Kerala Election Update: പാമ്പ് പാമ്പ്… പോളിങ് ഡ്യൂട്ടിയിലുണ്ടായിരുന്ന പോലീസ് ജീപ്പിനുള്ളിൽ അപ്രതീക്ഷിത അതിഥി; സംഭവം കായംകുളത്ത്

കായംകുളം: കേരള നിയമസഭാ തിരഞ്ഞെടുപ്പിന്റെ വോട്ടെടുപ്പ് (Kerala Assembly Election) പുരോഗമിക്കുന്നതിനിടെ കായംകുളത്ത് നിന്ന് കൗതുകകരമായ വാർത്തയാണ് ഇപ്പോൾ പുറത്തുവരുന്നത്. കായംകുളം എംഎസ്എം ഹയർസെക്കൻഡറി സ്കൂളിലെ പോളിങ് ബൂത്തിലാണ് വോട്ടെടുപ്പ് നടക്കുന്നതിനിടെ നാടകീയ സംഭവങ്ങൾ നടന്നത്.

ബൂത്തിൽ വോട്ടർമാർ തമ്മിലുണ്ടായ തർക്കം പരിഹരിക്കാൻ എത്തിയ പോലീസ് വാഹനത്തിനുള്ളിൽ പാമ്പ്. ബൂത്തിലെ ക്രമസമാധാന പ്രശ്നങ്ങൾ പരിഹരിക്കാനായി പോലീസ് സംഘം ജീപ്പ് നിർത്തിയതിന് പിന്നാലെയാണ് വാഹനത്തിനുള്ളിൽ പാമ്പിനെ കണ്ടെത്തിയത്. ഇതോടെ പോളിങ് ബൂത്തിലുണ്ടായിരുന്ന എല്ലാവരും പരിഭ്രാന്തരായി.

ALSO READ: എൽഡിഎഫിന് വോട്ട് ചോദിച്ച് ബിജെപി സ്ഥാനാർഥി, ചിറ്റൂരിൽ ഫേസ്ബുക്ക് പോസ്റ്റിന്റെ പേരിൽ വിവാദം

ബൂത്തിലുണ്ടായിരുന്ന പോലീസുകാരും വോട്ടർമാരും എല്ലാവർക്കും കൗതുകകരമായ കാഴ്ച്ചയാണ് അവിടെ നടന്നത്. എന്നാൽ അല്പ നേരത്തിനകം തന്നെ എല്ലാവരെയും അത്ഭുതപ്പെടുത്തിക്കൊണ്ട് പാമ്പ് ജീപ്പിനുള്ളിൽ നിന്നും പുറത്തിറങ്ങി സമീപത്തെ കുറ്റിക്കാട്ടിലേക്ക് തനിയെ ഇഴഞ്ഞു നീങ്ങുകയായിരുന്നു.

ഇതോടെ ബൂത്തിലെ വലിയൊരു ആശങ്കയാണ് ഒഴിഞ്ഞുപോയത്. ഇതിനുശേഷം ബൂത്തിലെ തർക്കങ്ങൾ പരിഹരിക്കുകയും വോട്ടെടുപ്പ് സാധാരണ നിലയിൽ തുടരുകയും ചെയ്തതായി അധികൃതർ അറിയിച്ചു.