Sunburn Remedies: വെയിലേറ്റ് നിങ്ങൾ കരിവാളിച്ചോ? എങ്കിൽ വിഷമികേണ്ട അടുക്കളയിലുണ്ട് പരിഹാരം

പ്രതീകാത്മക ചിത്രം

വേനൽക്കാലത്തിന്റെ തുടക്കമാണിത്. ഇപ്പോൾ തന്നെ അസഹനീയമായ ചൂടാണ് അനുഭവപ്പെടുന്നത്. പുറത്തുപോകുന്നവർ വളരെയധികം ശ്രദ്ധിക്കേണ്ട സമയംകൂടിയാണ്. സൺസ്ക്രീൻ ധരിക്കേണ്ടത് അത്യാവശ്യമാണ്. എന്നാൽ ഓരോ രണ്ട് മണിക്കൂറിലും ഇത് വീണ്ടും പുരട്ടുന്നത് എല്ലായ്പ്പോഴും പ്രായോഗികമല്ല. വെയിലുകൊണ്ട് പലപ്പോഴും നമ്മൾ കരിവാളിച്ച് ചുവന്നാണ് വീട്ടിലേക്ക് വരുന്നത്. എന്നാൽ ഇതിനെ മറിക്കടക്കാൻ നമ്മുടെ അടുക്കളയിലെ ചില സാധനങ്ങൾ മതിയാകുമെന്ന് പറഞ്ഞാൽ നിങ്ങൾ വിശ്വസിക്കുമോ? വിലകൂടിയ വസ്തുക്കൾക്കായി പണം ചെലവഴിക്കുന്നതിനുപകരം, നിങ്ങളുടെ ചർമ്മത്തെ തിളക്കമുള്ളതാക്കാനും പഴയതുപോലെ ആക്കാനും ഈ പൊടികൈകൾ ചെയ്തു നോക്കൂ.

ഓട്സ്

ഓട്ട്സ് പ്രഭാതഭക്ഷണത്തിന് വളരെ ആരോ​ഗ്യകരമായ ഒന്നാണ്. എന്നാൽ ഇതിന് മാത്രമല്ല, സൂര്യതാപം ശമിപ്പിക്കാനും ഇത് ഏറെ സഹായിക്കും. ആന്റി-ഇൻഫ്ലമേറ്ററി ഗുണങ്ങളാൽ സമ്പന്നമായ ഓട്സ്, പ്രകോപനം ശമിപ്പിക്കുകയും മുഖത്തെ ചുവപ്പ് കുറയ്ക്കുകയും ചെയ്യുന്നു. ഒരു കപ്പ് ഓട്സ് പൊടിയാക്കി എടുക്കുക ഇത് തണുത്ത വെള്ളത്തിൽ യോജിപ്പിച്ച് മുഖത്ത് പുരട്ടി 15 മിനിറ്റ് വയ്ക്കുക. ശേഷം കഴുകി കളയാം.

തൈര്

സൂര്യതാപം മൂലമുണ്ടാകുന്ന കരിവാളിപ്പ് അകറ്റാൻ ഏറ്റവും നല്ല മാർ​ഗമാണ് തൈര്. തൈരിൽ പ്രോബയോട്ടിക്സും ലാക്റ്റിക് ആസിഡും അടങ്ങിയിട്ടുണ്ട്. ഇത് കേടുപാടുകൾ വന്ന ചർമ്മം പഴയപടിയാക്കാൻ സഹായിക്കുകയും മുഖത്ത് തണുപ്പ് നൽകുകയും ചെയ്യുന്നു. വെയിലേറ്റ ഭാഗത്ത് നേരിട്ട് പുരട്ടുക, 15 മിനിറ്റ് നേരം വയ്ക്കുക, തുടർന്ന് തണുത്ത വെള്ളത്തിൽ കഴുകാം. വ്യത്യാസം നിങ്ങൾ ഉടൻ അറിയാൻ കഴിയും.

തേൻ

ചർമ്മം വേഗത്തിൽ വീണ്ടെടുക്കാൻ സഹായിക്കുന്ന ആൻറി ബാക്ടീരിയൽ, മോയ്സ്ചറൈസിംഗ് ഗുണങ്ങൾ ഇതിന് ഉണ്ട്. മുഖത്തെ കരിവാളിപ്പുള്ള ഭാ​ഗത്ത് ഒരു നേർത്ത പാളിയായി തേൻ പുരട്ടുക, 20 മിനിറ്റ് വയ്ച്ച ശേഷം കഴുകിക്കളയുക. ഇത് ഒട്ടിപ്പിടിക്കുന്നതായി തോന്നിയേക്കാം, പക്ഷേ അതിന്റെ ഗുണം നിങ്ങൾക്ക് പെട്ടെന്ന് മനസ്സിലാക്കാൻ സാധിക്കും.

ടീ ബാഗുകൾ

ടീ ബാഗുകൾ ആശ്വാസകരമായ ഒന്നാണ്. കറുപ്പ് അല്ലെങ്കിൽ ഗ്രീൻ ടീ ബാഗുകളിൽ ടാനിനുകൾ അടങ്ങിയിട്ടുണ്ട്, ഇത് വീക്കം കുറയ്ക്കുകയും ചർമ്മത്തിന്റെ സന്തുലിതാവസ്ഥ നിലനിർത്താൻ സഹായിക്കുകയും ചെയ്യുന്നു. കുറച്ച് ബാഗുകൾ തണുത്ത വെള്ളത്തിൽ മുക്കിവയ്ക്കുക, തുടർന്ന് കരിവാളിപ്പേറ്റ സ്ഥലത്ത് വയ്ക്കുക. ഈ പ്രതിവിധി വേഗത്തിലും ഫലപ്രദമായും ആശ്വാസം നൽകുന്നു.

ആപ്പിൾ സിഡെർ വിനെഗർ

നേർപ്പിച്ച ആപ്പിൾ സിഡെർ വിനെഗർ സൂര്യതാപം ശമിപ്പിക്കും. ഇത് ചർമ്മത്തിന്റെ പിഎച്ച് അളവ് സന്തുലിതമാക്കാൻ സഹായിക്കുകയും പെട്ടെന്ന് ഫലം നൽകുകയും ചെയ്യും. വിനാഗിരിയും വെള്ളവും തുല്യ അളവിൽ കലർത്തി, ഒരു കോട്ടൺ ബോൾ ഉപയോഗിച്ച് പുരട്ടുക. ഇത് അമിതമായി ഉപയോഗിക്കാതിരിക്കാൻ ശ്രദ്ധിക്കുക, കാരണം ഇത് ചർമ്മത്തെ വരണ്ടതാക്കും.