Thiruvananthapuram Police Clash: പാർക്കിങ്ങിനെച്ചൊല്ലി തർക്കം; പോലീസ് ആസ്ഥാനത്തിനു മുന്നിൽ അടിപിടി കൂടി പോലീസുകാർ

തിരുവനന്തപുരം: നിയമം നടപ്പിലാക്കേണ്ടവർ തന്നെ തമ്മിലടിക്കുന്ന കാഴ്ചയ്ക്ക് സാക്ഷ്യം വഹിച്ച് തലസ്ഥാനത്തെ പോലീസ് ആസ്ഥാനം. കാർ പാർക്ക് ചെയ്യുന്നതിനെ ചൊല്ലിയുണ്ടായ ചെറിയ തർക്കമാണ് ഒടുവിൽ വലിയ കൈയാങ്കളിയിൽ കലാശിച്ചത്. തിരുവനന്തപുരത്തെ പോലീസ് ആസ്ഥാനത്തിന് മുന്നിൽ വച്ചാണ് പോലീസുകാർ തമ്മിൽ ഏറ്റുമുട്ടിയത്.

ALSO READ: മഴ മാറുന്നില്ല! ഇന്ന് വിവിധ ജില്ലകളിൽ ഗ്രീൻ അലർട്ട്; ഇടിമിന്നലോട് കൂടിയ മഴയ്ക്ക് സാധ്യത

പോലീസ് ആസ്ഥാനത്ത് ഗാർഡ് ഡ്യൂട്ടിയിലുണ്ടായിരുന്ന കിരൺ എന്ന പോലീസുകാരനും മ്യൂസിയം സ്റ്റേഷനിലെ സീനിയർ സിവിൽ പോലീസ് ഓഫീസർ വിശാഖും തമ്മിലാണ് തർക്കത്തെ തുടർന്ന് ഏറ്റുമുട്ടിയത്. കിരണിന്റെ അമ്മയുടെ കാർ പാർക്ക് ചെയ്തതുമായി ബന്ധപ്പെട്ട തർക്കമാണ് തമ്മിലടിയിൽ അവസാനിച്ചത്.

കിരണിന്റെ അമ്മയുടെ കാർ മാറ്റിയിടാൻ ട്രാഫിക് ഡ്യൂട്ടിയിലുണ്ടായിരുന്ന വിശാഖ് ആവശ്യപ്പെട്ടതിന് പിന്നാലെയാണ് ഇരുവരും തമ്മിൽ തർക്കമുണ്ടായത്. ഒടുവിൽ പ്രകോപിതനായ കിരൺ വിശാഖിനെ മർദ്ദിക്കുകയായിരുന്നുവെന്ന് പരാതിയിൽ പറയുന്നത്. സംഭവത്തിന് പിന്നാലെ വിശാഖ് മ്യൂസിയം സ്‌റ്റേഷനിൽ പരാതി നൽകിയിട്ടുണ്ട്.