Uttar Pradesh: 78 വർഷത്തെ കാത്തിരിപ്പ്; യുപിയിലെ ഒരു ഗ്രാമത്തിൽ ഒരാൾ പത്താം ക്ലാസ് പരീക്ഷ പാസായി

രാം സേവക്

78 വർഷങ്ങൾക്കിടെ ഉത്തർപ്രദേശിലെ ഒരു ഗ്രാമത്തിൽ ഒരാൾ പത്താം ക്ലാസ് പരീക്ഷ പാസായി. ബരാബങ്കി ജില്ലയിലെ നിസാംപൂർ ഗ്രാമത്തിലാണ് മുക്കാൽ നൂറ്റാണ്ടിന് ശേഷം ഇതാദ്യമായി ഒരാൾ പത്താം ക്ലാസ് പാസാവുന്നത്. 16 വയസുകാരനായ രാം സേവകാണ് ഈ നേട്ടം കുറിച്ചത്. ഗ്രാമം നിലവിൽ വന്നതിന് ശേഷമാണ് ഇവിടെ നിന്ന് ഒരാൾ പത്താം ക്ലാസ് പരീക്ഷ പാസാവുന്നത്.

55 ശതമാനം മാർക്ക് വാങ്ങിയാണ് രാം സേവക് പത്താം ക്ലാസ് പാസായത്. ജില്ലാ മജിസ്ട്രേറ്റ് അടക്കമുള്ള അധികൃതർ രാം സേവകിനെ അഭിനന്ദിച്ചു. തന്നെ ആദരിക്കാൻ വിളിച്ചപ്പോൾ തനിക്ക് നല്ല വസ്ത്രങ്ങളോ ഷൂസോ ഉണ്ടായിരുന്നില്ല എന്ന് രാം സേവക് പറഞ്ഞു. ജീവിതത്തിൽ ആദ്യമായി ഷൂസണിയുന്നത് ആ ചടങ്ങിലാണ്. തനിക്ക് എഞ്ചിനീയർ ആവണമെന്നാണ് ആഗ്രഹമെന്നും രാം സേവക് കൂട്ടിച്ചേർത്തു.

300 പേർ മാത്രം താമസിക്കുന്ന ഒരു ഗ്രാമമാണ് നിസാംപൂർ. അഹ്മദ്പൂർ ഗ്രാമപഞ്ചായത്തിന് കീഴിലാണ് ഈ ഗ്രാമം. ഒരു ടാർ ചെയ്ത റോഡ്, ഒരു പ്രൈമറി സ്കൂൾ, ഒരു ക്ഷേത്രം എന്നിവ മാത്രമാണ് ഇവിടെയുള്ളത്. ഗ്രാമത്തിലെ ഭൂരിഭാഗം ആളുകളും ദിവസവേതനത്തിന് ജോലി ചെയ്യുന്നവരാണ്. രാം സേവകിൻ്റെ പിതാവ് ജഗദീഷ് പ്രസാദിൻ്റെയും തൊഴിൽ ഇത് തന്നെ.

ഏഴ് അംഗങ്ങളാണ് കുടുംബത്തിലുള്ളത്. രാം സേവക്, പിതാവ് ജഗദീഷ് പ്രസാദ്, മാതാവ് പുഷ്പ, രണ്ട് അനിയന്മാരും അനിയത്തിമാരും. രണ്ട് മുറിയുള്ള ഒരു കുടിലിലാണ് ഇവരുടെ താമസം. ഒരു മുറി കന്നുകാലിത്തൊഴുത്താണ്. ബാക്കിയുള്ള ഒരു മുറിയിലാണ് ഇവരെല്ലാവരും താമസിക്കുന്നത്. വീട്ടിൽ വൈദ്യുതി ഇല്ല. പക്ഷേ, ഒരു സോളാർ ലൈറ്റുണ്ട്. പകൽ ദിവസവേതനം ചെയ്തിട്ട് രാത്രി ഈ ലൈറ്റിൻ്റെ വെളിച്ചത്തിലാണ് രാം സേവക് പഠിച്ചത്.

രാം സേവകിൻ്റെ മാതാവ് പുഷ്പയ്ക്ക് പ്രൈമറി സ്കൂളിൽ ഉച്ചഭക്ഷണം ഉണ്ടാക്കുന്ന ജോലിയാണ്. അഞ്ചാം ക്ലാസ് വരെ ഇവിടെ പഠിച്ചതിന് ശേഷം ഗ്രാമത്തിൽ നിന്ന് അരക്കിലോമീറ്റർ അകലെയുള്ള സർക്കാർ ഇൻ്റർ കോളജിലാണ് രാം സേവക് പഠിച്ചത്.