Kota Srinivasa Rao Passes Away: മുതിർന്ന തെലുങ്ക് നടൻ കോട്ട ശ്രീനിവാസ റാവു അന്തരിച്ചു
Actor Kota Srinivasa Rao Dies at Age of 83: ഞായറാഴ്ച പുലർച്ചെ ഫിലിം നഗറിലെ സ്വവസതിയിൽ വെച്ചാണ് അന്ത്യം. നാല് പതിറ്റാണ്ടിലേറെ നീണ്ട സിനിമ ജീവിതത്തിൽ അദ്ദേഹം 750-ലധികം സിനിമകളിൽ വേഷമിട്ടിട്ടുണ്ട്.
മുതിർന്ന തെലുങ്ക് നടൻ കോട്ട ശ്രീനിവാസ റാവു അന്തരിച്ചു. 83 വയസായിരുന്നു. വാർധക്യ സഹജമായ ആരോഗ്യ പ്രശ്നങ്ങളെ തുടർന്ന് ചികിത്സയിലായിരുന്നു. ഞായറാഴ്ച പുലർച്ചെ ഫിലിം നഗറിലെ സ്വവസതിയിൽ വെച്ചാണ് അന്ത്യം. നാല് പതിറ്റാണ്ടിലേറെ നീണ്ട സിനിമ ജീവിതത്തിൽ അദ്ദേഹം 750-ലധികം സിനിമകളിൽ വേഷമിട്ടിട്ടുണ്ട്. അദ്ദേഹത്തിന്റെ വിയോഗത്തിൽ ഞെട്ടലിലാണ് തെലുങ്ക് സിനിമാ മേഖല. 2023ൽ പുറത്തിറങ്ങിയ ‘സുവർണ്ണ സുന്ദരി’ എന്ന ചിത്രത്തിലായിരുന്നു അദ്ദേഹം അവസാനമായി വേഷമിട്ടത്.
1942 ജൂലൈ 10ന് കൃഷ്ണ ജില്ലയിലെ കങ്കിപാടുവിലാണ് കോട്ട ശ്രീനിവാസ റാവു ജനിച്ചത്. കുട്ടിക്കാലത്ത് അച്ഛനെപ്പോലെ ഡോക്ടറാകാനാണ് ആഗ്രഹിച്ചിരുന്നെങ്കിലും, സ്കൂൾ കാലഘട്ടത്തിൽ നാടകങ്ങളിൽ അഭിനയിച്ച്, അതിനോടുള്ള താൽപ്പര്യം വളർത്തിയെടുക്കുകയായിരുന്നു. സയൻസിൽ ബിരുദം നേടിയ അദ്ദേഹം സിനിമാ മേഖലയിൽ പ്രവേശിക്കുന്നതിന് മുമ്പ് സ്റ്റേറ്റ് ബാങ്ക് ഓഫ് ഇന്ത്യയിൽ ജോലി ചെയ്തിരുന്നു.
രുക്മിണി റാവു ആണ് ഭാര്യ. ദമ്പതികൾക്ക് രണ്ട് പെൺമക്കളും ഒരു മകനുമുണ്ട്. പിതാവിന്റെ പാത പിന്തുടർന്ന് സിനിമാ മേഖലയിലേക്ക് പ്രവേശിക്കാൻ ഒരുങ്ങുന്നതിനിടെയാണ് അദ്ദേഹത്തിന്റെ മകൻ കോട്ട വെങ്കട ആഞ്ജനേയ പ്രസാദ് 2010ൽ ഒരു അപകടത്തിൽ മരിച്ചത്. അദ്ദേഹത്തിന്റെ ഇളയ സഹോദരൻ ശങ്കർ റാവുവും ഒരു നടനാണ്.
കോട്ട ശ്രീനിവാസ റാവു തെലുങ്ക്, തമിഴ്, ഹിന്ദി, കന്നഡ, മലയാളം എന്നീ ഭാഷകളിൽ അഭിനയിച്ചിട്ടുണ്ട്. സിനിമയിൽ മാത്രമല്ല രാഷ്ട്രീയത്തിലും കോട്ട ശ്രീനിവാസ റാവു സാന്നിധ്യമറിയിച്ചിട്ടുണ്ട്. 1999 മുതൽ 2004 വരെ വിജയവാഡ ഈസ്റ്റ് എംഎൽഎ ആയി അദ്ദേഹം സേവനമനുഷ്ഠിച്ചു.
