Ahmedabad Air India Crash: പ്രധാനമന്ത്രി അഹമ്മദാബാദിൽ, ദുരന്തസ്ഥലവും ആശുപത്രിയും സന്ദർശിച്ചു
Prime Minister Narendra Modi visit Ahmedabad: അപകടം സംബന്ധിച്ച് ടാറ്റ ഗ്രൂപ്പ് ചെയര്മാന് എന്. ചന്ദ്രശേഖരനുമായി പ്രധാനമന്ത്രി സംസാരിച്ചിരുന്നു. ദുരന്തത്തില് ഡിജിസിഎ അടക്കം പ്രഖ്യാപിച്ച അന്വേഷണങ്ങള് ഇന്ന് തുടങ്ങും.
പ്രധാനമന്ത്രി അപകടസ്ഥലം സന്ദർശിക്കുന്നു
അഹമ്മദാബാദ്: പ്രധാനമന്ത്രി നരേന്ദ്ര മോദി അഹമ്മദാബാദിൽ എത്തി ദുരന്തസ്ഥലവും ആശുപത്രിയും സന്ദർശിച്ചു.ചികിത്സയിൽ കഴിയുന്നവരുമായും ബന്ധുക്കളുമായും പ്രധാനമന്ത്രി കൂടിക്കാഴ്ച നടത്തും. ശേഷം ബന്ധപ്പെട്ട ഉദ്യോഗസ്ഥർ അടക്കമുള്ളവർ പങ്കെടുക്കുന്ന അവലോകന യോഗത്തിലും പങ്കെടുക്കുമെന്നാണ് റിപ്പോർട്ട്. അപകടം സംബന്ധിച്ച് ടാറ്റ ഗ്രൂപ്പ് ചെയര്മാന് എന്. ചന്ദ്രശേഖരനുമായി പ്രധാനമന്ത്രി സംസാരിച്ചിരുന്നു.
ദുരന്തത്തില് ഡിജിസിഎ പ്രഖ്യാപിച്ച അന്വേഷണങ്ങളും ഡിഎൻഎ പരിശോധനയടക്കമുള്ള നടപടികളും ഇന്ന് തുടങ്ങും. അമേരിക്ക, യുകെ എന്നിവിടങ്ങളിൽ നിന്നുമുള്ള വിദഗ്ധ സംഘം ഉടൻ ഇന്ത്യയിലെത്തുമെന്നാണ് വിവരം. വിദഗ്ധ സമിതി രൂപീകരിച്ച് പരിശോധിക്കാനുളള തീരുമാനത്തിലാണ് വ്യോമയാനമന്ത്രാലയം.
രണ്ട് അമേരിക്കൻ ഏജൻസികളും അന്വേഷണത്തിൽ പങ്കെടുക്കും. അമേരിക്കയുടെ ഫെഡറൽ ഏവിയേഷൻ അഡ്മിനിസ്ട്രേഷനും അന്വേഷണവുമായി സഹകരിക്കുമെന്ന് റിപ്പോർട്ട്. തകര്ന്നുവീണ ബോയിങ് 787 ഡ്രീംലൈനര് വിമാനത്തിന്റെ ബ്ലാക് ബോക്സ് കണ്ടെത്തിയിട്ടുണ്ട്. ഇതിലെ വിവരങ്ങളാകും അപകട കാരണം കണ്ടെത്തുന്നതിൽ നിർണായകമാകും.
അപകടത്തിന് തൊട്ടുമുമ്പ് പൈലറ്റുമാര് സംസാരിച്ചതടക്കമുള്ള വിവരങ്ങളും വിമാനത്തിന് എന്തെങ്കിലും സാങ്കേതിക തകരാര് സംഭവിച്ചോ എന്നും ബ്ലാക്ക് ബോക്സ് പരിശോധിക്കുന്നതിലൂടെ കണ്ടെത്താനാകും. വിമാനത്തിന്റെ പിന്ഭാഗം കത്താതിരുന്നതിനാലാണ് വേഗത്തില് ബ്ലാക്ക് ബോക്സ് കണ്ടെത്താനായത്.
