Thalaivar Thambi Thalaimayil OTT : പൊങ്കാൽ സർപ്രൈസ് വിന്നർ; ജീവയുടെ തലൈവർ തമ്പി തലമൈയിൽ ഒടിടി റിലീസ് പ്രഖ്യാപിച്ചു
Thalaivar Thambi Thalaimayil OTT Release Date And Platform : മലയാളം ചിത്രം ഫാലിമിയുടെ സംവിധായകൻ നിതീഷ് സഹദേവാണ് സിനിമ ഒരുക്കിയിരിക്കുന്നത്. ഏറെ നാളുകൾക്ക് ശേഷം ജീവയ്ക്ക് ലഭിക്കുന്ന ബോക്സ്ഓഫീസ് ഹിറ്റും കൂടിയാണ് തലൈവർ തമ്പി തലമൈയിൽ
തമിഴ്നാട്ടിലെ പൊങ്കലിന് സൈലൻ്റായി വന്നും സൂപ്പർ ഹിറ്റ് അടിച്ച ചിത്രമാണ് ജീവയുടെ തലൈവർ തമ്പി തലമൈയിൽ (ടിടിടി). ഫാലിമി എന്ന മലയാളം സിനിമയ്ക്ക് ശേഷം നീതിഷ് സഹദേവ് ഒരുക്കിയ ചിത്രമാണ് ടിടിടി. സംവിധായകന് പുറമെ സിനിമയുടെ അണിയറപ്രവർത്തകരിൽ ഭൂരിഭാഗം പേരും മലയാളികളാണ്. വിജയിയുടെ ജനനായകൻ സെൻസർ ബോർഡുമായിട്ടുള്ള പ്രശ്നത്തെ തുടർന്ന് റിലീസാകാതെ ഇരുന്നതും കാർത്തിയുടെ വാ വാത്തിയാർ ബോക്സ്ഓഫീസിൽ ശ്രദ്ധിക്കാതെ പോയതും പൊങ്കലിന് ടിടിക്ക് മികച്ച ജയം സമ്മാനിച്ചു. തിയറ്ററിലെ മികച്ച വിജയത്തിന് പിന്നാലെ ജീവ ചിത്രം ഇതാ ഒടിടി റിലീസിന് തയ്യാറെടുക്കുകയാണ്.
ടിടിടി ഒടിടി
നെറ്റ്ഫ്ലിക്സാണ് ചിത്രത്തിൻ്റെ ഒടിടി അവകാശം സ്വന്തമാക്കിയിരിക്കിന്നത്. ചിത്രം ഫെബ്രുവരി 12-ാം തീയതി മുതൽ നെറ്റ്ഫ്ലിക്സിൽ സംപ്രേഷണം ചെയ്ത് തുടങ്ങും. സിനിമയുടെ ബോക്സ്ഓഫീസ് വിജയത്തിന് പിന്നാലെയാണ് ടിടിടിയുടെ ഡിജിറ്റൽ അവകാശം നെറ്റ്ഫ്ലിക്സ് സ്വന്തമാക്കുന്നത്.
കെആർ ഗ്രൂപ്പിൻ്റെ ബാനറിൽ കണ്ണൻ രവിയാണ് ചിത്രം നിർമിച്ചിരിക്കുന്നത്. സാൻജോ ജോസഫും സംവിധായകൻ നിതീഷ് രവിയും അനുരാജ് ഒബിയും ചേർന്നാണ് ചിത്രത്തിൻ്റെ രചന നിർവഹിച്ചിട്ടുള്ളത്. ജീവയ്ക്ക് പുറമെ തമ്പി രാമയ്യ, ഇളവരസ്, പ്രർഥന നാഥൻ, ജെൻസെൻ ദിവാകർ, ജെയ്വന്ത്, സർജിൻ കുമാർസ, രാജേഷ് പാണ്ഡിയൻ, സുഭാഷ് കണ്ണൻ, അമിത് മോഹൻ, അനുരാജ് ഒബി, ശരത്, സാവിത്രി എന്നിവരാണ് ചിത്രത്തിലെ മറ്റ് പ്രധാന വേഷങ്ങൾ കൈകാര്യം ചെയ്തിട്ടുള്ളത്.
വിഷ്ണു വിജയിയാണ് സംഗീത സംവിധായകൻ. ബബ്ലു അജു ആണ് ടിടിടിയുടെ ക്യാമറ കൈകാര്യം ചെയ്തിട്ടുള്ളത്. അർജുൻ ബാബു ആണ് എഡിറ്റർ.
