ്ടുമൂന്ന് ദിവസങ്ങൾക്കുള്ളിൽ പുനരാരംഭിക്കും. തന്നോടോ പ്രൊഡ്യൂസറോടോ നിവിനോടോ ചോദിക്കാതെ വാർത്തകൾ പ്രചരിപ്പിക്കുന്നത് തെറ്റാണെന്നും അരുൺ വിശദീകരിച്ചു. മനോരമഓൺലൈൻ ആണ് വാർത്ത റിപ്പോർട്ട് ചെയ്തത്.
ദിലീപിനെ നായകനാക്കി താൻ നിര്മ്മിക്കുന്ന പുതിയ ചിത്രം ‘പ്രിന്സ് ആന്ഡ് ഫാമിലി’യുടെ ടീസര് ലോഞ്ച് വേദിയിൽ വെച്ചായിരുന്നു ലിസ്റ്റിൻ സ്റ്റീഫൻ്റെ പരാമർശം. നടൻ്റെ പേര് പറയാതെ നടത്തിയ പ്രസ്താവന സമൂഹമാധ്യമങ്ങളിൽ വൈറലായി. മലയാള സിനിമയിലെ പ്രമുഖ നടൻ വലിയ തെറ്റിന് തിരി കൊളുത്തിയിട്ടുണ്ടെന്നും ആ തെറ്റ് ഇനി ആവർത്തിക്കരുത് എന്നുമായിരുന്നു അദ്ദേഹം പറഞ്ഞു. താനീ പറയുന്നത് ആ താരത്തിന് മനസിലാകുമെന്നും ലിസ്റ്റിൻ പറഞ്ഞു. പിന്നാലെ ഇത് നിവിൻ പോളിയെ ലക്ഷ്യം വച്ചാണ് പറഞ്ഞതെന്ന മട്ടിൽ വാർത്തകൾ പ്രചരിച്ചു.
ബേബി ഗേളിൽ അഭിനയിച്ചുകൊണ്ടിരിക്കെ ലിസ്റ്റിനുമായി അഭിപ്രായവ്യത്യാസമുണ്ടായ നിവിൻ പോളി സിനിമയിൽ നിന്ന് പിന്മാറി മറ്റൊരു സിനിമയിൽ ജോയിൻ ചെയ്തു എന്നായിരുന്നു അഭ്യൂഹങ്ങൾ. ഈ അഭ്യൂഹങ്ങളെയാണ് നിലവിൽ സംവിധായകൻ അരുൺ വർമ്മ തള്ളിയിരിക്കുന്നത്.
