Rice Alternatives: അരി തന്നെ വേണമെന്നില്ല, ചോറിന് പകരം ഇവ ശീലമാക്കൂ… ആരോഗ്യവും സംരക്ഷിക്കാം
Best Lunch Alternatives to Rice: കേരളത്തിൽ അരി വില കൂടുന്ന സാഹചര്യത്തിൽ ചോറിന് പകരക്കാരെ നാം അറിയേണ്ടതുണ്ട്. ശരീരഭാരം കുറയ്ക്കാനും കാർബോഹൈഡ്രേറ്റിന്റെ അളവ് നിയന്ത്രിക്കാനും ആഗ്രഹിക്കുന്നവർക്കും ഇത് ഉപകാരപ്പെടും. ചോറിന് പകരം പോഷകസമൃദ്ധവും കലോറി കുറഞ്ഞതുമായ മറ്റ് ഭക്ഷണങ്ങൾ ഏതെല്ലാമെന്ന് അറിഞ്ഞാലോ...

പ്രതീകാത്മക ചിത്രം
മലയാളികളുടെ ഏറ്റവും പ്രിയപ്പെട്ട പ്രധാന ഭക്ഷണമാണ് ചോറ്. ഒരു നേരമെങ്കിലും ചോറ് കഴിക്കാറുണ്ട്. എന്നാൽ കേരളത്തിൽ അരി വില കൂടുന്ന സാഹചര്യത്തിൽ ചോറിന് പകരക്കാരെ നാം അറിയേണ്ടതുണ്ട്. ശരീരഭാരം കുറയ്ക്കാനും കാർബോഹൈഡ്രേറ്റിന്റെ അളവ് നിയന്ത്രിക്കാനും ആഗ്രഹിക്കുന്നവർക്കും ഇത് ഉപകാരപ്പെടും. ചോറിന് പകരം പോഷകസമൃദ്ധവും കലോറി കുറഞ്ഞതുമായ മറ്റ് ഭക്ഷണങ്ങൾ ഏതെല്ലാമെന്ന് അറിഞ്ഞാലോ…
ചോറിന് പകരക്കാർ
ക്വിനോവ
പ്രോട്ടീൻ ധാരാളമായി അടങ്ങിയ ഒരു വിത്താണ് ക്വിനോവ. ശരീരത്തിന് ആവശ്യമായ ഒൻപത് അവശ്യ അമിനോ ആസിഡുകളും ഇതിൽ അടങ്ങിയിട്ടുണ്ട്. ഗ്ലൂട്ടൻ രഹിതമായതിനാൽ ഗ്ലൂട്ടൻ ഒഴിവാക്കേണ്ടവർക്കും ആരോഗ്യകരമായ ഭക്ഷണക്രമം പിന്തുടരുന്നവർക്കും ഇത് മികച്ചൊരു തിരഞ്ഞെടുപ്പാണ്.
കോളിഫ്ലവർ റൈസ്
കോളിഫ്ലവർ ചെറുതായി അരിഞ്ഞോ ഗ്രേറ്റ് ചെയ്തോ ചോറിന് പകരമായി തയ്യാറാക്കുന്ന വിഭവമാണിത്. സാധാരണ ചോറിനേക്കാൾ കലോറിയും കാർബോഹൈഡ്രേറ്റും ഇതിൽ വളരെ കുറവാണ്. ശരീരഭാരം കുറയ്ക്കാൻ ശ്രമിക്കുന്നവർക്ക് എളുപ്പത്തിൽ പരീക്ഷിക്കാവുന്ന ഒന്നാണിത്.
ബ്രോക്കോളി റൈസ്
കോളിഫ്ലവർ പോലെ തന്നെ ബ്രോക്കോളി ചെറുതായി അരിഞ്ഞ് ചോറിന് സമാനമായ രൂപത്തിൽ തയ്യാറാക്കി കഴിക്കാം. കലോറി കുറവായതിനൊപ്പം ധാരാളം നാരുകളും വിറ്റാമിൻ സിയും ഇതിലൂടെ ശരീരത്തിന് ലഭിക്കുന്നു.
ALSO READ: ഫ്രിഡ്ജിൽ വച്ചിടും കേടാകുന്നോ? മുറിച്ച പഴങ്ങളും പച്ചക്കറികളും സൂക്ഷിക്കാൻ വഴികളിതാ
ഷിറാറ്റാക്കി റൈസ്
കൊഞ്ചാക് എന്ന ചെടിയുടെ വേരിൽനിന്ന് തയ്യാറാക്കുന്ന ഭക്ഷണമാണിത്. ‘ഗ്ലൂക്കോമന്നൻ’ എന്ന നാരുകൾ ഇതിൽ ധാരാളമായി അടങ്ങിയിട്ടുണ്ട്. കലോറി വളരെ കുറവായതിനാൽ കുറഞ്ഞ കലോറി ഭക്ഷണക്രമം പിന്തുടരുന്നവർക്ക് മികച്ചൊരു ബദലാണിത്.
ബാർലി
നാരുകളും പ്രോട്ടീനും ധാരാളമായി അടങ്ങിയ ധാന്യമാണ് ബാർലി. ദഹനം സുഗമമാക്കാനും കുടലിന്റെ ആരോഗ്യം സംരക്ഷിക്കാനും സഹായിക്കുന്ന നാരുകൾ ഇതിലുണ്ട്. ചോറിന് പകരം ബാർലി വേവിച്ച് കഴിക്കാവുന്നതാണ്.
ഹോൾ വീറ്റ് കുസ്കുസ്
ഗോതമ്പിൽനിന്ന് തയ്യാറാക്കുന്ന ചെറിയ മുത്തുകളുടെ ആകൃതിയിലുള്ള ഭക്ഷണമാണിത്. സാധാരണ കുസ്കുസിനെക്കാൾ നാരുകളും പ്രോട്ടീനും കൂടുതലുള്ള ഹോൾ വീറ്റ് വകഭേദം തിരഞ്ഞെടുക്കുന്നത് ശരീരഭാരം നിയന്ത്രിക്കാൻ സഹായിക്കും.
ഫ്രീകെ (Freekeh)
പച്ചനിറത്തിൽ വിളവെടുക്കുന്ന ഇളം ഗോതമ്പിൽനിന്ന് തയ്യാറാക്കുന്ന ധാന്യമാണിത്. പ്രോട്ടീൻ, നാരുകൾ, ഇരുമ്പ് എന്നിവയുടെ നല്ലൊരു ഉറവിടമാണ് ഫ്രീകെ. ചോറിന് പകരം വേവിച്ച് ഇത് ഭക്ഷണത്തിൽ ഉൾപ്പെടുത്താം. ചോറ് പൂർണ്ണമായി ഒഴിവാക്കുന്നതിന് പകരം ശരീരത്തിന്റെ ആവശ്യത്തിനനുസരിച്ച് അളവ് നിയന്ത്രിക്കുകയും, ഭക്ഷണത്തിൽ പച്ചക്കറികൾ, പ്രോട്ടീൻ, നാരുകൾ എന്നിവ കൃത്യമായി ഉൾപ്പെടുത്തുകയും ചെയ്യാവുന്നതാണ്.
English Summary:
Rice is one of the most popular foods among Malayalis, and many people consume it at least once a day. However, with rising rice prices in Kerala, it is worth exploring healthier and more affordable alternatives to rice. These options can also benefit people who want to lose weight or control their carbohydrate intake.