Vande Bhaarath Train : കശ്മീർ ഇനി ഒറ്റയ്ക്കല്ല, രണ്ട് പ്രത്യേക വന്ദേഭാരതുകള് നാളെ മുതൽ ഓടിത്തുടങ്ങുന്നു
Prime Minister Narendra Modi inaugurated the Chenab Bridge: ഈ ചരിത്രപരമായ ഉദ്ഘാടനത്തോടെ, രണ്ട് പ്രത്യേക വന്ദേഭാരത് തീവണ്ടികൾ ആഴ്ചയിൽ ആറു ദിവസം നാല് സർവ്വീസുകൾ നടത്താൻ തുടങ്ങും.
ന്യൂഡൽഹി: ഇന്ത്യൻ റെയിൽവേയുടെ ചരിത്രത്തിലെ ഒരു സുവർണ്ണ അധ്യായമാണ് നാളെ കുറിക്കപ്പെടുന്നത്. കശ്മീർ താഴ്വരയിലെ മഞ്ഞുമൂടിയ മലനിരകളിലേക്ക്, ചെനാബ് നദിക്കുമീതെ തീവണ്ടിയുടെ ചൂളംവിളി ഇനി പതിവാകും. രാജ്യത്തിന്റെ അചഞ്ചലമായ പ്രതിബദ്ധതയുടെ പ്രതീകമായി, പ്രധാനമന്ത്രി നരേന്ദ്ര മോദി വെള്ളിയാഴ്ച ചെനാബ് പാലവും അൻജിപാലവും രാജ്യത്തിന് സമർപ്പിക്കും. ഇതോടെ, കശ്മീർ താഴ്വരയെ രാജ്യത്തിന്റെ മറ്റ് ഭാഗങ്ങളുമായി ബന്ധിപ്പിക്കുന്നതിൽ ഒരു വലിയ നാഴികക്കല്ലാണ് സ്ഥാപിക്കപ്പെടുന്നത്.
വന്ദേഭാരത് ഇനി കശ്മീരിലും
ഈ ചരിത്രപരമായ ഉദ്ഘാടനത്തോടെ, രണ്ട് പ്രത്യേക വന്ദേഭാരത് തീവണ്ടികൾ ആഴ്ചയിൽ ആറു ദിവസം നാല് സർവ്വീസുകൾ നടത്താൻ തുടങ്ങും. ജമ്മുതാവിയിൽ നിന്ന് പുറപ്പെടുന്ന യാത്രക്കാർക്ക് ഇനി വെറും നാലര മണിക്കൂർ കൊണ്ട് ശ്രീനഗറിൽ എത്താം. ദൂരം കുറയുന്നു എന്നതിലുപരി, “കശ്മീർ താഴ്വര ഇനി ഒറ്റക്കല്ല” എന്ന സന്ദേശമാണ് ഈ റെയിൽ ശൃംഖല നൽകുന്നത്. ഈ റെയിൽപ്പാത വൈകാതെ കന്യാകുമാരിയെ സ്പർശിക്കുമെന്നതാണ് മറ്റൊരു സുപ്രധാന പ്രഖ്യാപനം.
എഞ്ചിനീയറിംഗ് വിസ്മയം: ചെനാബ് പാലവും അൻജിപാലവും
കശ്മീരിലേക്കുള്ള ഈ യാത്ര വെറുമൊരു തീവണ്ടി യാത്ര മാത്രമല്ല, മറിച്ച് ഉധംപുർ-ശ്രീനഗർ-ബാരാമുള്ള ലൈനിലെ (272 കി.മീ.) എഞ്ചിനീയറിംഗ് വിസ്മയങ്ങൾക്ക് സാക്ഷ്യം വഹിക്കാനുള്ള അവസരം കൂടിയാണ്. ഹിമാലയൻ കാലാവസ്ഥയുടെയും വെല്ലുവിളി നിറഞ്ഞ ഭൂപ്രകൃതിയുടെയും കടുത്ത പ്രതിബന്ധങ്ങളെ അതിജീവിച്ചാണ് ഈ പാലങ്ങൾ പടുത്തുയർത്തിയിരിക്കുന്നത്.
- ചെനാബ് പാലം: സമുദ്രനിരപ്പിൽ നിന്ന് 856 മീറ്റർ (ഏകദേശം 359 മീറ്റർ ഉയരത്തിൽ) മുകളിലാണ് ചെനാബ് പാലം സ്ഥിതി ചെയ്യുന്നത്. ഈ ഉയരത്തിൽ നിന്ന് നോക്കിയാൽ ചെനാബ് നദി ഒരു വെള്ളിനൂലുപോലെ ഒഴുകുന്നത് കാണാം. 1.10 കിലോമീറ്ററാണ് ഈ പാലത്തിന്റെ ദൈർഘ്യം. റിയാസി ജില്ലയിലെ ബക്കലിനും കൗരിക്കും ഇടയിലുള്ള ചെനാബ് നദിക്ക് കുറുകെയാണ് ഈ പാലം കശ്മീരിലേക്കുള്ള പുതിയ പാത തുറക്കുന്നത്. 300 സിവിൽ എഞ്ചിനീയർമാരും 1300 ജീവനക്കാരും ആഴ്ചയിൽ എല്ലാ ദിവസവും പ്രവർത്തിച്ച് എട്ട് വർഷം കൊണ്ടാണ് ഈ അത്ഭുത നിർമ്മിതി പൂർത്തിയാക്കിയത്.
- അൻജിപാലം: ഈ റെയിൽ ശൃംഖലയിലെ മറ്റൊരു എഞ്ചിനീയറിംഗ് വിസ്മയമാണ് അൻജിപാലം. ഒറ്റത്തൂണിന്റെ ബലത്തിൽ 96 കേബിളുകളിൽ താങ്ങിനിൽക്കുന്ന ഈ നിർമ്മിതിയും കൊങ്കൺ റെയിൽവേ കോർപ്പറേഷന്റെ അഭിമാന നേട്ടമാണ്.
ഹിമാലയത്തെ രാജ്യത്തിന്റെ മറ്റ് ഭാഗങ്ങളുമായി ബന്ധിപ്പിക്കാനുള്ള ഇന്ത്യയുടെ ദീർഘകാല പ്രതിബദ്ധതയുടെ പ്രകാശഗോപുരമാണ് ഈ റെയിൽ പാത. ഈ ചരിത്രനിമിഷം ഇന്ത്യയുടെ വികസനക്കുതിപ്പിന് പുതിയ ഊർജ്ജം പകരും.
