Nobel Prize for physics: ഭൗതികശാസ്ത്ര നൊബേൽ മൂന്നു പേർക്ക്, ലോകത്തെ മാറ്റിമറിക്കാൻ കെൽപുള്ള ആ കണ്ടെത്തൽ ഇതാ
Nobel Prize for physics: 1901-ൽ പുരസ്കാരം നൽകിത്തുടങ്ങിയതുമുതൽ 2024 വരെ 118 തവണയായി 226 പേർക്ക് ഭൗതികശാസ്ത്ര നൊബേൽ സമ്മാനിച്ചിട്ടുണ്ട്.
സ്റ്റോക്ക്ഹോം: ഈ വർഷത്തെ ഭൗതികശാസ്ത്രത്തിനുള്ള നൊബേൽ സമ്മാനം മൂന്ന് ശാസ്ത്രജ്ഞർ പങ്കിട്ടെടുത്തു. ജോൺ ക്ലാർക്ക്, മിഷേൽ എച്ച്. ഡെവോറെക്ക്, ജോൺ എം. മാർട്ടീനിസ് എന്നിവരാണ് പുരസ്കാരത്തിന് അർഹരായവർ.
ഒരു ഇലക്ട്രിക് സർക്യൂട്ടിനുള്ളിൽ, സാധാരണ നിലയിൽ സംഭവിക്കാത്ത ‘സ്ഥൂലമായ ക്വാണ്ടം മെക്കാനിക്കൽ ടണലിങ്ങും’ (Macroscopic Quantum Mechanical Tunnelling) ‘ഊർജ ക്വാണ്ടൈസേഷനും’ (Energy Quantisation) കണ്ടെത്തിയ സുപ്രധാന ഗവേഷണത്തിനാണ് ഇവർക്ക് ഈ ആദരം ലഭിച്ചത്. ക്വാണ്ടം മെക്കാനിക്സ് മേഖലയിലെ ഒരു നിർണ്ണായക വഴിത്തിരിവാണ് ഈ കണ്ടെത്തൽ.
1901-ൽ പുരസ്കാരം നൽകിത്തുടങ്ങിയതുമുതൽ 2024 വരെ 118 തവണയായി 226 പേർക്ക് ഭൗതികശാസ്ത്ര നൊബേൽ സമ്മാനിച്ചിട്ടുണ്ട്. കഴിഞ്ഞ വർഷം, മെഷീൻ ലേണിംഗിന്റെ (Machine Learning) അടിസ്ഥാന ശിലകൾ സ്ഥാപിക്കാൻ സഹായിച്ചതിന് ജോൺ ഹോപ്ഫീൽഡ്, ജിയോഫ്രി ഹിന്റൻ എന്നിവർക്കായിരുന്നു ഭൗതികശാസ്ത്ര നൊബേൽ ലഭിച്ചത്.
വരും ദിവസങ്ങളിലെ നൊബേൽ പ്രഖ്യാപനങ്ങൾ
- രസതന്ത്ര നൊബേൽ നാളെ പ്രഖ്യാപിക്കും.
- സാഹിത്യ നൊബേൽ വ്യാഴാഴ്ചയും സമാധാന നൊബേൽ വെള്ളിയാഴ്ചയുമാണ് പ്രഖ്യാപിക്കുക.
- സാമ്പത്തികശാസ്ത്രത്തിനുള്ള നൊബേൽ അടുത്ത തിങ്കളാഴ്ച പ്രഖ്യാപനമുണ്ടാകും.
പുരസ്കാര ജേതാക്കൾക്ക് 11 മില്യൻ സ്വീഡിഷ് ക്രോണർ (ഏകദേശം 1.2 മില്യൻ യുഎസ് ഡോളർ) സമ്മാനത്തുകയായി ലഭിക്കും. ആൽഫ്രഡ് നൊബേലിന്റെ ചരമവാർഷികമായ ഡിസംബർ 10-ന് സ്റ്റോക്ക്ഹോമിൽ വെച്ച് പുരസ്കാരങ്ങൾ സമ്മാനിക്കും.
